သို့- သျှမ်းသံတော်ဆင့်

စက်တင်ဘာလ ၂၀ ရက်နဲ့ ၂၁ ရက်နေ့မှာ ရှမ်းပြည်နယ်ဝန်ကြီးချုပ်က ကျမတို့ လင်းခေးခရိုင်ဘက် ကိုလာပြီး ဒေသခံလူထုနဲ့တွေ့ဆုံမယ်လို့ကြားကတည်းက ကျမတို့ အရမ်းဝမ်းသာခဲ့ကြတယ်။ ဘာလို့လဲဆိုတော့ ဒီလူထုအစိုးရကို ကျမတို့ ပြောဆိုတင်ပြချင်တာ ကို အကုန်တင်ပြမယ်။ အစိုးရကလည်း ကျမတို့လိုအပ်ချက်ကို အပြည့်အဝ ဆောင်ရွက်ပေးနိုင်မယ်လို့ယုံကြည်တယ်လေ။ ဒါပေမယ့်လက်တွေ့မှာကျတော့ အစိုးရက ကျမတို့ကို အထဲန်းရှင်း အာရုံစူးစိုက်မှု သိပ်ပေးမသွားခဲ့ပါဘူး။

၀န်ကြီးချုပ်ကဘဲ ခရီးစဉ်ကြောင့်ပင်ပမ်းတာလား၊ သို့မဟုတ် ဘာအခက်အခဲတခုခုရှိနေသလဲ ..စသဖြင့် ၀န်ကြီးရဲ့ မျက်နှာအနေအထားကိုကြည့်ရင် တွေးစရာဖြစ်လာစေပါတယ်။ အချိန်သိပ်မရဘူးလို့ဘဲဝန်ကြီးချုပ်က ပြောသွားပါတယ်။

တကယ်တော့ဝန်ကြီးဟာ စက်တင်ဘာ ၂၀ ရက်နေ့မှာ လင်းခေးကိုဖြတ်ပြီး မိုင်းပန်ကိုအရင်သွားပါတယ် ။ မိုင်းပန်လူထုနဲ့တွေ့ဆုံရာမှာ ၀န်ကြီးချုပ်ဟာ တက်ကြွရွှင်လန်းမှုရှိတယ်၊ အထူးစိတ်ပါ၀င်စားမှု ရှိတယ်။ အထူးဘဲ အထဲန်းရှင်းပေးတာကို မိုင်းပန်သားတွေတင်လာတဲ့ ဓါတ်ပုံတွေမှာကြည့်ရင်တောင် တွေ့ရပါတယ်။ ပြီးတော့ မိုင်းပန်စာပေယဉ်ကျေးမှုအဖွဲ့ကို ငွေကျပ် ၁၀ သိန်း ကူညီထောက်ပ့ံတယ်လို့လည်းတွေ့ရပါတယ် ။ ကျမတို့အရမ်းလည်းဝမ်းသာပြီး သာဓုခေါ်မိပါတယ်။

တကယ်တမ်း ၂၁ ရက်နေ့ လင်းခေးလူထုနဲ့တွေ့ဆုံရာမှာတော့ ၀န်ကြီးချုပ်ဟာ ပင်ပမ်နွမ်းနယ်နေတာ ကိုတွေ့ရပြီး၊ ဒေသခံလူထုကိုယ်စားလှယ် ၃ ယောက်တင်ပြချက်တွေဖြစ်တဲ့ လမ်းတံတား၊ လျှပ်စစ်မီး၊ ကျောင်းဆောင်သစ်၊ ကုတင် ၁၀၀ ဆန့်ဆေးရုံ၊ ဆေးသိုလှောင်ရုံနဲ့ ၀န်ထမ်းအိမ်ယာ၊ မြို့နယ်ရှမ်းစာပေ ယဉ်ကျေးမှုအသင်းအဆောက်အဦးဆောက်လုပ်ဖို့ စတဲ့ လိုအပ်ချက်တွေကိုလည်း ၀န်ကြီး ချုပ်က ပြည်သူတွေကိုတတ်နိုင်သလောက် ဖြည့်ဆည်းပေးပါ့မယ်၊ ကြိုးစားပေးပါ့မယ် – လို့ဘဲပြော သွားပါ တယ်။

