သျှမ်းပြည်မြောက်ပိုင်း မိုးမိတ်မြို့နယ်တွင် အာဏာသိမ်း စစ်ကောင်စီတပ်ဖွဲ့နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA ) တပ်ဖွဲ့ကြား တိုက်ပွဲဖြစ်ပွားကာ စစ်ကောင်စီတပ်ဘက်မှ ၃ ဦးသေဆုံးပြီး ၁၅ ဦး ထိခိုက်ဒဏ်ရာရခဲ့ကြောင်း သတင်းသိရသည်။

ပြီးခဲ့သည့် ဇူလိုင်လ ၁ ရက် ညနေပိုင်းတွင် မိုးမိတ်မြို့နယ် ပုန်ကုန်ကျေးရွာ (ခ) မိုးဘုံကျေးရွာ နှင့် ဝမ်အုံကျေးရွာကြား ဖြစ်ပွားခဲ့သည့် တိုက်ပွဲ၌ SSPP/SSA လက်ချက်ကြောင့် စစ်ကောင်စီတပ်ဘက် ၃ ဦးသေဆုံးခဲ့ကြောင်း SSPP/SSA မှ မြေပြင်အရာရှိတစ်ဦးက သျှမ်းသံတော်ဆင့်ကို ပြောသည်။

“ဗမာစစ်တပ်ဘက်က ၃ ဦး သေတယ်၊ ၁၅ ဦး ထိခိုက်ဒဏ်ရာရတယ်၊ ထိခိုက်ဒဏ်ရာရတဲ့ ၁၅ ဦး ထဲမှာ အရာရှိ တစ်ဦးပါတယ်၊ ကျနော်တို့ဘက်ကတော့ တစ်ဦးကျ တစ်ဦးဒဏ်ရာရပါတယ်” ဟု SSPP/SSA မြေပြင် အရာရှိတစ်ဦး က သျှမ်းသံတော်ဆင့်ကို ပြောသည်။

လက်ရှိတွင် ထိခိုက်ဒဏ်ရာရ စစ်ကောင်စီတပ်သားများကို မိုးမိတ်မြို့နယ် အတွင်းရှိ စစ်ကောင်စီ တပ်အတွင်းသို့ ဆေးကုသရန် ခေါ်ယူသွားကြောင်းလည်း သိရသည်။

ယင်းနေ့ တိုက်ပွဲဖြစ်ပွားခြင်းနှင့် ပတ်သက်ပြီး စစ်ကောင်စီဘက်မှ စစ်ရေးစတင်လာခဲ့ခြင်း ဖြစ်ကြောင်းလည်း အထက်ပါ SSPP/SSA အရာရှိမှ ဆက်လက်ပြောဆိုထားသည်။

“အဲ့နေ့က တိုက်ပွဲဘယ်လိုဖြစ်သလဲဆိုရင် အစပိုင်းက အရပ်ဝတ်နဲ့ TNLA တပ်သားတချို့က မြို့ထဲမှာ ရှိနေတဲ့ စစ်ကောင်စီတပ်သားကို အရင်မျှားခေါ်ခဲ့တာ၊ ပြီးတော့ ကျနော်တို့ တပ်စခန်းနားရောက်တော့ TNLA တွေက လမ်းကြောင်းရှောင်ပြီး ထွက်သွားတယ်၊ ဒါကြောင့် စစ်ရေးက ကျနော်တို့ဘက် လှည့်လာတာ၊ အဲ့ကြောင့် ပစ်ခတ်မှုတွေ ဖြစ်ရတာပေါ့၊ TNLA မျှားခဲ့ရာကနေ စစ်ကောင်စီဘက်က ကျနော်တို့ကို စစ်ရေးစခဲ့တာ” ဟု ၎င်းက ပြောသည်။

မိုးမိတ်မြို့နယ်အတွင်း SSPP/SSA တို့ တပ်ဖွဲ့နှင့် တိုက်ပွဲဖြစ်ပွားသည့် အာဏာသိမ်း စစ်ကောင်စီတပ်ဖွဲ့သည် မိုးမိတ်မြို့ အခြေစိုက် စစ်ကောင်စီ တပ်လက်အောက်ခံ ခလရ (၂၂၃)၊ (၂၇၆) နှင့် ခမရ (၃၄၈) တို့ ဖြစ်ကြောင်း သိရှိရသည်။