သျှမ်းပြည်မြောက်ပိုင်း ကျောက်မဲမြို့နယ်အတွင်း တစ်လနီးပါးဖွင့်လှစ်လာသည့် လောင်းကစားကြောင့် မြို့တွင်းခိုးယူမှု များပြားလာသည့် အပြင် လူသတ်မှုများလည်းရှိလာကြောင်း စုံစမ်းသိရသည်။
လက်ရှိ ကျောက်မဲမြို့ ရပ်ကွက် (၂) တွင် လောင်းကစား (၃) ရက်ဖွင့်ပြီးနောက် ဆိုင်ကယ် (၂) စီး ခိုးယူမှုလည်း ရှိခဲ့ကြောင်းသိရသည်။
“ ရပ်ကွက် (၂) မှာ ဖွင့်လာတာ မကြာသေးဘူး။ (၃) ရက်ပဲ ရှိသေးတယ်။ ဆိုင်ကယ်က (၂) စီး လောက်ပျောက်နေပြီ။ စဖွင့်လာတုန်းကနဲ့ တွက်ရင်တော့ ကျောက်မဲမှာ ဆိုင်ကယ်ပျောက်ဆုံးတာ ၅ စီးထက်မနည်းရှိနေပြီ” ဟု ကျောက်မဲမြို့ ဒေသခံ အမျိုးသားတစ်ဦးက ပြောသည်။
အလားတူ ကျောက်မဲမြို့ ရပ်ကွက် (၁) တွင် ဇွန် ၃၀ ရက် ၌ လောင်းကစားရှုံးပြီး ငွေကြေးလိုသည့် သမီးက ဖခင်ဖြစ်သူကို ဓားဖြင့် ခုတ်သတ်ခဲ့ကြောင်း သိရသည်။
“သမီးဖြစ်သူက ပိုက်ဆံလိုတော့ သူ့အဖေကို လာတောင်းတာ။ သူ့အဖေက မပေးလို့ထင်တယ်။ အဖေကို ဓားနဲ့ ပြန်ခုတ်သတ်လိုက်တာ။ သူ့အဖေက အသက် (၇၀) ကျော်လောက်ရှိနေပြီ။ လောင်းကစားကြောင့် ဒီလိုတွေဖြစ်လာနေတာ” ဟု ကျောက်မဲမြို့ ဒေသခံတစ်ဦးက ပြောသည်။
ထိုဖြစ်စဉ်ကြောင့် ယမန့်နေ ဇူလိုင် (၄) ရက်မှ စပြီး ကျောက်မဲမြို့ ရပ်ကွက် ၂ တွင် ဖွင့်ထားသည့် လောင်းကစားဝိုင်းကို ပိတ်ထားလိုက်ရကြောင်း သိရသည်။
ထို့အပြင် ကျောက်မဲမြို့တွင် ညမထွက်ရအမိန့် ရှိနေစဥ် စစ်ကောင်စီမှ ညတွင် စစ်ဆေးမေးမြန်းမှုကြမ်းနေပြီး လောင်းကစားဝိုင်းမှ ပြန်လာသူများကို စစ်ဆေးမှုမရှိကြောင်း ဒေသခံများ က ပြောသည်။
“ သူတို့ ညဆိုရင် မြို့ထဲမှာ သွားလာနေတဲ့သူတွေကို စစ်ဆေး မေးမြန်းတာတွေရှိတယ်။ တကယ်လို့ လောင်းကစားဝိုင်းကနေပြန်လာတဲ့သူတွေကိုတော့ သူတို့ဘာမှ မမေးဘူး။ တစ်ခြားမြို့ကနေလာတဲ့သူ၊ လောင်းကစားဝိုင်းကနေလာတဲ့သူမဟုတ်ရင်တော့ သူတို့ မှတ်ပုံတင်တွေ၊ ကိုဗစ် စစ်ဆေးတာတွေလည်းရှိတယ်” ဟု အထက်ပါ အမျိုးသားက ပြောသည်။
စစ်တပ်က အာဏာသိမ်းပြီးနောက် သျှမ်းပြည်အတွင်း လောင်းကစားဝိုင်းများကို ပေါ်တင်ဖွင့်ပေးလာပြီး စစ်ကောင်စီလက်အောက်ခံ ရဲများ၊ လောင်းကစားရုံတွင် စစ်သားများ လုံခြုံရေးယူပေးနေလျက်ရှိကြောင်း သိရသည်။
အဆိုပါ လောင်းကစားကြောင့်လည်း ပြည်သူများနေအိမ်၊ ခြံကို ပေါင်ပြီး ထွက်ပြေးနေရသူများလည်း ရှိကြောင်း သိရသည်။
Leave a Comments