သျှမ်းပြည်တောင်ပိုင်း ဝမ်ဟိုင်း ဒေသဖွံ့ဖြိုးတိုးတက်ရေး အတွက် Documentary ရိုက်ကူးရန် Sexy မော်ဒယ် သရုပ်ဆောင် သင်ဇာဝင့်ကျော်ကို SSPP/SSA မှ ကမ်းလှမ်းဖိတ်ကြားခဲ့ကြောင်း သိရသည်။

ထို့ကြောင့် သင်ဇာဝင့်ကျော်သည် SSPP ဌာနချုပ် ဝမ်ဟိုင်းသို့ရောက်ရှိလာပြီး၊ ဇူလိုင် ၃ ရက်တွင် ရိုက်ကူးရေးမှ တဆင့် SSPP မှ ပြောရေးဆိုခွင့်ရှိသူ ဗိုလ်မှူးကြီးစိုင်းဆု၏ သမီး မင်္ဂလာပွဲကို စစ်ဝတ်စုံဖြင့် တက်ရောက်ခဲ့သည်။

SSPP/SSA အဖွဲ့မှ သင်ဇာဝင့်ကျော်ကို ဟိုက်ပါ ရေတံခွန် နှင့် သျှမ်းပြည်တောင်ပိုင်း ကျေးသီးမြို့နယ် ဝမ်ဟိုင်းဒေသ ဖွံ့ဖြိုးရေးအတွက် Documentary ရိုက်ကူးရန် ကမ်းလှမ်းခဲ့ကြောင်း SSPP info မှလည်း ယနေ့ (ဇူလိုင် ၄) ရက်တွင် ထုတ်ပြန်ခဲ့သည်။

ဆက်လက်ပြီး သင်ဇာဝင့်ကျော်သည် တခြားမည်သည့် နိုင်ငံရေး ရည်ရွယ်ချက်ဖြင့် ရိုက်ကူးခြင်းမဟုတ်ဘဲ သာသနာရေး၊ ပညာရေး၊ ကျန်းမာရေး၊ လမ်းပန်းဆက်သွယ်ရေး စသော ဒေသဖွံ့ဖြိုးရေးလုပ်ငန်းများကို ရိုက်ကူးရန်အတွက် SSPP မှ ကမ်းလှမ်းရိုက်ကူးနေခြင်းဖြစ်ကြောင်းလည်း ထုတ်ပြန်ချက်တွင် ရေးသားထားသည်။

Sexy မော်ဒယ် သင်ဇာဝင့်ကျော် သည် SSPP ၏ ပြောခွင့်ရသူတစ်ဦးလည်းဖြစ် အကြီးအကဲတစ်ဦးလည်းဖြစ်သည့် ဗိုလ်မှူးကြီး စိုင်းဆု၏ သမီး မင်္ဂလာပွဲကို SSPP စစ်ဝတ်စုံနှင့်အတူ ၎င်း၏ ချစ်သူဖြင့် တက်ရောက်မှုကိုလည်း လူမှုကွန်ရက် စာမျက်နှာတွင် ဂယက်ထသွားခဲ့သည်။

မင်္ဂလာဆောင်ပွဲ၏ တဖက်မှာလည်း SSPP/SSA နှင့် စစ်ကောင်စီတပ်တို့ စစ်ရေးတင်းမာနေချိန် ထိုကဲ့သို့ အခမ်းအနားပွဲကို လူမှုကွန်ရက် စာမျက်နှာပေါ် ပျံ့နှံ့လာမှုဟာ စဥ်းစားစရာ မေးခွန်းထုတ်စရာ ဖြစ်လာခဲ့သည်။

“မိုးမိတ်ဘက်မှာလည်း SSPP နဲ့ စစ်ကောင်စီ တိုက်ပွဲဖြစ်တယ်။ မိုင်းရှုးဘက်မှာလည်း စကစ က စစ်အင်အားတွေ ဖြည့်နေတယ်။ စစ်ရေးတွေတင်းမာနေတယ်။ ဝမ်းဟိုင်းဌာနချုပ်ကို သင်ဇာဝင့်ကျော်က စစ်ဝတ်စုံနဲ့ လူကြီးရဲ့သမီး မင်္ဂလာဆောင်ကိုတက်တယ်။ ဒါတွေက စဥ်းစားစရာတခုပဲ” ဟု သျှမ်းပြည် မှ လူငယ်တစ်ဦး က သုံးသပ်ပြောသည်။

ထို့အပြင် သင်ဇာဝင့်ကျော်ကလည်း ၎င်း၏ လူမှုကွန်ရက်စာမျက်နှာပေါ်တွင် “လူတွေကလဲနော် အကျိုးအကြောင်း သေချာ မသိပဲလျှောက်ရေးလျှောက်တင် နေကြတာ မှန်လားမှားလားမသိပဲ အကျိုးအကြောင်း သေချာမစုံစမ်းပဲ ထင်ရာမြင်ရာတွေစွတ်ပြောနေကြတာ မရှက်တတ်ကြဘူးလား။ ရှင်တို့ရေးတိုင်းပြောတိုင်းတင်တိုင်း အဲ့လိုဖြစ်ကြေးဆို ကျမလဲ ရှင်တို့လိုစာတွေလျှောက်ရေးပြီး ဆုတောင်းနေလိုက်မယ်”ရေးသားထားသည်။

လက်ရှိ သင်ဇာဝင့်ကျော် သည် ဝမ်ဟိုင်းဒေသဖွံ့ဖြိုးရေးအတွက် ရိုက်ကူးပေးနေသည့် ကိစ္စနှင့်ပတ်သက်ပြီး ငွေကြေး ဘယ်လောက်ဖြင့် ငှားရမ်းခဲ့သည်ကို သျှမ်းလူထုတွေက စိတ်ဝင်စားနေကြသည်။