သျှမ်းပြည်မြောက်ပိုင်း နမ္မတူမြို့နယ်ရှိ ဘော်တွင်းရဲစခန်းကို အမည်မသိလက်နက်ကိုင်က ယနေ့ ဇူလိုင် (၆) ရက် မနက်ပိုင်းတွင် ဝင်ရောက်တိုက်ခိုက်ခဲ့ ကြောင်း စုံစမ်းသိရသည်။
“ဒီနေ့ မနက်ပိုင်းမှာ သေနတ်တွေနဲ့လာပစ်သွားတာ။ တိုက်ပွဲကြီးဖြစ်သွားတာမျိုးမဟုတ်ဘူး။ သူတို့ အဝေးကနေ ဒီတိုင်း ခြောက်လှန့်အောင်ပစ်တဲ့သဘောမျိုးပဲဖြစ်တယ်။ ဘယ်တပ်ဖွဲ့က ပစ်တာလဲတော့ မသိဘူး” ဟု နမ္မတူ ဒေသခံ အမျိုးသားတစ်ဦးက ပြောသည်။
အလားတူ ပြီးခဲ့သည့် ဇူလိုင် (၄) ရက် မနက်ပိုင်းတွင် လက်နက်ကြီးဖြင့် ဘော်တွင်းရဲစခန်းကို အမည်မသိ လက်နက်ကိုင်က လက်နက်ကြီးဖြင့် ဝင်ရောက်ပစ်ခတ်ခဲ့သေးကြောင်း သိရသည်။
ထိုနေ့ ပစ်ခတ်မှုသည် နှစ်ဖက် ပစ်ခတ်မှုဖြစ်ပွားခဲ့ကြောင်း သိရသည်။
“ ဘော်တွင်းရဲစခန်းကို ဝင်ပစ်သွားတာ။ ဘယ်လက်နက်ကိုင်က လာပစ်သွားလဲတော့ မသိရသေးဘူး။ အဲ့နေ့က လက်နက်ကြီးနဲ့ လာပစ်သွားတာ။ နှစ်ဖက် ပစ်ခတ်မှုတော့ ဖြစ်သွားတယ်” ဟု နမ္မတူမြို့ ဒေသခံ အမျိုးသားတစ်ဦးက ပြောသည်။
အဆိုပါ တိုက်ပွဲကြောင့် ထိခိုက်မှုမရှိကြောင်း သိရသည်။ ပြီးခဲ့သည့် မတ်လတွင်လည်း နမ္မတူမြို့နယ် ရုရှားတောင်အကျော် ကုန်းကယားရွာ နှင့် ဆင်လီရွာမှာ စစ်ကောင်စီ နှင့် KIA တို့ တိုက်ပွဲဖြစ်ပွားခဲ့ကြောင်း သိရသည်။
Leave a Comments