သျှမ်းပြည်တောင်ပိုင်း တောင်ကြီးမြို့တွင် ယခုရက်ပိုင်း စစ်ဆေးမှု ပိုမို တင်းကြပ်လာကြောင်း စုံစမ်းသိရှိရသည်။
ယနေ့ ဇူလိုင် (၇) ရက်တွင် တောင်ကြီးမြို့ အဝင် နှင့် ရပ်ကွက်တစ်ချို့တွင် စစ်ကောင်စီ တပ်သားများက ယာဉ်မောင်းလိုင်စင် စစ်ဆေးပြီး ငွေတောင်းခံနေလျက်ရှိကြောင်း သိရသည်။
“အခုရက်ပိုင်းကတော့ စစ်ဆေးမှုပိုကြမ်းလာတယ်။ ပိုများလာတယ်။ ဒီနေ့ပဲ ရပ်ကွက်တွေ တစ်ချို့နား စစ်ဆေးနေတာ။ မြို့ဝင်တွေကောပဲ။ ဒီနေ့ မနက်စူဠာမုနိမှာ စစ်ဆေးနေတာ။ စစ်သားတွေက စစ်နေတာ။ ယာဉ်မောင်းလိုင်စင်တွေကော စစ်ဆေးနေတယ်လို့ကြားတယ်” ဟု တောင်ကြီးမြို့ ဒေသခံ အမျိုးသမီး တစ်ဦးက ပြောသည်။
ထိုအပြင် ယခုရက်ပိုင်းတွင် မနက် (၈) နာရီမှ ည (၁၀) နာရီအထိ စစ်ဆေးနေလျက်ရှိကြောင်း သိရသည်။
လက်ရှိမှာလည်း တောင်ကြီးမြို့ ယာဥ်ထိန်းရဲများကလည်း ဆိုင်ကယ်ဦးထုပ်ကို ပိုမိုစစ်ဆေးလာလျက်ရှိကြောင်း သိရသည်။
“ အကုန်လုံး စစ်ဆေးမှုကြမ်းနေတာပဲ။ စည်းကမ်းတွေလည်း သိပ်မရှိကြဘူး။ အခုတော့ ဆိုင်ကယ်စီးတဲ့ သူတွေကိုလည်း ဦးထုပ်ဆောင်းမဆောင်း ပိုစစ်ဆေးလာတယ်။ အာဏာသိမ်းပြီးနောက် စည်းကမ်းတွေ မရှိကြတော့ဘူး” ဟု တောင်ကြီးမြို့ ဒေသခံ အမျိုးသားတစ်ဦးက ပြောသည်။
ပြီးခဲ့သည့် ဇွန် ၂၄ ရက်နေ့တွင် တောင်ကြီး မြို့မဈေး မီးပွိုင့်နားတွင် ဗုံးပေါက်ကွဲမှု အပြီး စစ်ဆေးမှု ပိုများလာကြောင်း သိရသည်။
ထိုအပြင် ယခုရက်ပိုင်းအတွင်း လူငယ် များလည်း ဖမ်းဆီးခံရကြောင်း သိရသည်။ သို့သော် သျှမ်းသံတော်ဆင့်မှ အတည်မပြုနိုင်သေးပါ။
Leave a Comments