သျှမ်းပြည်တောင်ပိုင်း မိုင်းရှူးမြို့နယ် နှင့် တန့်ယန်းမြို့နယ်ကြားရှိ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA တပ်စခန်းအနီး စစ်ကောင်စီမှ အင်အားဖြည့်တင်းနေကြောင်း စုံစမ်းသိရှိရသည်။
ယခုရက်ပိုင်း မိုင်းရှူးမြို့အတွင်း စစ်ကောင်စီသည် ညအချိန်မှာ တစ်မြို့လုံးကို လျှပ်စစ်မီးပိတ်ပြီး စစ်အင်အားအပြည့်ဖြင့် မြို့မှ ထွက်သွားပြီး ပြန်လာချိန်မှာ ကားပေါ်တွင် မည့်သည်တစ်စုံတစ်ရာမှ ပြန်မပါလာကြောင်း မိုင်းရှူးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“သူတို့ ညဆိုရင် မီးတွေပိတ်ပစ်တယ်။ မီးတွေပိတ်လိုက်ပြီးတော့ သူတို့ မြို့ကနေထွက်သွားတာ။ ထွက်သွားတုန်းကဆိုရင် ကားပေါ်မှာလူကော၊ စားစရာတွေအပြည့်ပဲ။ ပြန်လာတော့ ကားပေါ်မှာ ဘာမှ မရှိတော့ဘူး။ သူတို့ SSPP တပ်စခန်းနေရာကိုသွားနေတာထင်တယ်။ ဘာလို့လဲဆိုတော့ ဒီနေ့နောက်ဆုံးထားပြီး သူတို့ တပ်ဆုတ်ထားခိုင်းတယ်ဆိုတော့လေ” ဟု မိုင်းရှူးမြို့ ဒေသခံ အမျိုးသမီးတစ်ဦးက ပြောသည်။
လက်ရှိတွင် မိုင်းရှူးမြို့ နှင့် တန့်ယန်းမြို့ ကြားရှိ လွိုင်နိုင်းကျေးရွာ ဒေသခံများက မိုင်းရှူးမြို့ပေါ်သို့ ပြောင်းရွှေ့ လာနေကြောင်း သိရသည်။
အဆိုပါ လွိုင်နိုင်းကျေးရွာသည် SSPP တပ်စခန်း နှင့် စစ်ကောင်စီ တပ်ကြားတွင်ရှိသည့် ရွာဖြစ်ကြောင်း ဒေသခံများ ပြောပြချက်အရ သိရသည်။
“အခုဆိုရင် SSPP နဲ့ တပ်စခန်းနီးတဲ့နေရာဆိုရင် မိုင်းရှူးမြို့ပေါ်ကို ပြောင်းလာကြတယ်။ အခုရက်ပိုင်း တော်တော်များများက ပြောင်းလာကြတယ်။ တစ်ရွာလုံးပြောင်းလာတာတော့ မဟုတ်ဘူး။ ရွာထဲမှာတော့ ရွာစောင့်တွေတော့ ကျန်မယ်ထင်တယ်။ တိုက်ပွဲမဖြစ်ခင် ရှောင်လာတဲ့သူတွေပေါ့” ဟု အထက်ပါ ဒေသခံ အမျိုးသမီးက ပြောသည်။
စစ်ကောင်စီက ဇွန်လ ၃၀ ရက် နောက်ဆုံးထားပြီး မိုင်းရှူးမြို့ နှင့် တန့်ယန်းမြို့ ကြားရှိ SSPP တပ် စခန်း (၃) ခုကို တပ်ဆုတ်ခိုင်းထားကြောင်း သိရသည်။
ထိုသို့ တပ်ကို မဆုတ်သွားပါက တိုက်ပွဲဖြစ်ပွားနိုင်ကြောင်း သိရသည်။ အလားတူ ရှမ်းပြည်တိုးတက်ရေးပါတီ/ရှမ်းပြည်တပ်မတော် (SSPP/SSA) ၏ ပြောခွင့်ရ ဗိုလ်မှူးကြီး စိုင်းဆု က မည်သည့်အကြောင်းမျှ တပ်စခန်းကို တပ်ဆုတ်သွားမည်မဟုတ်ကြောင်း၊ အကယ်၍ စစ်ထိုးလာပါက တိုက်ပွဲဖြစ်ရန် အသင့်ဖြစ်ကြောင်း သျှမ်းသံတော်ဆင့်ကို ပြီးခဲ့သည့် ဇွန်လ ၈ ရက်နေ့က ဖြေကြားခဲ့ဖူးသည်။
ယနေ့ ဇွန် ၃၀ ရက်တွင် SSPP ပြောရေးဆိုခွင့်ရှိသူများကို သျှမ်းသံတော်ဆင့် မှ ဆက်သွယ်ခဲ့သော်လည်း ဖုန်းလက်ခံ ဖြေကြားပေးခြင်းမရှိပေ။
သို့သော်လက်ရှိမှာ ပြည်သူများက တိုက်ပွဲဖြစ်ပွားမည်ကို စိုးရိမ်နေလျက်ရှိကြောင်း သိရသည်။
“ကျမတို့ ပြည်သူတွေလည်း တိုက်ပွဲဖြစ်မှာ ကြောက်တယ်။ စိုးရိမ်တယ်လေ။ ဘယ်ချိန် သေနတ်သံတွေ ကြားရမလဲမသိဘူး။ အခုချိန်ထိတော့ သေနတ်သံတွေ မကြားရသေးဘူး။ တိုက်ပွဲဖြစ်ရင်လည်း အထုတ်ပြင်ပြီးတော့ ထွက်ပြေးဖို့ပဲရှိတော့တယ်” ဟု ဒေသခံ အသက် ၃၀ နှစ်အရွယ်ရှိ အမျိုးသားတစ်ဦးက ပြောသည်။
ယနေ့ နောက်ဆုံးအဖြစ်သတ်မှတ်ထားသော်လည်း လက်ရှိသတင်းရေးသားချိန်အထိ တိုက်ပွဲဖြစ်ပွားနေလျက် မရှိသေးကြောင်း သိရသည်။
နေပြည်တော်သို့ ငြိမ်းချမ်းရေးဆွေနွေးပွဲကို စစ်ကောင်စီ ဥက္ကဌ ဗိုလ်ချုပ်မှူးကြီး မင်းအောင်လှိုင် ဖိတ်ခေါ်ထားသည့် ငြိမ်းချမ်းရေး ဆွေးနွေးပွဲကို ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) မှ နေပြည်တော်သို့ မသွားရသေးကြောင်း သိရသည်။
Leave a Comments