သျှမ်းတောင် ကလောမြို့တွင်နေထိုင်ပြီး Kaung For You ကျောင်းတွင် စာသင်နေသည့် ဆရာမတစ်ဦးကို ယနေ့ (ဇူလိုင် ၁၃)ရက် နေ့လည် ၁၂နာရီဝန်းကျင်တွင် စစ်ကောင်စီမှ ဖမ်းဆီးခံရကြောင်းစုံစမ်းသိရသည်။

Kaung For You ကျောင်းအုပ်ကြီး ဆရာကောင်းအဖမ်းခံရသည့် သတင်းထွက်ပေါ်ပြီးနောက် ကလောမြို့တွင်နေထိုင်ပြီး Kaung For You ကျောင်းက ဆရာမ တစ်ဦး စာသင်နေချိန် ၌ စစ်ကောင်စီမှ ဖမ်းဆီးသွားကြောင်း မျက်မြင်တွေ့ရှိသည့် ကလောဒေသခံ တစ်ဦးက သျှမ်းသံတော်ဆင့်ကို ပြောသည်။

“ စာသင်နေရင် အဖမ်းခံလိုက်ရတာပါ။ လိပ်စာ တိတိကျကျနဲ့လာဖမ်းသွားတာ။ နေ့လည် ၁၂နာရီလောက်ဖြစ်မယ်။ အရပ်ဝတ်နဲ့ လူ ၈ယောက်၊ ၉ယောက်လောက်လာဖမ်းသွားတယ်” ဟု မျက်မြင်တွေ့ရှိသူ က ဆိုသည်။

အဆိုပါ အရပ်ဝတ်ဖြင့်လာသည့် လူများသည် ဧည့်စာရင်းစစ်မည်ဟုပြောဆိုပြီး ဆရာမကို ဖမ်းဆီးသွားခြင်းဖြစ်ကြောင်း၊ ဖမ်းသွားချိန်တွင်လည်း ဖုန်းနှင့်ကွန်ပျူတာများလည်း သိမ်းသွားကြောင်း သိရသည်။

ထို့ကြောင့် ဆရာမနှင့် ကျောင်းကိစ္စ ပြောဆိုထားသည့်သူများလည်း ရှောင်ပေးကြရန် ကလော ဒေသခံများက ပြောသည်။

“ အခုက ဆရာကောင်းရောဖမ်းခံရတယ်ဆိုတဲ့သတင်းထွက်တယ်။ ကလောကဆရာမရောဖမ်းခံရတယ်။ နောက် ကျောင်းသူတယောက်လည်း ဖမ်းသွားတယ်ဆိုတာလည်းကြားတယ်။ စာသင်တာတောင် ပြစ်မှု တခုလိုပဲ။ စိတ်ပူစရာပဲ” ဟု သျှမ်းတောင် တွင်နေထိုင်သည့် အမျိုးသမီး တစ်ဦးက ပြောဆိုလိုက်သည်။

ယနေ့ နံနက်ပိုင်းတွင်လည်း Kaung For You ကျောင်းအုပ်ဆရာကောင်း ဖမ်းခံရသည့် သတင်းထွက်ပေါ်ခဲ့သော်လည်း Kaung For You ကျောင်းမှ အတည်မပြုနိုင်သေးပေ။

စစ်ကောင်စီ ၏လက်ပါးစေ များမှ Kaung For You Education မှ အသက်မပြည့်သေးသည့် ကျောင်းသား၊ကျောင်းသူများ ၊ ဆရာ၊ဆရာမ များကို ခြိမ်းခြောက်မှုများအပြင် နေအိမ်များသို့ စာသင်နေချိန် အတွင်း လာရောက်ဖမ်းဆီးသည့်အပေါ် အလွန်စိတ်ပျက်မိကြောင်း Kaung For You ဗဟိုအလုပ်အမှုဆောင် အဖွဲ့က ယနေ့ (ဇူလိုင် ၁၃)ရက်တွင် ထုတ်ပြန်လိုက်သည်။