သျှမ်းပြည်မြောက်ပိုင်း ကျောက်မဲမြို့နယ်အတွင်း တပိုင်တနိုင် မျှစ်ရှာရောင်းသူများကို လက်နက်ကိုင် တပ်ဖွဲ့က အခွန်ဆောင်ရမည်ဟု ခြိမ်းခြောက်ခဲ့ကြောင်း စုံစမ်းသိရသည်။

ဇွန်လ အတွင်းမှ စပြီး တောထဲတွင် အလေ့ကျပေါက်နေသည့် မျှစ်ပေါက်ချိန်ဖြစ်ပြီး ကျောက်မဲမြို့နယ်အတွင်းရှိ ကျေးရွာထဲတွင် မျှစ်ရှာရောင်းသူများကို လက်နက်ကိုင်တပ်ဖွဲ့က ငွေတောင်းမည်ဟု ခြိမ်းခြောက်ခဲ့ကြောင်း သိရသည်။

“ကျနော်တို့ ကျောက်မဲမြို့နယ်ထဲမှာဆိုရင် တစ်ချို့က မျှစ်ရှာရောင်းကြတယ်။ မျှစ်သွားရှာတဲ့သူတွေက တောထဲကပြန်လာပြီး လက်နက်ကိုင်တပ်ဖွဲ့တွေက နောက်တစ်ခါလာရှာရင် အခွန်ပေးရမယ်ပြောတယ်။ တစ်ချို့က ၅ သောင်းပေးရမယ်တဲ့။ တစ်ချို့ကလည်း ၅သောင်း ၅ ထောင်ပေးရမယ်လို့ပြောတယ်” ဟု အသက် ၂၃ နှစ်အရွယ်ရှိ ကျောက်မဲမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ယခင်တွင် မျှစ်ကို လွတ်လပ်စွာ ရှာဖွေရောင်းစားနိုင်ခဲ့သော်လည်း လက်ရှိမှာ တပိုင်တနိုင်ရှာဖွေသူများအတွက် အခက်အခဲများစွာ ဖြစ်ကြောင်းသိရသည်။

ထို့အပြင် ကျောက်မဲမြို့နယ်အတွင်း စစ်ရေး ပဋိပက္ခဖြစ်ပွားသည့် နေရာဒေသဖြစ်သည့်အတွက် တောထဲတွင် မျှစ်သွားရှာသည့်အခါ မကြာခဏ မြေမြှုပ်မိုင်းများ နင်းမိပြီး အသက်ဆုံးရှုံးမှုရှိကြောင်း ဒေသခံများပြောပြချက်အရ သိရသည်။

“ တကယ်လို့ ကျနော်တို့ ဒီလိုအချိန်မှာ မျှစ်မရှာရရင်တော့ စားဝတ်နေရေးအတွက် တကယ်ခက်ခဲတယ်။ မျှစ်ရှာပြီးသွားရောင်းရင်လည်း ပိုက်ဆံအများရတယ်။ နေ့စားသွားရင် ၅ ထောင်ပဲရတာ။ ပြီးတော့ အရင်ကဆို လွတ်လပ်သွားရှာလို့ရတယ်။ အခုက အဲ့လိုမဟုတ်တော့ဘူး။တောထဲမှာမြေမြှုပ်မိုင်းကိုလည်း ကြောက်ရတယ်လေ” ဟု မြစ်သွားရှာသည့် ဒေသခံတစ်ဦးက ပြောသည်။

လက်ရှိ ကျောက်မဲမြို့နယ်ထဲတွင် စစ်ကောင်စီအပြင် တိုင်းရင်းသားလက်နက်ကိုင်တပ်ဖွဲ့များ သွားလာလှုပ်ရှားနေသည့် ဒေသဖြစ်သည်။

မျှစ်ရှာရောင်းသည့် ပြည်သူများအနေမှ လွတ်လပ်စွာမျှစ်ပြန်ရှာခွင့်ပေးရန်အတွက် လက်နက်ကိုင်တပ်ဖွဲ့များကို တောင်းဆိုလိုက်သည်။