သျှမ်းပြည်တောင်ပိုင်း မိုင်းနောင်မြို့တွင် ပြုလုပ်သည့် အာဏာသိမ်း စစ်ကောင်စီတပ်ဖွဲ့နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA တပ်ဖွဲ့တို့ တွေ့ဆုံဆွေးနွေးမှုတွင် SSPP တပ်စခန်းနေရာများကို ၇ ရက်အတွင်း ဆုတ်ခွာရန် ပြောဆိုခဲ့ကြောင်း သတင်းသိရသည်။
ယမန်နေ့ ဇူလိုင်လ ၁၄ ရက်နေ့ မိုင်းနောင်မြို့တွင် စစ်ကောင်စီခေါင်းဆောင် ဒုတိယ ဗိုလ်ချုပ်ကြီး ရာပြည့် နှင့် SSPP/SSA ဒုတိယ ဥက္ကဌ -၂ ဗိုလ်ချုပ်ခွန်ဆိုင် ခေါင်းဆောင်ပြီး ဆွေးနွေးခဲ့စဥ်တွင် ပြောကြားခဲ့ကြောင်း SSPP /SSA ၏ ပြောရေးဆိုခွင့်ရှိသူ ဗိုလ်မှူးဖုန်းဟန်က သျှမ်းသံတော်ဆင့်ကို ပြောသည်။
“အဓိက ပထမတစ်ချက်က မိုင်းရှူးမြို့နယ်နဲ့ မိုင်းရှူးမြို့မြောက်ဘက်မှာ ရှိတဲ့ ကျနော်တို့ တပ်စခန်းနေရာ သုံးခုကို သူတို့က ဆုတ်ခိုင်းတဲ့ ကိစ္စပေါ့၊ ကျနော်တို့က ဆုတ်နိုင်မဆုတ်နိုင် ဆိုတာကို နောက်ထပ် ၇ ရက် အချိန်ထပ်ပေးပြီး အကြောင်းပြန်ခိုင်းတယ်” ဟု ဗိုလ်မှူးဖုန်းဟန်က ပြောသည်။
လက်ရှိတွင် စစ်ကောင်စီတို့၏ ပြောဆိုချက်များကို SSPP/SSA တာဝန်ရှိ ဗဟိုနိုင်ငံရေး ဦးဆောင်မှု ကော်မတီများ ဆွေးနွေးပြီးမှသာ အကြောင်းပြန်နိုင်ကြောင်းလည်း ဗိုလ်မှူးဖုန်းဟန်က ဆက်လက် ပြောဆိုထားသည်။
စစ်ကောင်စီပြောဆိုချက်အတိုင်း တပ်စခန်းနေရာများ ဆုတ်ခွာမှု မရှိပါက စစ်ရေးတင်းမာမှုအခြေအနေ များလည်း စစ်ကောင်စီတို့အပေါ် မူတည်ကြောင်း ဗိုလ်မှူးဖုန်းဟန်က ပြောသည်။
“တပ်စခန်းနေရာတွေကို ဆုတ်ခွာဖို့ ပြောတာ ကျနော်တို့ တပ်ဖွဲ့မဟုတ်တဲ့ အတွက် စစ်ရေးတင်းမာမှု အခြေအနေတွေ ဘယ်လိုဆက်ဖြစ်လာမလဲဆိုတာက သူတို့အပေါ်မှာပဲ မူတည်ပါတယ်၊ ကျနော်တို့အနေနဲ့လည်း တိုက်ပွဲမဖြစ်အောင် ပြည်သူထူထုထိခိုက်နစ်နာမှုမဖြစ်အောင် ထိန်းသိမ်းလုပ်ဆောင်နေတာဖြစ်တယ်” ဟု ၎င်းက ပြောသည်။
ယမန်နေ့ တွေ့ဆုံပွဲတွင် SSPP/SSA ဘက်မှ ဒုတိယ ဥက္ကဌ-၂ ဗိုလ်ချုပ် ခွန်ဆိုင် ခေါင်းဆောင်သည့် အဖွဲ့သား ၆ ဦးနှင့် ဒုတိယ ဗိုလ်ချုပ်ကြီး ရာပြည့်ဦးဆောင်သည့် စစ်ကောင်စီဘက်မှ အဖွဲ့သား ၇ ဦးတို့ တွေ့ဆုံ ဆွေးနွေးခဲ့ခြင်းဖြစ်ကြောင်း သိရသည်။
အာဏာသိမ်းစစ်ကောင်စီတပ်ဖွဲ့သည် မိုင်းရှူးမြို့နယ်အတွင်းရှိ လွိုင်နိုင်း- မန်ဝိန်းအတွင်း လှုပ်ရှားနေသည့် SSPP တပ်ဖွဲ့တို့ကို ဇူလိုင်လ ၇ ရက်နေ့တွင် သုံးကြိမ်မြောက် တပ်ဆုတ်ဖို့ ပြောဆိုခဲ့သော်လည်း လက်ရှိ အချိန်ထိ SSPP/SSA ဘက်မှ ဆုတ်ခွာခြင်းမရှိဘဲ စစ်ရေးတင်းမာနေကြသည်။
