Friday, December 2, 2022

စစ်ကောင်စီ ခန့်အပ်သည့် UEC နဲ့ SNLD တွေ့ဆုံ

Must read

ရှမ်းတိုင်းရင်းသားများ ဒီမိုကရေစီ အဖွဲ့ချုပ် (SNLD) နှင့် ပြည်ထောင်စုရွေးကောက်ပွဲကော်မရှင် (UEC) တို့ ဇွန် ၃၀ ရက် မှ ဇူလိုင် ၂ ရက်နေ့ထိ တွေ့ဆုံ ဆွေးနွေးခဲ့ပါသည်။ ထိုတွေ့ဆုံမှုတွင် SNLD ၏ ပါတီဝင် အင်အား နှင့် ငွေကြေး သုံးစွဲမှု စနစ်တကျ ထားသိုမှု ရှိ၊မရှိ ကိစ္စ နှင့် ပတ်သက်ပြီး UEC မှ မေးမြန်းခဲ့သည်။ အဆိုပါ ကိစ္စ နှင့် ပတ်သက်ပြီး SNLD မှ တွဲဖက် အတွင်းရေးမှူး (၁) စိုင်းကျော်ညွန့် ကို သျှမ်းသံတော်ဆင့် သတင်းထောက် နန်းနောင့်နောင့် မှ ဆက်သွယ် မေးမြန်းထားသည်။

မေး – ပြီးခဲ့တဲ့ ရက်ပိုင်းမှာ SNLD နဲ့ UEC တို့ တွေ့ဆုံခဲ့တယ်လို့ ကြားရပါတယ်။ ဟုတ်ပါသလား၊ ဘယ်နေရာမှာ တွေ့ပြီး ဘာအကြောင်း ဆွေးနွေးဖြစ်ခဲ့ပါသလဲရှင့်။

ဖြေ – ဟုတ်ပါတယ်၊ ဇွန် ၃၀ ကနေ ဇူလိုင် ၂ ရက်နေ့ အထိတွေ့ဆုံဆွေးနွေးဖြစ်ခဲ့ပါတယ်၊ အစက စာရင်းတွေ ဘာတွေ ပါတီဝင် အင်အားတွေ ပါတီသုံးစွဲမှုတွေ စသဖြင့် UEC ဘက်က လုပ်ထုံးလုပ်နည်းအရ သူစစ်တာ ရှိတယ်။ အရင်တုန်းကတော့ ကျနော်တို့က ကျနော်တို့ ဗဟိုဌာနချုပ်ရုံး ကိုလာပြီးတော့ စစ်ဆေးမေးမြန်း ဖို့ပေါ့ဗျာ၊ သူတို့ဘက်ကလည်း သူတို့ UEC ရုံးကိုလာဖို့ပေါ့၊ နောက်ဆုံးတော့ ကျနော်တို့ တောင်ကြီးမှာ တွေ့ဆုံဖို့ သဘောတူလိုက်တယ်။ လုပ်ထုံးလုပ်နည်း အတိုင်းပါပဲ။ ပါတီဝင် အင်အားဘယ်လောက်ရှိလဲ။ ငွေကြေးတွေ သုံးစွဲတာ စနစ်တကျ ထားသိုမှု ရှိ၊ မရှိ။ ထွေထွေထူးထူးတော့ မရှိပါဘူး။ သူ့ဟာနဲ့ သူ အေးဆေး ပြီးသွားပါတယ်။

မေး – SNLD နဲ့ UEC တွေ့ဆုံဆွေးနွေးမှုမှာ ဘယ်သူတွေပါဝင်သလဲ၊ ပါတီက CEC တွေရာ ပါလား။

ဖြေ – ပါပါတယ်။ သူတို့ဘက်ကတော့ အဖွဲ့စုံပါပဲ။ UEC တွေပါမယ်၊ စသုံးလုံး ပါမယ်။ အခွန်ဌာနပါတယ်။ စာရင်းစစ်ဌာနကလူတွေပါတယ်။

စိုင်းကျော်ညွန့်

မေး – ဇွန်လ ၃၀ ရက် ထားပြီး UEC ဆင့်ခေါ်မှုကို သွားမတွေ့တဲ့အတွက် စစ်ကောင်စီဘက်က တရားစွဲဆိုမယ် ပြောထားတဲ့ ကိစ္စ ဘယ်အနေအထားရောက်နေပြီလဲရှင့်။

ဖြေ – တရားစွဲတယ်ဆိုတာ မရှိပါဘူးဗျ၊ ပါတီကို သူတို့ ရပ်ဆိုင်းမယ် သုံးနှစ်အထိ သူတို့ ရပ်ဆိုင်းလို့ရတယ်၊ ပြီးရင် ပါတီကို ဖျက်သိမ်းလို့ရတယ် ဆိုတဲ့ဟာလောက်ပါပဲ၊ တရားစွဲလို့ မရပါဘူး၊ ဒါကလည်း ဥပဒေအတိုင်းပဲလေ၊ နိုင်ငံရေးပါတီ ဖွဲ့စည်းမှု ဥပဒေမှာပါပြီးသား။
သမာရိုးကျပြောရရင် ကျနော်တို့ပါတီက ဆက်လက်ရပ်တည်ဖို့ ရည်ရွယ်ချက်ရှိတယ်၊ ကိုယ့်လူမျိုးအကျိုး ကိုယ့်ပြည်နယ်အကျိုး၊ တစ်နိုင်ငံလုံးက အကျိုးတွေကို ထောက်ရှုပြီးတော့ ကျနော်တို့ ပါတီက ဆက်လက်ရပ်တည်ဖို့ လိုအပ်တယ်ဆိုပြီးတော့ သွားတွေ့တာ ဖြစ်ပါတယ်။

