သျှမ်းပြည်မြောက်ပိုင်း မိုးမိတ်မြို့နယ်တွင် အာဏာသိမ်း စစ်ကောင်စီ တပ်ဖွဲ့ နှင့် တိုင်းရင်းသား လက်နက်ကိုင် တပ်ဖွဲ့တို့ တိုက်ပွဲထပ်မံဖြစ်ပွားပြီး စစ်ကောင်စီဘက်မှ ထိခိုက်သေဆုံးမှုများ ရှိနေကြောင်း သတင်းသိရသည်။

ယနေ့ (ဇူလိုင် ၁၀) ရက် နံနက်ပိုင်း ၅ နာရီ ဝန်းကျင်မှ စတင်ကာ ပစ်ခတ်သံများ ကြားရပြီး ၆ နာရီ ၂၀ မိနစ်အထိ တိုက်ပွဲပြင်းထန်ခဲ့ကြောင်း မိုးမိတ်မြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“တိုက်ပွဲက နှစ် နေရာဖြစ်ပါတယ်၊ စင့်ကင်ကျေးရွာနဲ့ မြို့သစ်ဘက်မှာဖြစ်တာ၊ လက်နက်ကြီး လက်နက်ငယ်တွေနဲ့ ပစ်ကြတာ တိုက်ပွဲက တစ်နာရီကျော် ကြာပါတယ်၊ စစ်ကောင်စီဘက်က ခရိုင်မှူးတစ်ယောက်နဲ့ တပ်သား လေး ယောက် ဒဏ်ရာရတယ်၊ တစ်ယောက်သေတယ်” ဟု မိုးမိတ်ဒေသခံ အမျိုးသား တစ်ဦးက ပြောသည်။

ယင်းတိုက်ပွဲတွင် ကချင်လွတ်မြောက်ရေးတပ်မတော် KIA နှင့် PDF ပူးပေါင်းတပ်ဖွဲ့တို့မှ စစ်ကောင်စီတပ်ဖွဲ့ကို စတင်တိုက်ခိုက်ခြင်းဖြစ်ကြောင်း ၎င်းက ဆိုသည်။

“SSPP/SSA တပ်နဲ့ တိုက်ပွဲဖြစ်တာ မဟုတ်ဘူး၊ KIA နဲ့ PDF ပူးပေါင်းတပ်ဖွဲ့တို့နဲ့ ဖြစ်တာ၊ မြို့သစ်ဘက်မှာ ရှိတဲ့ စစ်ကောင်စီတပ်ဖွဲ့တွေက ဝိုင်းခံထားရတဲ့ အနေအထားရှိတယ်၊ နမ့်မိတ်ချောင်းရဲ့ ဒီဘက်မှာက KIA နဲ့ PDF ရှိတယ်၊ ဟိုဘက်မှာ SSPP/SSA တပ်ဖွဲ့က နေရာယူထားတယ်” ဟု မိုးမိတ်ဒေသခံ အမျိုးသားက ဆက်ပြောသည်။

ယနေ့ ဖြစ်ပွားခဲ့သည့် တိုက်ပွဲတွင် စစ်ကောင်စီဘက်မှ အရာရှိတစ်ဦးအပါအဝင် ၅ ဦးထိခိုက်ဒဏ်ရာရပြီး တစ်ဦး သေဆုံးကြောင်း နှင့် KIA, PDF ဘက်မှ တစ်ဦး ထိခိုက်ဒဏ်ရာရကြောင်းလည်း သိရသည်။

လက်ရှိအချိန်ထိ ပစ်ခတ်သံ အနည်းငယ် မကြာခဏ ဖြစ်ပေါ်နေလျက်ရှိပြီး ထွက်ပြေးတိမ်းရှောင်သည့် ပြည်သူများ ရှိ၊ မရှိကို သျှမ်းသံတော်ဆင့် အနေဖြင့် သီးခြား အတည်ပြုချက်မရရှိသေးပေ။

ပြီးခဲ့သည့် ဇူလိုင်လ ၁ ရက်နေ့တွင် စတင်ဖြစ်ပွားခဲ့သည့် အာဏာသိမ်း စစ်ကောင်စီတပ်ဖွဲ့နှင့် SSPP/SSA တပ်ဖွဲ့တို့၏ ထိပ်တိုက် ပစ်ခတ်မှုများ ဖြစ်ပွားပြီးနောက်ပိုင်း မိုးမိတ်မြို့နယ်အတွင်း စစ်ရေးတင်းမာမှုများ ဖြစ်လာခဲ့ခြင်းဖြစ်ကြောင်း သိရသည်။

မိုးမိတ်မြို့နယ်အတွင်းတွင် အာဏာသိမ်း စစ်ကောင်စီ တပ်အပြင် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) ၊ ကချင်လွတ်မြောက်ရေးတပ်မတော် (KIA) ၊ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) နှင့် ဒေသခံ ပြည်သူ့ကာကွယ်ရေးတပ်ဖွဲ့ PDF တို့က သွားလာလှုပ်ရှားလျက်ရှိကြောင်း သတင်းသိရသည်။