သျှမ်းပြည်တောင်ပိုင်း ကျေးသီးမြို့နယ် မိုင်းနောင်မြို့မှာ ဇူလိုင် (၁၄) ရက်နေ့က စစ်ကောင်စီခေါင်းဆောင် ဒုတိယ ဗိုလ်ချုပ်ကြီး ရာပြည့် နဲ့ SSPP/SSA တို့ တွေ့ဆုံဆွေးနွေးခဲ့ပြီး ဆွေးနွေးမှုမှာ မိုင်းရှူးမြို့နယ်ရှိ SSPP တပ်စခန်းများကို (၇) ရက်အတွင်း ဆုတ်ခွာရန် ပြောဆိုခဲ့ခြင်း နဲ့ ပတ်သက်ပြီး SSPP/SSA ၏ ပြောရေးဆိုခွင့်ရှိသူ ဗိုလ်မှူးဖုန်းဟန်ကို သျှမ်းသံတော်ဆင့် မှ နန်းနောင့်နောင့် က ဆက်သွယ်မေးမြန်းထား ပါတယ်။

အာဏာသိမ်း စစ်ကောင်စီတပ်ဖွဲ့သည် မိုင်းရှူးမြို့နယ်အတွင်းရှိ လွိုင်နိုင်း- မန်ဝိန်းအတွင်း လှုပ်ရှားနေတဲ့ SSPP /SSA တပ်ဖွဲ့တို့ကို ဇူလိုင်လ ၇ ရက်နေ့က သုံးကြိမ်မြောက် တပ်ဆုတ်ဖို့ ပြောဆိုခဲ့သော်လည်း လက်ရှိ အချိန်ထိ SSPP/SSA ဘက်မှ ဆုတ်ခွာခြင်းမရှိခဲ့ပေ။

မေး ။ ။ SSPP/SSA နဲ့ ဒုတိယ ဗိုလ်ချုပ်ကြီး ရာပြည့် တို့ တွေ့ဆုံဆွေးနွေးကြတယ်လို့ သိရပါတယ်။ အဲ့ဒီတွေ့ဆုံဆွေးနွေးမှုမှာ ဘာတွေဆွေးနွေးခဲ့ပါသလဲ။ ဘယ်လိုအကြောင်းအရာကို ဆွေးနွေးခဲ့ပါသလဲရှင့်။

ဖြေ ။ ။ အဓိက (၂) ချက်ပေါ့ဗျာ။ ဆွေးနွေးမှုက ပထမတစ်ချက်က မိုင်းရှူးမြို့နယ် နဲ့ မိုင်းရှူးမြို့ မြောက်ဘက်မှာရှိတဲ့ တပ်စခန်း (၃) ခုကို အရင်တုန်းက နောက်ဆုတ်ပေးဖို့ တောင်းဆိုခဲ့ဖူးတယ်။ အဲ့ဒါကို ပြန်လာမေးတဲ့ သဘောပါ။ အဲ့ဒါကို ရွှေ့နိုင်၊ မရွှေ့နိုင် နောက်ထပ် (၇) ရက် အချိန်ထပ်ပေးတယ်။ အဓိက အချက် တစ်ချက်ပေါ့ဗျာ။ နောက်တစ်ခုက တရားခံ တစ်ယောက်ကို ထောက်ပြတယ်။ အဲ့တရားခံက မူးယစ်ဆေးဝါးနဲ့ ပတ်သက်တယ်ဆိုပြီးတော့ သူတို့အကြောင်းပြတယ်။ အဲ့သူနဲ့ အရောင်းအဝယ်လုပ်တဲ့အိမ် လာပြီးတော့ လက်နဲ့ ထိုးပြမယ်ဆိုပြီးတော့ လာပြမယ်။ လာစစ်မယ်ပေါ့။ တကယ်တမ်း လာစစ်တော့ ဘာမှ မရှိဘူး။ အဲ့ဒါပါပဲ။

မေး ။ ။ မိုင်းရှူးမြို့နယ်ဘက်က တပ် (၃) နေရာ ဆုတ်ခိုင်းတဲ့အပေါ် SSPP ဘက်က ဘယ်လိုတုန့်ပြန်ခဲ့ပါသလဲရှင့်။

ဖြေ ။ ။ ကျနော်တို့က ကော်မတီ စနစ်ဖြစ်တဲ့အတွက်ကြောင့်မလို့ ဗဟိုနိုင်ငံရေး ဦးဆောင်မှုအဖွဲ့ကို ပြန်ပြီးတော့ ဆွေးနွေးမှု ပြုပြီးတော့မှပဲ အကြောင်းပြန်မယ်ဆိုပြီး ဖြေပေးခဲ့တယ်။

