ဧပြီလ ၁ ရက်နေ့ကကျင်းပခဲ့တဲ့ ကြားဖြတ်ရွေးကောက်ပွဲမှာ သျှမ်းလူထုကိုယ်စားပြုသျှမ်းပါတီကြီး ၂ ခု ကျားဖြူပါတီ SNDP နဲ့ ကျားခေါင်းပါတီ SNLD တို့ဟာ သျှမ်းပြည်တွင်းလစ်လပ်နေတဲ့ မဲဆန္ဒနယ် ၈ ခုအနက် ၇ ခုမှဝင်ရောက်ယှဉ်ပြိုင်ခဲ့ပါတယ်။ ကျေးသီး၊ မိုင်းရှူးမှာ ကျားခေါင်းပါတီ SNLD က 6 နေရာနဲ့ အပြတ်အသတ် အနိုင်ရခဲ့ပေမယ့် ကျားဖြူပါတီက တနေရာမှ အနိုင်မရခဲ့ပါဘူး။ ကျိုင်းတုံမြို့နယ်က မဲဆန္ဒနယ်မှာ ဝင်ရောက်ယှဉ်တဲ့ သျှမ်းပါတီ နှစ်ခုလုံးက ရှုံးနိမ့်ခဲ့ပါတယ်။ အဲဒီအပေါ် ကျားဖြူပါတီကနေ ဝင်ရောက်ယှဉ်ပြိုင်တဲ့ ဒေါက်တာ စိုင်းယွက်ဟောင်ကို သျှမ်းသံတော်ဆင့်က စိုင်းယွက်ခမ်းက ဆက်သွယ်မေးမြန်းထားပါတယ်။

မေး။ ။ ဘာကြောင့် ကျိုင်းတုံမြို့ကြားဖြတ်ရွေးကောက်ပွဲမှာ သျှမ်းပါတီမအောင်နိုင်တာလဲ။

ဖြေ။ ။ ကျိုင်းတုံမှာ မဲပေးခွင့်ရှိတဲ့ စစ်တပ် ၉ တပ်ရှိတယ်။ ဒါ့အပြင် အစိုးရဝန်ထမ်း တွေလည်း ရှိတယ်။ တောင်ပေါ် ၅ အုပ်စုဖြစ်တဲ့ နမ့်အင်းအုပ်စု ၊ နမ့်ခတ်အုပ်စု ၊ နောင်တောင်းအုပ်စု၊ နားပေါ် အုပ်စု၊ မိုင်းအင်းအုပ်စု တွေမှာ ကြံ့ခိုင်ရေးအင်အားတွေချည်းဘဲ။ ရွေးကောက်ပွဲမတိုင် ခင်ကတည်း က ကြံ့ခိုင်ရေးအသင်းကနေ လမ်းတွေ တံတားတွေသွားလုပ်ထားပေးတယ်။ မီးတွေရအောင် လုပ် ပေးတယ် – စတာတွေကြားရတယ်။ နောက်တခုရှုံးနိမ့်ရခြင်းအကြောင်းရင်းက မဲဆန္ဒလာပေးတဲ့သူ ၄၀ ရာခိုင်နှုန်းဘဲရှိတယ်။ ဒါကြောင့်ခုနပြောတဲ့တောင်ပေါ်အုပ်စုတွေ စစ်တပ်တွေနဲ့ အစိုးရဝန်ထမ်း တွေကဘဲ တဝက်ကျော်ရှိနေပြီ။ ဒါ့အပြင် ကြိုတင်မဲနဲ့ထပ်ပေါင်းလိုက်တော့ ကျနော်တို့ရှုံးရ တာဖြစ်ပါတယ်။

မေး။ ။ အခုလိုရှုံးနိမ့်သွားတော့ နောက်နောင်အကြိမ်မှာ သျှမ်းပါတီ ထပ်မရှုံးနိမ့်အောင် ဘယ်လိုလုပ်ရမလဲ။

ဖြေ။ ။ ကျနော်တို့ကျားဖြူပါတီအနေနဲ့ကတော့ နိုင်နိုင်ရှုံးရှုံး သိပ်ပြီးပြသနာမရှိဘူး။ တောင်သူလယ်သမားများအသင်းဆိုပြီးဖွဲ့ထားတာရှိတယ်။ ဒီအသင်းအဖွဲ့က ခိုင်မြဲမှုရရှိတယ် ဆိုရင်တော့ လာမယ့် ၂၀၂၀ ရွေးကောက်ပွဲမှာကျနော်တို့ပါတီ အနိုင်ရနိုင်မှာပါ။

