သျှမ်းပြည်မြောက်ပိုင်း မိုးမိတ်မြို့နယ် မြို့သစ်ကျေးရွာတွင် ယနေ့ ဇူလိုင် (၁၁) ရက် မနက် (၉) နာရီအချိန်က ဗုံး (၃)လုံး ပေါက်ကွဲပြီးနောက် စစ်ကောင်စီလက်အောက်ခံ ဝန်ထမ်းအမျိုးသမီး (၁) ဦးသေဆုံးပြီး ၊ ထိခိုက် ဒဏ်ရာပြင်းထန်သူ (၂) ဦး ရှိကြောင်း စုံစမ်းသိရသည်။
ထို ဗုံးပေါက်ကွဲမှုကြောင့် ထိခိုက်ဒဏ်ရာ ပြင်းထန်သည့် စစ်ကောင်စီ လက်အောက်ခံ ဝန်ထမ်းအမျိုးသမီး (၂) ဦး နှင့် သေဆုံးသူ (၁) ဦး ကို မိုးမိတ် ပြည်သူ့ဆေးရုံသို့ ပို့ဆောင်ထားကြောင်း မိုးမိတ်ဒေသခံတစ်ဦးက သျှမ်းသံတော်ဆင့်ကို ပြောသည်။
“ ဒီနေ့ မနက် (၉) နာရီ လောက်က မိုးမိတ်မြို့ မြို့သစ်ကျေးရွာမှာ ဗုံး(၃) လုံးပေါက်ကွဲတယ်။ ထိခိုက်ဒဏ်ရာရ သွားတဲ့သူက စစ်ကောင်စီလက်အောက်ခံ ဝန်ထမ်း(၂) ဦးဖြစ်တယ်။ (၁) ဦးသေဆုံးတယ်။ ထိခိုက်တဲ့သူကိုတော့ ဆေးရုံမှာ ပို့ထားတယ်လို့ကြားတယ် “ ဟု ၎င်းကပြောသည်။
အဆိုပါ ဗုံးပေါက်ကွဲမှု ဖြစ်စဉ်နှင့် ပတ်သက်ပြီး မည်သည့် လက်နက်ကိုင်တပ်ဖွဲ့မှ လုပ်ဆောင်ထားသည်ကို သျှမ်းသံတော်ဆင့်မှ မသိရှိရသေးပေ။
ထိုသို့ ဗုံးပေါက်ကွဲပြီးနောက် စစ်ကောင်စီတပ်သားများ မြို့သစ်ကျေးရွာ ကားလမ်းပေါ်ရှိ ကျေးရွာများ အတွင်းသို့ စစ်ဆေးမှုတင်းကြပ်စွာ ဆောင်ရွက်နေကြောင်း သိရသည်။
ဇူလိုင် (၁၀) ရက် နံနက်အစောပိုင်းတွင်လည်း စစ်ရေးတင်းမာမှု နှင့် ပစ်ခတ်တိုက်ခိုက်မှုများရှိနေသဖြင့် ပြည်သူများ ဗုံးခိုကျင်း တူးထားရကြောင်း သိရသည်။
ပြီးခဲ့သည့် ဇူလိုင် (၁) ရက် မိုးမိတ်မြို့နယ်အတွင်းတွင် အာဏာသိမ်း စစ်ကောင်စီ တပ်ဖွဲ့နှင့် ရှမ်းပြည်တိုးတက်ရေးပါတီ / ရှမ်းပြည်တပ်မတော် (SSPP/SSA) တပ်ဖွဲ့တို့မှ တိုက်ပွဲစတင် ဖြစ်ပွားကြောင်း သိရသည်။
Leave a Comments