သျှမ်းပြည်တောင်ပိုင်း လင်းခေးမြို့မှ လောင်းကစားဝိုင်းအတွင်း သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) တပ်ဖွဲ့မှ စစ်အင်အား လာရောက်ပြပြီးနောက် ပိတ်သိမ်းသွားရကြောင်း စုံစမ်းသိရသည်။

ပြီးခဲ့သည့် ဇွန်လ ၂၄ ရက်တွင် (RCSS/SSA) တပ်ဖွဲ့တို့မှ စစ်အင်အားလာရောက်ပြသပြီးနောက် လောင်းကစားဝိုင်းများ အားလုံး ပိတ်သိမ်းရန်လည်း ပြောဆိုခဲ့ကြောင်း ဒေသခံများထံမှ သိရသည်။

“RCSS/SSA တပ်ဖွဲ့က လောင်းကစားဝိုင်း လုပ်တဲ့နေရာကို အင်အားသွားပြတယ်၊ ပိတ်သိမ်းဖို့လည်း ပြောလိုက်တဲ့အခါတော့ လောင်းကစားဝိုင်း ပိတ်သွားပါတယ်၊ အခုဆို ခုံတွေ ပစ္စည်းတွေသိမ်းပြီးပြီ” ဟု အသက် ၄၀ ကျော် အရွယ်ရှိ လင်းခေးဒေသခံ အမျိုးသားတစ်ဦးက သျှမ်းသံတော်ဆင့် ကိုပြောသည်။

တစ်လကျော်ကြာ ဖွင့်လှစ်လာသည့် လောင်းကစားဝိုင်းကြောင့် ပြည်သူများ အိမ်တွင်းရေး ပြဿနာ များပြား လာခြင်းနှင့် ဝမ်းစာရှာဖွေရေး ထိခိုက်လာကြောင်း ဒေသခံပြည်သူများ ညဉ်းထွားပြောဆိုပြီး နောက်ပိုင်း RCSS/SSA တပ်ဖွဲ့မှ စစ်အင်အားပြကာ ပိတ်သိမ်းခြင်းဖြစ်ကြောင်း သိရသည်။

အဆိုပါ လောင်းကစားဝိုင်းသည် လင်းခေးမြို့နယ် တန်စန့်ကျေးရွာအုပ်စုတွင် စစ်ကောင်စီလက်အောက်ခံ ထွေ/ အုပ်နှင့် ဌာနဆိုင်ရာများမှတစ်ဆင့် ကျေးရွာအုပ်ချုပ်ရေးမှူးများထံသို့ ညွှန်ကြားချက်ထုတ်ကာ ပိုက်ဆံရှိသူများနှင့် ဌာနေပြည်သူ့စစ်တပ်ဖွဲ့များ ပူးပေါင်းဖွင့်လှစ်ထားကြောင်း သိရသည်။

“အစတုန်းကတော့ ဘုရားထီးတော်တင်ပွဲကို အကြောင်းပြပြီး လာဖွင့်တာပေါ့၊ လောင်းကစားဝိုင်း စည်လာအောင် စစ်ကောင်စီဘက်က ဖျော်ဖြေရေးတွေတောင် ခေါ်ပေးတာ၊အခုတော့ RCSS/SSA တွေက လာပြောလို့ ၂၄ ရက်ကတည်းက ပိတ်သိမ်း သွားရပြီ၊ ဒါက ဒေသအတွက်တော်တော်ကောင်းတယ်” ဟု လည်း လင်းခေးမြို့ ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

စစ်တပ်မှ နိုင်ငံတော်အာဏာသိမ်းပြီးနောက်ပိုင်း သျှမ်းပြည်နေရာအနှံ့တွင် လောင်းကစားဝိုင်းများ ပေါများလာသည့် အတွက် ယခုကဲ့သို့ ဒေသအလိုက် တိုင်းရင်းသား လက်နက်ကိုင်များမှ ကူညီပြီး တားမြစ်မှုများ ပြုလုပ်ပေးရန် တောင်းဆိုလိုကြောင်းလည်း လင်းခေးလူငယ်တစ်ဦး ကဆက်ပြောသည်။

“ဒေသအလိုက်လုပ် နေတဲ့ လောင်းကစားဝိုင်းတွေကို အခုလိုမျိုး တိုင်းရင်းသားလက်နက်ကိုင်တွေ ကူတားမြစ် ပေးမယ်ဆိုရင် တော်တော်ကို ကောင်းပါတယ်၊ ဒီလောင်းကစားဝိုင်းတွေက ဒေသအတွက် ဘာမှကောင်းကျိုးမပေး တဲ့အပြင် လူငယ်တွေရဲ့ အကျင့်စာရိတ္တတွေကိုလည်းပျက်စေတယ်၊ တိုင်းရင်းသားလက်နက်ကိုင်တွေ ကိုယ့်နယ် မြေအလိုက် လောင်းကစားတွေကို တားမြစ်သင့်တယ်” ဟု အသက် ၂၀ ကျော် အမျိုးသမီး တစ်ဦးက သျှမ်းသံတော်ဆင့်ကို ပြောသည်။

စစ်ကောင်စီ အာဏာသိမ်းယူပြီးနောက်ပိုင်း ဒေသအတွင်းဖွံ့ဖြိုးတိုးတက်မှုများ လုပ်ဆောင်ခြင်းမရှိသည့် အပြင် လူငယ်များ နိုင်ငံရေး စိတ်ဝင်စားမှု မရှိစေရန် လောင်းကစားဝိုင်းများ၊ မူးယစ်ဆေးဝါးများ ပေါများသည်ထက် ပေါများလာအောင် လုပ်ဆောင်နေကြောင်းလည်း ဒေသခံများက ပြောသည်။