မေး။ ။အခုလိုရှုံးနိမ့်သွားတဲ့အပေါ် SNDP ကနေလူထုကိုဘယ်လို ပြောပြချင်ပါသလဲ။

ဖြေ။ ။ ကျနော်တို့သျှမ်းပြည်လူထု နားမယောင်ပါနဲ့။ မယုံလွယ်ပါနဲ့။ ကျိုင်းတုံမှာ သျှမ်းလူဦးရေကပိုများပါတယ်။ သို့ပေမယ့် ကျနော်တို့သျှမ်းက မတည့်ကြဘူး။ ၂ ဂိုဏ်း ၅ ဂိုဏ်းကွဲနေတယ်။ အဲလိုကွဲနေသမျှကာလပတ်လုံး ကျနော်တို့သျှမ်းပါတီ ဘယ်တော့မှနိုင်မှာ မဟုတ်ဘူး။ ကျိုင်းတုံမှာ သျှမ်းလူဦးရေ ၇ သောင်းကျော်ရှိပါတယ်။ ၃၈ ရာခိုင်နှုန်းပေါ့။ အခုရွေးကောက်ပွဲမှာ မဲပေးခွင့်ရှိသူက ၂ သောင်းကျော်ရှိတယ်။ ဒါပေမယ့်ဘယ်လောက် ဘဲမဲလာထည့်မလဲ။ တဝက်တောင်မရှိဘူးထင်တယ်။ ဆိုတော့တကယ်လို့ နောက်နောင်ကျရင်လည်း ပါတီတွေကလည်း နေရာခွဲပြီးဝင်ပြိုင်ကြရအောင် လို့သဘောတူညီမှုရခဲ့မယ်ဆိုရင် ကျနော်တို့ အောင်နိုင်မှာပါ။

မေး။ ။ရှေ့ဆက်မှာကော ကျားဖြူပါတီအနေနဲ့ ဘာဆက်လုပ်မယ်လို့စိတ်ကူးထားလဲ။

ဖြေ။ ။ သျှမ်းအချင်းချင်း မတည့်တာ။ ကျားချင်းကျားကိုက်တာ ရှိနေသရွေ့ ရွေးကောက်ပွဲ အောင်မှာမဟုတ်ဘူး။ ၂၀၂၀ မှာ ကျနော်တို့အောင်နိုင်ရေးအတွက် နေရာခွဲပြီး ရွေးကောက် ပွဲဝင်ရအောင်။ ကျားဖြူဝင်ပြိုင်မယ့်နေရာမှာ ကျားခေါင်းမဝင်နဲ့ ။ ကျားခေါင်းဝင်မယ့် နေရာ မှာကျားဖြူမဝင်နဲ့ ။ အဲလိုဆိုရင်တော့ မဲတွေဟာ ကျနော်တို့ သျှမ်းပါတီဆီကိုဘဲ ဝင်လာမှာမလွဲဘူး။ အဲဒီလိုလုပ်နိုင်ဖို့ ဆွေးနွေးကြဖို့ ကျနော်တို့ စီစဉ်ထားပါတယ်။

ကျိုင်းတုံမြို့က လစ်လပ်တဲ့ ပြည်နယ် ၂ ကိုယ်စားလှယ်နေရာမှာ သျှမ်းပါတီ ၂ ခုစလုံး အနိုင်မရ ခဲ့ပါဘူး။ ၂၀၁၅ တုန်းကလည်းအနိုင်ရရှိထားတဲ့ ပြည်ထောင်စုကြံ့ခိုင်ရေးနှင့်ဖွံ့ဖြိုး ရေးပါတီ USDP ကဘဲ ဆက်လက်အနိုင်ရရှိခဲ့ပါတယ်။ ကြားဖြတ်ရွေးကောက်ပွဲမှာ တပြည်လုံး လစ်လပ်မဲဆန္ဒနယ် ၁၉ နေရာရှိရာမှာ သျှမ်းပြည်တွင်း မှာဘဲ ၈ နေရာရှိပါတယ်။ အဲဒီ ၈ နေရာမှာ ကျားခေါင်းပါတီက တော့ အပြတ်အသတ် နဲ့ ၆ နေရာ အနိုင်ရခဲ့တာဖြစ်ပါတယ်။