မေး – လက်ရှိ သျှမ်းပြည်ထဲမှာ စကစ နဲ့ သျှမ်းတပ်မတော်တွေက စစ်ရေးတင်းမာမှု ရှိနေတဲ့ အပေါ်မှာရော SNLD အနေနဲ့ ဘယ်လိုမြင်မိလဲ။

ဖြေ – ကျနော်တို့က အရပ်ဖက် အဖွဲ့အစည်းလေဗျာ၊ ပါတီတို့ CSO တို့ စသဖြင့် ဒါတွေက အရပ်သားတွေနဲ့ ဖွဲ့စည်းထားတဲ့ အဖွဲ့အစည်းတွေ ဖြစ်တယ်။ တပ်မတော် နဲ့ တိုင်းရင်းသား လက်နက်ကိုင် တပ်ဖွဲ့တွေ တိုက်တာပဲ ဖြစ်ဖြစ် တိုင်းရင်းသားလက်နက်ကိုင်တွေတိုက်တာပဲ ဖြစ်ဖြစ် လူမျိုးတူတာပဲ တိုက်တိုက် မတူတာပဲ တိုက်တိုက်၊ ဘယ်လိုမှ ကျနော်တို့ အားပေးထောက်ခံစရာမရှိပါဘူး။ ကျနော်တို့မူလ သဘောထားကတော့ ဒါဟာ တိုက်ပွဲနည်းနဲ့ မဖြေရှင်းဖို့တော့ အကောင်းဆုံးပေ့ါလေ၊ နိုင်ငံရေး ဆွေးနွေးပွဲနဲ့ ရှင်းရင် ကောင်းတာပေါ့လေ။ ဒါကတော့ ကျနော်တို့ ပါတီမူပေါ့ဗျာ။ ကျနော်တို့က တခြားသူတွေ လုပ်နေတာကို ကန့်ကွက်နေတာ မဟုတ်ဘူး။ အဖွဲ့အစည်း တစ်ခု ဆိုတာ သူ့ဟာနဲ့သူ ရွေးချယ်ပိုင်ခွင့်ရှိပါတယ်။ သူတို့ရဲ့ ရွေးချယ်ပိုင်ခွင့်ကို ကျနော်တို့က သွားဝင်စွက်ဖက်လို့ မရပါဘူး။

မေး – တကယ်လို့ တိုက်ပွဲပဋိပက္ခတွေအတွက် ဆွေးနွေးညှိနှိုင်းမှုတွေ လုပ်ဖို့လိုအပ်လာပြီဆိုရင် SNLD အနေနဲ့ ကြားနေ အဖွဲ့အစည်းအဖြစ် ဝင်ရောက်ညှိနှိုင်းလုပ်ကိုင်ပေးဖို့ရော အစီအစဥ်ရှိလား။

ဖြေ – သျှမ်းတပ်အချင်းချင်းကြားထဲမှာတော့ ၂၀၁၆ ခုနှစ်ကတည်းက ကျနော်တို့ တောက်လျှောက်လုပ်ခဲ့တာပဲလေ။ အောင်မြင်တဲ့ခါလည်း ရှိသလို မအောင်မြင်တဲ့အခါလည်း ရှိခဲ့တယ်။ ဒါလည်း ကျနော်တို့ အဖွဲ့အစည်းလည်း မဟုတ်တော့ ကျနော်တို့ အမိန့်ပေးလို့မှ မရတာ၊ ဒါကတော့ သျှမ်းကိစ္စပေါ့နော်။ တခြား ကိစ္စပြောရမယ်ဆိုရင် ဖြစ်စဥ်အကြောင်းအရာက ကျယ်ပြန့်မယ် ဆိုရင်တော့ ပြောဖို့ခက်ပါတယ်။ သတ်ကြ ဖြတ်ကြတာတွေ မီးရှို့တာတွေလိုမျိုးတွေ မရပ်တန့်ပဲနဲ့ တွေ့ဆုံတာတို့ ဆွေးနွေးတာတို့ လုပ်ရင်လည်း အကျိုး မရှိနိုင်သေးဘူး။

တွေ့ဆုံဆွေးနွေးမှုလုပ်တယ်ဆိုတာ သူနိုင်တဲ့ အခင်းအကျင်းကို အရင်ဆုံးဖော်ဆောင်နိုင်ရမယ်၊ ဖြစ်လည်း မဖြစ်နိုင်ဘူး၊ ဖြစ်လာမယ်ဆိုရင် ဒါက မစစ်ဘူး။

မေး – နောက်ဆုံးအနေနဲ့ ဘာများ ဖြည့်စွက်ပြောချင်ပါသလဲ။

ဖြေ – မရှိတော့ပါဘူး။

အခုလို အချိန်ပေး ဖြေကြားပေးတဲ့အတွက် ကျေးဇူးတင်ပါတယ်ရှင့်။

Leave a Comments

- Advertisement -spot_img

Latest article