သျှမ်းပြည် အရှေ့ပိုင်း ကျိုင်းတုံမြို့ မှ CDM ပြုလုပ်ထားသည့် ကျောင်းဆရာနှစ်ဦးကို စစ်ကောင်စီမှ ဖမ်းဆီးသွားကြောင်း စုံစမ်းသိရသည်။
ယမန်နေ့ (ဇူလိုင် ၁၇) ရက်တွင် ကျိုင်းတုံမြို့မှ CDM ကျောင်းဆရာနှစ်ဦးကို အာဏာသိမ်း စစ်ကောင်စီ တပ်သားများက လာရောက်ဖမ်းဆီးသွားကြောင်း အမည်မဖော်လိုသည့် အသက် ၃၀ ဝန်းကျင်ရှိ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ဘာကြောင့် ဖမ်းသလဲတော့ ကျမတို့လည်း မသိရပါဘူး၊ ဒါပေမဲ့ ခွင့်ပြုချက်မရဘဲ စာသင်ခွင့်မရှိဘူး ဆိုပြီး အော်ဆဲကြတာ၊ ဆရာနှစ်ယောက်လုံးက CDM လုပ်ပြီး အပြင်မှာ အင်္ဂလိပ်သင်ပေးနေတဲ့ သူတွေပါ” ဟု ၎င်းအမျိုးသမီးက ပြောသည်။
ဖမ်းဆီးခံရသူများသည် ဆရာဇော်ထက် (ခ) ရွှေမန်းနှင့် ဆရာနေလင်းတို့ဖြစ်ကြပြီး လက်ရှိတွင် မည်သည့် နေရာသို့ ဖမ်းဆီးခေါ်ဆောင်သွားခံရခြင်း မသိရကြောင်း ဒေသခံများက ပြောသည်။
စစ်ကောင်စီတို့မှ ယင်းကဲ့သို့ ရုတ်တရက်ဖမ်းဆီးခြင်းများ ပြုလုပ်လာသည့်အတွက် ကျိုင်းတုံမြို့အတွင်းရှိ CDM များအတွက် အန္တရာယ် ပိုမိုကြီးမားလာနိုင်ကြောင်း ဒေသခံအမျိုးသားတစ်ဦးက ဆက်ပြောသည်။
“Kaung For You က ဆရာတွေ ဖမ်းခံရတယ်ဆိုကတည်းက စစ်ကောင်စီတွေဟာ ဆရာ/ဆရာမတွေ လိုက်ဖမ်းနေတာ အဖမ်းခံရတဲ့ ဆရာ/မတွေ မနည်းတော့ဘူး။ တချို့ဆရာ/ဆရာမတွေက ဆူပူ အကြမ်းဖက်မှု ပုဒ်မ နဲ့ အဖမ်းခံရတာရှိတယ်။ ဒါကြောင့် ကျန်နေတဲ့ CDM သမားတွေအတွက်လည်း အန္တရာယ် များတယ်” ဟု အထက်ပါ မျိုးသားက ပြောသည်။
အာဏာသိမ်းစစ်ကောင်စီသည် Kaung for You Education မှ ဦးဆောင်သည့်ဆရာကို ဖမ်းမိပြီးနောက် ပြင်ပတွင် စာသင်ပေးနေသည့် CDM ဆရာ၊ ဆရာမများကို ဆက်တိုက်ဖမ်းဆီးမှုများပြုလုပ်နေပြီး ဇူလိုင် ၁၃ ရက်တွင် ကလောမြို့မှ CDM ဆရာမ ၁ ဦး၊ ဇူလိုင်လ ၁၄ ရက် ညပိုင်းတွင် ဟဲဟိုးမြို့မှ ဆရာမ ၅ ဦး၊ တောင်ကြီးမြို့နယ် အေးသာယာမြို့မှ ဆရာမ ၂ ဦးနှင့် ရွှေညာင်မြို့မှ ဆရာမ ၁ ဦး စုစုပေါင်း ၉ ဦး ဆက်တိုက် ဖမ်းဆီးခံရသည်။
“လူတိုင်း ပညာသင်ကြားခွင့် ရှိသည်။ အနိမ့်ဆုံး မူလတန်း ပညာကို အခမဲ့ သင်ခွင့် ရှိသည်”။ ကမ္ဘာ့ ကုလသမဂ္ဂ အဖွဲ့ကြီးမှ ၁၉၄၈ ဒီဇင်ဘာလ ၁၀ ရက်နေ့တွင် လူသားတိုင်း ရသင့်ရထိုက်သော ခံစားထိုက်သော အခွင့်အရေး များကို လူ့အခွင့်အရေး ကြေညာ စာတမ်းအဖြစ် အတည်ပြု ကြေညာခဲ့သည်။
စစ်ကောင်စီ အနေဖြင့် ကလေး သူငယ်များ၏ ပညာ သင်ကြားပိုင်ခွင့် (Right to Education) ကို မျက်ကွယ်ပြုကာ နိုင်ငံရေး အကျိုးအမြတ်အတွက် အသုံးချရန် ကြိုးစားနေသည်။