ဒေသအတွင်း ကွင်းဆင်းစစ်ဆေး ကြည့်ရှုပေးတာမရှိဘူး။ မြန်မာနိုင်ငံမှာ အကြီးမားဆုံးရေတံခွန် နဲ့ လျှပ်စစ်ထုတ်ပေးနေတဲ့စီမံကိန်း လင်းခေးမှာရှိတယ်။ အဲဒီဒေသမှာရှိနေတဲ့ကျေးရွာတွေ လျှပ်စစ်မီးမရသေးဘူး။ အဲတာတွေကို ၀န်ကြီးက သွားကြည့်ချိန်မရလိုက်ဘူး။ လူထု အသင်းအဖွဲ့တွေနဲ့လဲ တွေ့ဆုံသင့်တယ်လို့ မြင်မိတယ်။

အဲတာနဲ့ပတ်သက်ပြီး လူထုအများစုကတော့ပြောနေကြပါတယ်။ ၀န်ကြီးက အဖွင့်နဲ့အပိတ်မိန့်ခွန်း ပြောဖို့လောက်ဘဲလာတာလားပေါ့။

ဒါပေမယ့် ၀န်ကြီးချုပ်အနေနဲ့ လူထုကို ဘာတွေ လိုအပ်ချက်တွေအထူးလိုအပ်နေသလဲ။ ကျနော် ဘယ်လိုကူညီရမလဲလို့မေးရင်၊ ပေးရင် ပိုကောင်းတာပေါ့ မဟုတ်ဘူးလား။ အခုက ကျမတို့အမြင်အရတော့ ဘာမှ ပေးမသွားဘူး။ လာလည်ရုံသက်သက်ပါဘဲ။

အကောင်းဘက်ကတွေးရင်တော့ ၀န်ကြီးချုပ်က ကျမတို့ဆီလာတာတော့ အရမ်းကောင်းပါတယ်။ ၁ အချက်က ၀န်ကြီးချုပ်လာမယ်ဆိုတော့ မြို့တွင်း သန့်ရှင်းရေးလုပ်ကြတော့ သန့်ရှင်းသာယာတာပေါ့။ ၂ အချက်က လူမှုအသင်းအဖွဲ့တွေ လွှတ်တော်အမတ်တွေ ရပ်ရွာလူကြီးတွေ တွေ့ဆုံဆွေးနွေးလက်တွဲဆောင်ရွက်ကြရတော့ နီးစပ်မှုရှိတဲ့အတွက် ကောင်းတာပေါ့။ ၃ အချက်က ၀န်ကြီးချုပ်က ကျမတို့ဆီလာတယ်ဆိုတော့ လူထုနဲ့ ၀န်ကြီးချုပ်က ရင်းနှီးမှုရရှိတယ်။ လူထုပြောချင်တာတွေ ကိုယ်တိုင်ပြောရတော့ ကျေနပ်မှုရှိတာပေါ့။ နောက်ပြီး မဟာဝိဟာရ ပရိယတ္တိ စာသင်တိုက်ထဲမှာ ကျောင်းဆောင်သစ်တိုးချဲ့တည်ဆောက်ဖို့အတွက် ပန္နက်ရိုက်ပေးတယ်။ အထက ကျောင်းဝင်းထဲမှာ ကျောင်းဆောင်သစ်ထပ်ဆောက်ဖို့ ပန္နက်ရိုက်ပေးတယ်။ အဲတာတွေတော့ကောင်းပါတယ်။

ဒါကြောင့် ၀န်ကြီးချုပ်ကို ကျမတို့ဆီ ခနခန လာလည်ပေးပါလို့ တောင်းချင်တယ်။ အဓိကကတော့ ကျမတို့လူထုနဲ့ ၀န်ကြီးချုပ်နဲ့ ရင်းနှီးမှုရအောင်ပါ။ ရင်းနှီးမှုရရင် လူထုဘာတွေတကယ်လိုအပ်နေသလဲဆိုတာ ၀န်ကြီးချုပ်တို့ အစိုးရတွေ သိလာပါလိမ့်မယ်။

နောက်နှစ်တွေမှာ လင်းခေးထပ်လာလည်မယ်ဆိုရင် ကျမတို့လူထုကို ဒီထက်မက ပိုမိုတဲ့ကျေနပ်မှုတွေ ပေးနိုင်လိမ့်မယ်လို့ မျှော်လင့်လျှက်…..

ယိင်းအွန်ဟတ် ဆောဝ်လန်းခေး
စက်တင်ဘာလ ၂၂ ရက် ၂၀၁၇