သျှမ်းပြည်တောင်ပိုင်း မိုးနဲမြို့နယ် ကျေးရွာဒေသများထဲတွင် စစ်ကောင်စီလက်အောက်ခံ မြို့နယ်စီမံအုပ်ချုပ်ရေးကောင်စီ က ပြည်သူ့ကာကွယ်ရေးဟု ဆိုကာ လူထု စာရင်းကောက်ယူနေလျက်ရှိကြောင်း သိရသည်။
မိုးနဲမြို့နယ်တွင် ယခုလမှစတင်ပြီး ပြည်သူ့ကာကွယ်ရေး နှင့် ပြည်သူ့ကျန်းမာရေး ကြက်ခြေနီအဖွဲ့များဟုဆိုကာ လူထုနာမည်စာရင်းကောက်ထားပြီး အဖွဲ့ ဖွဲ့စည်းထားခိုင်းကြောင်း သိရသည်။
“မြို့ထဲမှာတော့ ကျနော်အသေးစိတ်မကြားရသေးဘူး။ ကျေးရွာဘက်မှာဆိုရင်တော့ အကုန်လုံးနာမည်စာရင်းတွေကိုကောက်နေတာ။ ပြီးတော့ ပြည်သူ့ကာကွယ်ရေးအဖွဲ့ နဲ့ ပြည်သူ့ကြက်ခြေနီအဖွဲ့ဆိုပြီးဖွဲ့ခိုင်းထားတာ။ ပြည်သူ့ကာကွယ်ရေးအဖွဲ့က ပြည်သူ့စစ်လိုမျိုးဖြစ်အောင် လုပ်ပေးမှာ။ သူတို့လက်နက်ချပေးတာမျိုးတော့ မရှိဘူး” ဟု မိုးနဲမြို့ အသက် (၅၀)အရွယ်ရှိ အမျိုးသားတစ်ဦးက ပြောသည်။
ထိုအပြင် မိုးနဲမြို့နယ်အတွင်း လူထုစာရင်းကောက်နေခြင်းသည် လာမည့် ၂၀၂၃ မှာ ကျင်းပမည့် ရွေးကောက်ပွဲအတွက် အကြောင်းပြုပြီး ကောက်နေကြောင်း ဒေသခံများ ပြောပြချက်အရ သိရသည်။
လက်ရှိတွင် မိုးနဲမြို့နယ်အတွင်း အောက်မြန်မာပြည်က လာသည့် မျက်နှာစိမ်း ပြည်သူလည်း အများအပြား ဝင်ရောက်လာကြောင်း အသက် (၄၀) အရွယ်ရှိ မိုးနဲဒေသခံ အမျိုးသားတစ်ဦးက ပြောသည်။
“ကျနော်တို့ မိုးနဲထဲမှာဆိုရင် မျက်နှာစိမ်းတွေလည်း အရမ်းများလာတယ်။ မိုးနဲထဲကို အောက် မြန်မာပြည်ကလာတဲ့သူတွေအများကြီးပဲ။ သူတို့က မြို့ပြင်နားမှာလာနေကြတာ။ မိုးနဲထဲကို တစ်လဆို ၂ ကြိမ်လောက် မြန်မာပြည်ကလာတဲ့သူတွေရှိတယ်။ လမ်းသမားတွေလည်းမဟုတ်ဘူး။ လမ်းလုပ်သားတွေလည်း မဟုတ်ဘူး။ ဒီတိုင်းရွာတွေ၊ မြို့ပြင်မှာတွေလာနေကြတာ” ဟု မိုးနဲမြို့ အသက် (၄၀) အရွယ်ရှိ အမျိုးသား တစ်ဦးက ပြောသည်။
အလားတူ မိုးနဲမြို့နယ် ကျေးရွာများထဲတွင် ဆံပင်ဝယ်ယူသူများ၊ ဖျားရောင်းသူများ နှင့် ကော်ဇော ရောင်းသူများ ယခင်ထက်ပိုများလာပြီး၊ ထိုသူများသည် လမ်းလျှောက်ပြီး တရွာဝင် တရွာထွက် သွားလာနေကြကြောင်း ၎င်း အမျိုးသားက ဆိုသည်။
မိုးနဲမြို့နယ်အတွင်း စစ်အာဏာသိမ်းပြီး တနှစ်ကျော်ကာလတွင် မျက်နှာစိမ်းများပြားလာသည့်အတွက် သူခိုးများလည်း ယခင်ကထက် ပိုများလာကြောင်း သိရသည်။
ထိုသို့များပြားလာသည့်အတွက်ကြောင့် မိုးနဲမြို့တွင် ယခင်ထက် သူခိုးများလာကြောင်းသိရသည်။
“အခုဆို ကျနော်တို့မြို့မှာ သူခိုးတွေလည်းများတယ်။ မျက်နှာစိမ်းတွေလည်း များလာတယ်။ ပြီးတော့ ဆံပင်ဝယ်တဲ့သူတွေ၊ ဖျားရောင်းတဲ့သူတွေလည်း များလာတယ်။ အရင်ကလည်းရှိတယ်။ အရင်ကဆိုရင် ဆိုင်ကယ်နဲ့ ရွာထဲသွားလာတာ။ အခုက လမ်းလျောက်ပြီးတော့ပဲ တစ်ရွာပြီး တစ်ရွာသွားလာနေကြတာ” ဟု အသက် (၄၀) အရွယ်ရှိ အမျိုးသား က ထပ်လောင်းပြောသည်။
အဆိုပါ မြန်မာပြည်မှရောက်လာသည့် ပြည်သူများသည် စစ်တပ်၏ အပြင်ဘက် ပတ်ဝန်းကျင်တွင်နေထိုင်နေကြောင်း သိရသည်။
အဆိုပါ စစ်ကောင်စီတပ်သည် မိုးနဲမြို့၏ မြို့ပြင် ဘက်တွင်ရှိကြောင်း သိရသည်။
မိုးနဲမြို့နယ် အတွင်း စစ်ကောင်စီ တပ်ဖွဲ့ အပြင် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် RCSS/SSA က သွားလာလှုပ်ရှားသည့် နယ်မြေဒေသဖြစ်သည်။
