နယ်စပ်ကုန်သွယ်ရေး ပို့ကုန်တင်ပို့မည့် ဆီထွက်ကုန်ပစ္စည်းများကို ကြိုတင်ငွေလွှဲဝင်ပြီးမှသာ လိုင်စင်ခွင့်ပြု ထုတ်ပေးမည် ဟု စီးပွားရေးနှင့် ကူးသန်းရောင်းးဝယ်ရေး ဝန်ကြီးဌာနက ထုတ်ပြန်ကြေညာလိုက်သည်။

ဆီထွက်သီးနှံများဖြစ်သည် ပဲမျိုးစုံ၊ ပြောင်း၊ နှမ်းအမျိုးမျိုး နှင့် မြေပဲဆံများ တင်ပို့ခွင့်ကိစ္စနှင့် ပတ်သက်ပြီး ပို့ကုန်ုတန်ဖိုးအား ကြိုတင်ငွေလွှဲစနစ် Advanced Telegraphic Tranfer (TT) စနစ်ဖြင့် သာ စိစစ်ပြီး ငွေလွှဲဝင်ရောက်မှသာ လိုင်စင်ခွင့်ပြုထုတ်ပေးမည် ဟု စီးပွားရေး နှင့် ကူးသန်းရောင်းဝယ်ရေး ဝန်ကြီးဌာန က ဇူလိုင် ၁၄ရက်စွဲဖြင့် ထုတ်ပြန်ကြေညာခဲ့သည်။

ထို့ပြင် ခွင့်ပြုပေးသော လိုင်စင်များအတွက် ငွေလွှဲဝင်ရောက်မှု အထောက်အထား ((Bank Credit Advice) ရရှိမှသာ ပို့ကုန်ကြေညာလွှာ ED ဖွင့်လှစ်တင်ခွင့်ပြုဖြစ်ကြောင်းနှင့် ထိုသို့ တင်ပို့ခွင့်ကိစ္စနှင့် ပတ်သတ်၍ လိုက်နာဆောင်ရွက်ရမည်ဟုလည်း ထုတ်ပြန်ချက်တွင် ဖော်ပြထားသည်။

အဆိုပါ ကြိုတင်ငွေလွှဲစနစ်သည် ယခင်ကမရှိသလောက် နည်းပါးပြီး ထိုသို့ ကြိုတင်ငွေလွှဲစနစ်ကို အသုံးပြုမည်ဆိုလျှင် ကုန်သည်များအတွက် ငွေကြေးအခက်ခဲများစွာရင်ဆိုင်ရမည်ဖြစ်ကြောင်း မြဝတီရှိ ကုန်သည် အမျိုးသားတစ်ဦးက သျှမ်းသံတော်ဆင့်ကို ပြောသည်။

“ အခက်ခဲကတော့ မျိုးစုံပါပဲ ။ ခုလောလောဆယ် အဲ့ဖက်ကတော့ ပြောင်း ၊ နှင်းတို့က တော်တော်များများ ခက်ခဲတယ် ၊ မရောင်းရသေးခင် ပိုက်ဆံအရင်ပေးရမယ်ဆိုတော့ အဆင်ပြေဘူးလေ ၊ အဲ့ဖက်အရောင်းဝယ် ဘာညာတော့ ရပ်ထားရတယ် “ ဟု ကုန်သည် အမျိုးသားတစ်ဦးက ပြောသည်။

ဆက်လက်ပြီး နယ်စပ်ဖြတ်ကျော် ပုံမှန် ကုန်သွယ်မှု နည်းလမ်းဖြင့် အမေရိကန်ငွေကြေးအသုံးပြုရမည်ဟုလည်း စစ်ကောင်စီ လက်အောက်ခံ စီးပွားကူးသန်းက ဆိုသည်။

“ စစ်ကောင်စီ ဒေါ်လာတွေလိုနေတဲ့သဘောပဲ။ အရင်က ထိုင်းနယ်စပ်ဆိုရင် ထိုင်းဘတ်ငွေ နဲ့ ပေးဆောင်ရတယ်။ တရုတ်ဆိုရင် ယွမ်ငွေနဲ့ ပေးဆောင်ရတယ်။ အခုက ဒေါ်လာတွေနဲ့ပဲဆိုတော့ ကုန်သည်တွေက ဘာအမြတ်ကျန်မှာလဲ” ဟု ထိုင်း-မြန်မာ ကုန်သည် အမျိုးသမီး တစ်ဦးက သျှမ်းသံတော်ဆင့်ကို ပြောသည်။

အလားတူ မြန်မာ-တရုတ် နယ်စပ် နမ့်ခမ်းမြို့နှင့် မူဆယ်မြို့တွင် တင်ပို့ကုန်များဖြစ်သော တင်ပို့ကုန်ပစ္စည်းများကို တရုတ်ယွမ်ငွေအစား အမေရိကန်ဒေါ်လာငွေ ကို အသုံးပြုရန် မြန်မာ့ကုန်သွယ်ရေး ဦးစီးဌာနက ဇွန်လ (၂၀) ရက်တွင် ထုတ်ပြန်ထားပါသည်။

အဆိုပါ တင်ပို့ကုန်များဖြစ်သော ဆီထွက်ပစ္စည်းများကို အမေရိကန်ငွေကို သုံးစွဲရမည်ဟု ဇူလိုင်လ (၁) ရက်တွင် အတည်ပြုပြီးနောက် ဆန် နှင့် ဆန်ကွဲကို ယခင်အတိုင်း ယွမ်ငွေဖြင့်ဆောင်ရွက်ခွင့် ရှိကြောင်းဇူလိုင်လ (၄) ရက်တွင် အမိန်ကြော်ငြာစာများ ထွက်လာသည်ဟု မူဆယ်ဒေသခံ အမျိုးသားတစ်ဦးက ပြောသည်။

“ သူတို့ ပြီးခဲ့တဲ့လ ၂၀ ရက်နေ့က ထုတ်ပြန်ထားတယ် ။ ထပ်ပြီး ဇူလိုင်လ (၅) ရက်က ထပ်မံအသိပေး စာများ ထွက်လာတယ် ။ ဆီထွက်ပစ္စည်းများကို အမေရိကန်ဒေါ်လာ ပေးဆောင်ရမယ် ၊ဆန် နဲ့ ဆန်ကွဲကို တော့ပုံမှန် အတိုင်း တရုတ်ယွမ်ငွေနဲ့ ပြန်သုံးခွင့်ရှိတယ် “ ဟု ၎င်းကဆိုသည် ။

ထို့အပြင် စစ်ကောင်စီမှ ပို့ကုန်တင်ပို့မှု ဒေါ်လာငွေဖြင့် ပြောင်းလဲသတ်မှတ်လိုက်ပြီးနောက် တစ်ဒေါ်လာလျှင် မြန်မာကျပ်ငွေ ၁၈၅၀ကျပ် ဖြင့် သတ်မှတ်နှုန်းထားကြောင်း သိရသည်။

စစ်အာဏာသိမ်းပြီးနောက်ပိုင်း စစ်ကောင်စီလက်အောက်ခံ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန မှ စနစ်အမျိုးမျိုးပြောင်းလဲမှုကြောင့် ကုန်သည်များနှင့် တောင်သူများအခက်အခဲများစွာ ရင်ဆိုင်နေရသည်။