ထိုင်းနိုင်ငံ ချင်းမိုင်မြို့သို့ လာရောက်အလုပ်လုပ်ကြသည့်သူများကို ချင်းမိုင်ခရိုင် အလုပ်သမား ရှာဖွေရုံးမှ အလုပ်သမားကဒ် (Work permit ) စာအုပ်ထုတ်ဝေမှုကို ခေတ္တရပ်ဆိုင်းထားကြောင်း ထုတ်ပြန်ချက်မှသိရသည်။
ထိုင်းနိုင်ငံ ချင်းမိုင်ခရိုင် အလုပ်သမားရှာဖွေရုံးမှ ဇူလိုင် ၁ ရက်မှစပြီး အလုပ်သမားကဒ် (Work permit) စာအုပ်ထုတ်ဝေမှုကို ခေတ္တရပ်ဆိုင်းထားသဖြင့် ထိုင်းရောက်မြန်မာအလုပ်သမား စာအုပ်လျှောက်ထားသူများ ယခုလအတွင်း စာအုပ်ထုတ်ပေးမည် မဟုတ်သေးကြာင်း သိရသည်။
ချင်းမိုင်မြို့အတွင်း အလုပ်သမားကဒ် စာအုပ်ထုတ်ဝေမှုကို ခေတ္တရပ်ဆိုင်းထားခြင်းသည် အလုပ်သမားကဒ် (work permit) စာအုပ် ကုန်သွားကြောင်း ချင်းမိုင်မြို့တွင်း အလုပ်သမားကဒ် လုပ်ဆောင်ပေးသူတစ်ဦးက သျှမ်းသံတော်ဆင့်ကို ပြောသည်။
“မလုပ်ပေးတာတော့ မဟုတ်ဘူး၊ စာအုပ် (work permit) က ကုန်သွားတာ၊ စာအုပ်လုပ်ထားတဲ့သူတွေ သွားယူလည်း မရသေးဘူး“ ဟု ၎င်း ကပြောသည်။
အလုပ်သမားကဒ်စာအုပ် ကုန်သွားသည့်အတွက် အလုပ်သမားများအနေဖြင့် ခေတ္တ စောင့်ဆိုင်းပေးရန်လည်း အထက်ပါ ပုဂ္ဂုလ်က ဆိုသည်။
ထိုအလုပ်သမားစာအုပ် မရှိပါက အလုပ်လုပ်ရန် ခက်ခဲကြောင်းနှင့် အလုပ်ရှာရန်၊ အလုပ်အသစ် ပြောင်းရွှေ့ရန်လည်း ခက်ခဲကြောင်း ချင်းမိုင်ရောက် သျှမ်းလူငယ် တစ်ဦးက သျှမ်းသံတော်ဆင့်ကို ပြောသည်။
“အလုပ်သမားကဒ် မရှိရင်လည်း သူဌေးတွေက မယူဘူးလေ၊ ပြီးတော့ အလုပ်ပြောင်းချင်ရင်လည်း ခက်တယ် ကျနော်ကလျှောက်ထားပြီ ထပ်စောင့်ရရင် အလုပ်လုပ်ဖို့ အဆင်မပြေတော့ဘူး “ဟု ၎င်းကပြောသည်။
အဆိုပါ ထိုင်းနိုင်ငံ ချင်းမိုင်မြို့ရှိ မြန်မာသံရုံးများလည်း ယခုလမှစပြီး စာအုပ်အနီရောင် (passport) ကို မထုတ်ပေးတော့ကြောင်း သိရသည်။
မြန်မာ – ထိုင်း နှစ်နိုင်ငံ နယ်စပ်ဆက်ဆံရေးအကြား (၃၄) ကြိမ်မြောက် ဒေသဆိုင်ရာ နယ်ခြားကော်မတီ အစည်းအဝေး (RBC) ကို သျှမ်းပြည်တောင်ပိုင်း တောင်ကြီးမြို့တွင် ဇွန် ၂၇ ရက်မှ ဇွန် ၂၉ ရက်ထိ ပြုလုပ်ခဲ့သည်။
ထိုအစည်းအဝေးတွင် ပြည်တွင်း၊ ပြည်ပရှိ တချို့သော ကျောင်းသား၊ ကျောင်းသူ၊ လူငယ်လူရွယ်နှင့် CDM ဝန်ထမ်းများအား ဥပဒေဘောင်အတွင်း ပြန်လည်ဝင်ရောက်နိုင်ရေး အသိပေး ထုတ်ပြန်ထားမှုကို ထိုင်းတပ်မတော်မှလည်း ၎င်းတို့၏နယ်စပ်ဒေသများမှ မြန်မာနိုင်ငံသို့ အလွယ်တကူ ပြန်လည်ဝင်ရောက်နိုင်ရေး လိုအပ်သည်များကို ကူညီဆောင်ရွက် ပေးသွားမည့် အခြေအနေများကို ဆွေးနွေးခဲ့သည်။
ဆွေးနွေးပွဲပြီးနောက် ယခုကဲ့သို့ Work Permit စာအုပ်မထုတ်ပေးခြင်း၊ Passport (စာအုပ်အနီ) မပြုလုပ်ပေးခြင်းကိစ္စများပေါ်ပေါက်လာသည်ဟုလည်း ရွှေ့ပြောင်းအလုပ်သမားအရေး ဆောင်ရွက်သူများ က ပြောသည်။
“အခုက အလုပ်သမားကဒ်နဲ့ Passport စာအုပ် သက်တမ်းတိုး ကိစ္စ ပိတ်လိုက်တာက ထိုင်း-မြန်မာ နယ်ခြားကော်မတီ အစည်းအဝေး (RBC) ပြီးတော့ ထွက်လာတာပဲ။ စာအုပ်ကုန်လို့လား။ ဒါမှ မဟုတ် တမြင်ပိတ်တာလားတော့မသိဘူး” ဟု ရွှေ့ပြောင်းအလုပ်သမားအရေးဆောင်ရွက်သည့် အမျိုးသားတစ်ဦးက ပြောသည်။
စစ်အာဏာသိမ်းပြီးနောက် မြန်မာပြည်သူများသည် စီးပွားရေး ရှာစားရန် ခက်ခဲလာသဖြင့် အိမ်နီးချင်းဖြစ်သည့် ထိုင်းနယ်စပ်ဘက်ကို နေ့စဥ်နှင့်အမျှ ခိုးဝင်လာကြသည်။
“ထိုင်းဘက်ကို နေ့တိုင်း ရွှေ့ပြောင်းအလုပ်သမားတွေဝင်လာတယ်။ ဒီနှစ်ထဲမှ ဝင်လာတဲ့ရွှေ့ပြောင်းအလုပ်သမားက နည်းတာမဟုတ်ဘူး။ အဲ့ဒါကြောင့်လည်း စာအုပ်က ကုန်သွားတာလားမသိဘူး” ဟု ၎င်းက ထပ်လောင်းပြောသည်။
ထိုင်းနိုင်ငံသို့ ခိုးဝင်လာသည့် မြန်မာရွှေ့ပြောင်းအလုပ်သမားများကို နယ်စပ် လုံခြုံရေးအရ ထိုင်းအာဏာပိုင်မှ ဖမ်းဆီးချုပ်နှောင်နေကြောင်းသိရသည်။
