သျှမ်းပြည် မြောက်ပိုင်း မိုးမိတ်မြို့နယ်အတွင်းတွင် အာဏာသိမ်းစစ်ကောင်စီ နှင့် KIA ပူးပေါင်းတပ်ဖွဲ့တို့မှ တိုက်ပွဲ ထပ်မံဖြစ်ပွားပြီး စစ်ကောင်စီဘက်မှ ထိခိုက်ကျဆုံးမှုများ ရှိကြောင်း သတင်းသိရသည်။
ယမန်နေ့ (ဇူလိုင် ၁၃) ရက် နေ့လည်ပိုင်း ၁၂ ခွဲဝန်းကျင် တွင် စစ်ကောင်စီတပ်ပေါင်းစုဖြစ်သည့် ခလရ တပ် ၂၇၆ ၊ ၃၄၈ နှင့် ခမရ ၂၂၃ တပ်အနီးတွင် ဗုံးတစ်လုံး ပေါက်ကွဲမှုဖြစ်ပွားပြီးနောက် ဟော်နန်းရပ်ကွက်ရှိ ရဲစခန်းတွင်လည်း ဗုံးတစ်လုံး ထပ်မံပေါက်ကွဲခဲ့ကြောင်း အသက် ၅၀ ဝန်းကျင် မိုးမိတ်မြို့ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ဖက်တောကျေးရွာဘက်မှာ တပ်စွဲထားတဲ့ စစ်ကောင်စီတပ်စခန်းအနီး ဗုံးတစ်လုံးပေါက်ကွဲတယ်၊ ပြီးတော့ ဟော်နန်းရပ်ကွက်ဘက်မှာလည်း နောက်ထပ် ဗုံးတစ်လုံးထပ်ကွဲတယ်၊ စစ်ကောင်စီဘက်က ထိခိုက်သေဆုံးမှု တွေရှိတယ်၊ အရေအတွက်တော့ မသိရသေးဘူး” ဟု အထက်ပါ ဒေသခံက ပြောသည်။
ထို့အပြင် ညနေပိုင်း ၅ နာရီ မိနစ် ၂၀ ဝန်းကျင်မှာလည်း KIA နှင့် PDF တပ်ပေါင်းစုတို့မှ စစ်ကောင်စီ တပ်စခန်း ရှိသည့် ဆိုင်းလျန်ကျေးရွာ (သဲနီကျေးရွာ) သို့ လက်နက်ကြီးဖြင့် ပစ်ခတ်တိုက်ခိုက်ခဲ့ကြောင်း သတင်းသိရသည်။
“ညနေ ၅ နာရီကျော်မှာ KIA နဲ့ PDF ပူးပေါင်းတပ်ဖွဲ့က တပ်စခန်းနေရာကို လက်နက်ကြီးနဲ့ ၁၀ လုံးကျော် လှမ်းပစ်တယ်၊ စစ်ကောင်စီဘက်က ၂ လုံးပြန်ပစ်တယ်၊ ဆိုင်းလျန်ရွာမှာ စခန်းချထားတဲ့ စကစတပ်က ခမရ ၂၇၆ နဲ့ ၃၄၈ ဖြစ်တယ်၊ အဲ့တိုက်ပွဲက ၁၅ မိနစ်လောက်ကျော်တယ်၊ ပြီးတော့ စစ်ကောင်စီ ၁ ဦးသေတယ်” ဟု အထက်ပါ ဒေသခံက ဆက်လက်ပြောသည်။
ယင်းတိုက်ပွဲဖြစ်ပွားပြီးသည့်နောက်တွင် စစ်ကောင်စီတပ်သားတို့သည် မိုးမိတ်မြို့နယ်အတွင်းရှိ မြို့ဝင်မြို့ထွက် စစ်ဆေးရေးဂိတ်များနှင့် ညောင်ပင်စောက်ကျေးရွာမှ စစ်ကောင်စီ အစောင့်တပ်သားများက လမ်းသွားလမ်းလာ ပြည်သူများ၏ ဖုန်းနှင့် အိတ်ကပ်အတွင်းအပြင်တို့ကို လူကြီးလူငယ် ကျား/မ မရွေး စစ်ဆေးမှုများပြုလုပ်ခဲ့ကြောင်း သိရသည်။
ဇူလိုင်လဆန်းပိုင်းမှ စတင်ကာ မိုးမိတ်မြို့နယ်အတွင်းတွင် ပစ်ခတ် တိုက်ခိုက်သံများ နေ့စဥ်နီးပါး ကြားနေရပြီး အများစုလည်း စစ်ကောင်စီတပ်စခန်းနှင့် ရဲစခန်းအနီးပတ်ဝန်းကျင် အနီးတစ်ဝိုက်တွင် ဖြစ်ပွားလေ့ရှိကြောင်းလည်း သိရသည်။
ပြီးခဲ့သည့် ဇူလိုင် ၁ ရက်တွင်လည်း အာဏာသိမ်း စစ်ကောင်စီ နှင့် ရှမ်းပြည်တိုးတက်ရေးပါတီ / ရှမ်းပြည်တပ်မတော် (SSPP/SSA) တပ်ဖွဲ့ နှင့် တိုက်ပွဲဖြစ်ပွားပြီး စစ်ကောင်စီဘက်မှ ၃ ဦးသေ ၅ ဦးဒဏ်ရာရှိခဲ့ကြောင်း သိရသည်။