မေး ။ ။ တပ်နေရာ စခန်း (၃) နေရာ အပြင် သူတို့ဘက်က တခြား တောင်းဆိုတာ ရှိလားရှင့်။
ဖြေ ။ ။ မရှိပါဘူးဗျာ။ အဓိက အဲ့ဒါပါပဲ။

မေး ။ ။ တကယ်လို့ တပ်စခန်း (၃) နေရာကို မဆုတ်ခွာပေးဘူးဆိုရင် ဘာတွေ ဆက်ဖြစ်လာနိုင်မလဲရှင့်။
ဖြေ ။ ။ တင်းမာမှုက ဘယ်လိုဖြစ်လာမလဲဆိုတာ ပြောလို့မရသေးဘူး။ ကျနော်တို့ ဆုတ်ခိုင်းတာ မဟုတ်တဲ့အတွက် တင်းမာမှုက သူတို့ဘက်ပဲ မူတည်တယ်။

မေး ။ ။ နှစ်ဖက် တပ်ဖွဲ့က စစ်ရေးတင်းမာနေတဲ့ အခြေနေမှာ ပြည်သူတွေကလဲ တိုက်ပွဲဖြစ်ပွားမှာကို စိုးရိမ်နေကြတယ်။ SSPP အနေနဲ့ ဘယ်လို မှတ်ချက်ပြုချင်ပါသလဲရှင့်။

ဖြေ ။ ။ တိုက်ပွဲဆိုတာ နှစ်ပေါင်း (၇၀) ကျော် ဖြစ်လာခဲ့ပြီပဲ။ တော်လှန်ရေးကာလက (၇၀) ကျော်လာခဲ့ပြီ။ ပြည်သူ လူထုက စစ်ဖြစ်မလား မဖြစ်ဘူးလားဆိုတာ အရိပ်အကင်း မပြောလဲ သိပါတယ်။ မဖြစ်ဖို့လဲ ကျနော်တို့ အတတ်နိုင်ဆုံး ထိန်းသိမ်းထားတယ်။ ခုချိန်က ကိုဗစ် ကာလရယ် တစ်နိုင်ငံလုံး တိုက်ပွဲရယ် လာတိုးနေတဲ့ ကပ်ကြီး သုံးပါးလို ဖြစ်နေတယ်။ ဒါမယ့် ဘာပဲဖြစ်လာဖြစ်လာ ပြည်သူလူထု နစ်နာမှုမရှိအောင်တော့ အတတ်နိုင်ဆုံး လုပ်နေတာဖြစ်တယ်။ ကူညီပံ့ပိုးမှု ကျနော်တို့ တစ်လျှောက်လုံး လုပ်လာတယ်။ ကျနော်တို့ နဲ့ ပြည်သူတို့နဲ့ တစ်သားတည်း ဖြစ်နေတယ်ဆိုတဲ့ဟာ ကျနော်တို့ ဒုက္ခဆိုရင်လည်း ပြည်သူလူထုရဲ့ ဒုက္ခပဲ ပြည်သူလူထု ဒုက္ခဆို ကျနော်တို့ ဒုက္ခလို့ မှတ်ယူတယ်။ အဲ့ဒါပါပဲ တစ်ထပ်တည်းကျတယ်လို့ ပြောလိုပါတယ်။

မေး ။ ။ ဇူလိုင် (၁၄) ရက် မနေ့က ဆွေးနွေးပွဲမှာ ဘယ်သူတွေ တက်ရောက်ခဲ့ပါသလဲရှင့်။

ဖြေ ။ ။ ကျနော်တို့ဘက်ကတော့ ဒုဥက္ကဌ (၁)၊ (၂) စဝ်ခေးတိုင်း ရယ် စဝ်ခွန်ဆိုင် ဦးဆောင်ပြီးတော့ (၆) ယောက်တက်ပါတယ်။ စစ်ကောင်စီဘက်ကတော့ ဗိုလ်ချုပ်ကြီး ရာပြည့် ဦးဆောင်ပြီးတော့ တိုင်းချုပ် တိုင်းမှူး စတဲ့ နေပြည်တော် က ဗိုလ်ချုပ်ကြီးတွေ သူတို့ဘက်ကတော့ (၇) ယောက်လောက်တက်တယ်။

အခုလို အချိန်ပေး ဖြေကြားပေးတဲ့အတွက် ကျေးဇူးတင်ပါတယ်ရှင့်။