သျှမ်းပြည်မြောက်ပိုင်း ကျောက်မဲမြို့ တွင် တစ်လနီးပါးဖွင့်လှစ်သည့် လောင်းကစားကြောင့် လူငယ်များ အကျင့်စရိုက် ပျက်စီးလာကြောင်း စုံစမ်းသိရသည်။
ကျောက်မဲမြို့အတွင်း ရပ်ကွက် (၆) ရှိ စစ်အာဏာရှင် လက်အောက်ခံ အရာရှိများက လောင်းကစားရုံများကို စိတ်ကြိုက်ဖွင့်လှစ်ပေးပြီး လူငယ်များက လောင်းကစား သွားရောက်ကာ မူးယစ်ဆေးဝါးများသုံးစွဲလာပြီး အကျင့်စရိုက်များ ပျက်စီးလာသဖြင့် လုံခြုံရေးလည်း စိုးရိမ်နေရကြောင်း ကျောက်မဲဒေသခံ အသက် ၄၅ နှစ် အရွယ်ရှိ စိုင်းလှမောင် က သျှမ်းသံတော်ဆင့်ကို ပြောသည်။
“ကျောက်မဲ လောင်းကစားက တစ်လနီးပါး ရှိပြီ။ အရင်က သူတို့ ပိန်းနင်ကျေးရွာမှာ လုပ်တာ၊ အခုက ရပ်ကွက် (၆)ကို ရွေ့လာတယ်။ လောင်းကစားကို ဖွင့်လာပြီးနောက် သူခိုး၊ ဓားပြတွေ မူးယစ်ဆေးဝါး သုံးစွဲတဲ့ သူတွေ အရင်ကထက် ပိုပြီးများလာတယ်၊ လုံခြုံရေးအတွက်လည်း စိုးရိမ်ရတယ်” ဟု ၎င်းက ပြောသည်။
အဆိုပါ ကျောက်မဲမြို့ ရပ်ကွက် (၆) ရှိ လောင်းကစားရုံကို ရပ်ကွက် (၈) သို့ပြောင်းရွေ့ရန် အစီအစဥ်ဆွဲ ထားသော်လည်း ၎င်းရပ်ကွက် (၈) ပြည်သူက လုံခြုံရေး၊ သူခိုး၊ လုယက်မှုကို စိုးရိမ်သဖြင့် လက်မခံ ကြောင်း အသက် ၆၀ ကျော်ရှိ ကျောက်မဲရပ်ကွက် (၈) တွင်နေထိုင်သည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
“လောင်းကစား ဆိုတာ ဘယ်တော့မှ ကောင်းတဲ့အရာထဲမှာ မဟုတ်ဘူး ၊ မရှိသင့်ဘူး ရှိရင်လည်း လူငယ်တွေပိုပြီး အကျင့်ပျက်စေတယ်။ မရှိသင့်၊ မဆော့ကောင်းတာကို ရှိလာတော့ ဆော့တဲ့သူအားလုံး ကြီး ၊လတ် ၊ငယ် အရွယ်တွေ ဆော့ကြတယ်လေ။ သူခိုး ဓားပြတွေလည်း အရမ်းများလာအောင် လုပ်တာပဲ”ဟု အထက်ပါ အမျိုးသား က ပြောသည်။
ကျောက်မဲမြို့နှင့် အလားတူ ကွတ်ခိုင်မြို့၊ သီပေါမြို့၊ လားရှိူးမြို့ နှင့် နောင်ချိုမြို့ အပြင် သျှမ်းပြည်အတွင်း မြို့နယ်များတွင်လည်း လောင်းကစားများ တစ်နေ့ထက် တစ်နေ့များလာသည်။
ထိုလောင်းကစားဖွင့်လှစ်သည့် သူများသည် အာဏာသိမ်းစစ်ကောင်စီ လက်အောက်ခံ ဌာနဆိုင်ရာများနှင့် ပူးပေါင်းဆောင်ရွက်နေကြပြီး တစ်ချို့ဒေသမှာ ပြည်သူ့စစ်တပ်ဖွဲ့များက ဦးဆောင်ပြီး ဖွင့်လှစ်နေကြောင်း သိရသည်။
