သျှမ်းပြည်တောင်ပိုင်း ရွာငံမြို့ရှိ ဒေသခံများကို ပျူစောထီးတပ်ဖွဲ့ဝင်စေရန် စစ်ကောင်စီတပ်သားများက ခြိမ်းခြောက်မှုများ ပြုလုပ်နေကြောင်း သတင်းသိရသည်။
သျှမ်းပြည်တောင်ပိုင်း ရွာငံမြို့နယ် ဆင်ဆာပြားကျေးရွာ ပြည်သူ့ကာကွယ်ရေးတပ်ဖွဲ့ (PDF) တပ်ဖွဲ့ဝင်တစ်ချို့နှင့် ပတ်သက်နေသူများ ရှိနေသည့် သတင်းထွက်ပေါ်လာမှုကြောင့် စစ်ကောင်စီတပ်သားများက ရွာခံများကို ပျူစောထီးတပ်ဖွဲ့ဝင်စေရန် ခြိမ်းခြောက်ပြောဆိုကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ရွာလုံခြုံရေးအတွက်ဆိုပြီးတော့ ရွာသားတွေကို ပျူစောထီးအဖွဲ့ဝင်ခိုင်းတယ်၊ ဖွဲ့ခိုင်းတယ်၊ မလုပ်ရင် ရွာထဲအိမ်ကို မီးရှို့မယ် ဘာညာတွေ ခြိမ်းခြောက်ပြောဆိုနေတယ်၊ အခုဆို ရွာသားတွေကို ဖမ်းထားတာလည်း မနည်းဘူး” ဟု ဆင်ဆာပြားကျေးရွာမှ အမျိုးသားတစ်ဦးက ပြောသည်။
စစ်ကောင်စီတပ်သားတို့သည် ဒေသခံရွာသားများကို PDF နှင့် ဆက်စပ်ပတ်သက်နေသည့် အကြောင်းပြချက်ဖြင့် ရွာသားများကို ဖမ်းဆီးခြင်း ၊ ရိုက်နှက်စစ်ဆေးခြင်းများ ပြုလုပ်ကာ ပျူစောထီးတပ်ဖွဲ့ဝင်ဖြစ်အောင် ခြိမ်းခြောက်မှုများ ပြုလုပ်နေကြောင်း သိရသည်။
ပြီးခဲ့သည့် ဇူလိုင် (၅) ရက်နေ့ မနက်ပိုင်းအချိန်တွင် စစ်ကောင်စီတပ်ဖွဲ့တို့မှ ဆင်ဆားပြားကျေးရွာမှ ရွာသား ၉ ဦး ဖမ်းဆီးသွားပြီး ညနေပိုင်းတွင် ၇ ယောက်ပြန်လွှတ်လာခဲ့ကာ ၂ ယောက် ဖမ်းဆီးခံရသေးကြောင်း သိရသည်။
“သူတို့ကို PDF နဲ့ သိ၊ မသိ ဖမ်းပြီးစစ်တာတဲ့၊ နှစ်ယောက်ကို ဘာလို့ ပြန်မလွှတ်လဲတော့ မသိဘူး၊ ဒါပေမယ့် အဲ့နေ့ ပြန်လွှတ်လာတဲ့သူတွေ ပြောတာက ရိုက်နှက်တာတော့ မရှိဘူးလို့ ပြောတယ်၊ ဒါပေမဲ့ ရွာသားတွေကို ထင်မြင်ချက်တစ်ခုတည်း နဲ့ ဖမ်းလိုက် ပြန်လွတ်လိုက်လုပ်နေတာက မဖြစ်သင့်ဘူးလေ” ဟု အထက်ပါ အမျိုးသားက ဆက်ပြောသည်။
လက်ရှိတွင် စစ်ကောင်စီတပ်သားတို့သည် ရွာငံဒေသအတွင်းမှ PDF တပ်ဖွဲ့များကို အပူတပြင်းရှာဖွေ ဖမ်းဆီးမှုများ ပြုလုပ်နေပြီး ရွာသားများကိုလည်း ရိုက်နှက်ဖမ်းဆီးမှုများ ပြုလုပ်နေလျက်ရှိကြောင်း သိရသည်။
အာဏာသိမ်း စစ်ကောင်စီတပ်ဖွဲ့တို့သည် ၎င်းတို့ အာဏာသိမ်းယူပြီးနောက်ပိုင်း နိုင်ငံတဝှမ်းလုံးဖြစ်ပေါ်နေသည့် ခိုးဆိုးလုယက်မှုများနှင့် မတရားမှုများကို နှိမ်နင်းခြင်းမပြုလုပ်သည့်အပြင် မူးယစ်ဆေးဝါး နှင့် လောင်းကစားဝိုင်းများ ပေါများလာရန်သာ လုပ်ဆောင်နေကြောင်း သတင်းသိရသည်။
Leave a Comments