Sunday, February 5, 2023

မူဆယ် အမှတ် (၂) အထက်တန်းကျောင်း ဗုံးပေါက်ကွဲ

Must read

သျှမ်ပြည်မြောက်ပိုင်း မူဆယ်မြို့ ဟိုမွန်ရပ်ကွက် အမှတ် (၂) အထက်တန်းကျောင်းတွင် ယနေ့ (ဇူလိုင် ၁၃) ရက် နံနက် ၈ နာရီခွဲဝန်းကျင်၌ ဗုံးတစ်လုံးပေါက်ကွဲခဲ့ကြောင်း စုံစမ်းသိရသည်။

ဗုံးပေါက်ကွဲတဲ့ကျောင်း

မူဆယ်မြို့ ဟိုမွန်ရပ်ကွက် အထက အမှတ် (၂) အထက်တန်းကျောင်းတွင်ရှိသည့် ဘောလုံးကွင်းထဲ၌ ဗုံး (၃) လုံးရှိရာ ထိုထဲမှ ဗုံး (၁) လုံး ပေါက်ကွဲသွားကြောင်း သိရသည်။

လူသွားလမ်း ပလက်ဖောင်း ဘောလုံးကွင်းထဲတွင် အမဲအိတ်တစ်ထုပ်ကို တွေ့ရှိကာ မသင်္ကာသဖြင့် သက်ဆိုင်ရာကို ခေါ်စစ်ဆေးစေခဲ့ပြီးနောက် ဗုံးတစ်လုံးပေါက်ကွဲသွားကြောင်း အသက် (၃၅)နှစ်အရွယ်ရှိ မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“အထက အမှတ် (၂) ကျောင်းရဲ့အနောက် ဘောလုံးကွင်းထဲမှာ ပေါက်တာ ၊ လမ်းသွားလျောက်တဲ့ တစ်ယောက်က တွေ့ပြီး သူက မသင်္ကာလို့ သက်ဆိုင်ရာကို ခေါ်လိုက်တာ၊ သူတို့လုပ်ပေးပြီး ဗုံးကပေါက်သွားတာ ၊ ကျန်တဲ့ နောက်ထပ် ဗုံးနှစ်လုံးကို တော့ မသိရသေးဘူး “ဟု ၎င်းကပြောသည်။

အဆိုပါ ဗုံးပေါက်ကွဲမှုကြောင့် ထိခိုက်ဒဏ်ရာ ရရှိသူမရှိကြောင်း၊ သို့သော် ကျောင်းကို ပိတ်လိုက်ရကြောင်း သိရသည်။

“ကလေးတွေလည်း မိဘတွေပြန်လာခေါ်သွားပြီ။ ကျောင်းပိတ်လိုက်ရတယ်။ ထိခိုက်မှုကတော့ မရှိဘူး” ဟု မူဆယ်ဒေသခံ အမျိုးသမီးတစ်ဦးက ပြောသည်။
ကျောင်းဝန်းအတွင်း ဗုံးပေါက်ကွဲမှုနှင့်ပတ်သက်ပြီး မိဘများက ကလေးငယ်များကျောင်းပို့ရမည်ကို စိုးရိမ်နေကြောင်း၊ ကျောင်းစာသင်ခန်း အနီး ယခုကဲ့သို့ ပြုလုပ်သည့်အပေါ်လည်း မူဆယ်ပြည်သူများက ကန့်ကွက်ရှုတ်ချကြောင်း ပြောဆိုလိုက်သည်။

“ ကလေးတွေ စာသင်တဲ့နေရာကိုတော့ အဲ့လိုမလုပ်သင့်ဘူး။ ဘယ်အဖွဲ့ပဲလုပ်လုပ် ကျမအနေနဲ့ကတော့ ကလေးစာသင်ကျောင်းမှာတော့ မလုပ်စေချင်ဘူး။ ပြည်သူတွေသွားလာနေတဲ့နေရာတွေမလုပ်စေချင်ဘူး” ဟု ကျောင်းသားတစ်ဦး၏ မိခင် က သျှမ်းသံတော်ဆင့်ကို ပြောသည်။

မြန်မာနိုင်ငံတွင် စစ်အာဏာသိမ်းပြီး တနှစ်ကျော်အတွင်း ပြည်သူများ၊ ကလေးငယ်များရှိသည့်နေရာကို မရှောင်ဘဲ ဗုံးပေါက်ကွဲမှုများ ဆက်တိုက်ပြုလုပ်လာကြသည်။

မူဆယ်မြို့ အမှတ်(၂) အထက်တန်းကျောင်းအနီး မည်သည့် တပ်ဖွဲ့မှ ဗုံးလာရောက်ထောင်သည်ကို မသိရှိရသေးပေ။

ဗုံးပေါက်ကွဲပြီးနောက်ပိုင်း မူဆယ်မြို့ ကံ့ကော်လမ်းတွင် ရဲနှင့်စစ်သားများ တင်းကြပ်စွာစစ်ဆေးနေပြီး မူဆယ်မြို့ရှိ ကားများနှင့် ဆိုင်ကယ်များကို လည်းစစ်ဆေးနေကြောင်းလည်း သိရသည်။

စစ်ကောင်စီ အနေဖြင့် ကလေး သူငယ်များ၏ ပညာသင်ကြားပိုင်ခွင့် (Right to Education) ကို မျက်ကွယ်ပြုကာ နိုင်ငံရေး အကျိုးအမြတ်အတွက် အသုံးချရန် ကြိုးစားနေကြောင်း စစ်အုပ်စု ဖွင့်လှစ်မည့် စာသင်ကျောင်းများ အပေါ် အကြမ်းဖက် စစ်အုပ်စု တပ်ဖွဲ့ဝင်များ ကိုယ်တိုင် အကြမ်းဖက် တိုက်ခိုက်နိုင်သည် ဟူသည့် ဖြစ်နိုင်ချေကို ပေါ့ပေါ့တန်တန် မမှတ်ယူ အပ်ကြောင်း တော်လှန်ရေး အင်အားစုများ အနေဖြင့် စစ်ဘက်ဆိုင်ရာ ကျင့်ဝတ်များကို တင်းကျပ်စွာ လေးစား လိုက်နာကြရန်အတွက် တိုက်တွန်းကြောင်း စာသင်ကျောင်းများကို တိုက်ခိုက်ခြင်းအား မည်သည့်ဘက်၊ မည်သည့် အစုအဖွဲ့က တိုက်ခိုက်သည် ဖြစ်စေ လုံးဝ လက်ခံမည် မဟုတ်ဘဲ ရှုတ်ချမည် ဖြစ်ကြောင်း အမျိုးသား ညီညွတ်ရေး အစိုးရ (NUG) ၏ ပညာရေး ဝန်ကြီးဌာနက ဇွန်လ ၃ ရက်နေ့တွင် ထုတ်ပြန်သည်။

Leave a Comments

- Advertisement -spot_img

Latest article