သျှမ်းပြည်တောင်ပိုင်း လွိုင်လင်ခရိုင် အတွင်းရှိ ကျေးရွာဒေသခံ တစ်ချို့ မိမိလုံခြုံရေးအတွက် စိုးရိမ်ထိတ်လန့်စွာ နေထိုင်နေရကြောင်း စုံစမ်းသိရှိရသည်။
လွိုင်လင်ခရိုင်အတွင်းရှိ မိုင်းကိုင်မြို့နယ်၊ လဲချားမြို့နယ်၊ လွိုင်လင်မြို့နယ်အတွင်းမှ ကျေးရွာဒေသခံများသည် မိမိလုံခြုံရေးအတွက် စိုးရိမ်ထိတ်လန့်စွာဖြင့် နေထိုင်နေရကြောင်း စုံစမ်းသိရှိရသည်။
အဆိုပါ (၃) မြို့နယ် အတွင်းနေထိုင်သည့် ပြည်သူများက လက်နက်ကိုင်အုပ်စုများကို ကြောက်လန့်နေရပြီး ည ၉ နာရီတွင် မီးပိတ်ထားရပြီး မနက် ၄ နာရီခွဲမှ အိမ်ပြင်ထွက် သွားလာခွင့်ရကြောင်း ဒေသခံများ ပြောပြချက်အရ သိရသည်။
“အခုတလော ကျနော်တို့ ဒေသတွေမှာ အရမ်းကို ရှုပ်နေတယ်။ အရမ်းကို ကြောက်နေရတယ်။ စိုးရိမ်စိတ်တွေနဲ့ နေနေရတယ်။ ညဆိုရင်လည်း ၉ နာရီဆို မီးပိတ်ပြီးတော့ အပြင်မသွားရတော့ဘူး။ မနက် ၄ နာရီခွဲမှပဲ အိမ်ပြင်ထွက်ပြီး ဆွမ်းတွေ သွားပို့ရတယ်” ဟု ဒေသခံအမျိုးသမီးတစ်ဦးက ပြောသည်။
ထိုကြောင့် (၃) မြို့နယ်အတွင်းရှိ ဒေသခံများက မိမိလုံခြုံရေးကြောင့် ကိုယ်တိုင်တာဝန်ယူဖြေရှင်းနေရလျက် ရှိကြောင်း သိရသည်။
“ဟုတ်တယ်။ ကျနော်တို့ လုံခြုံမှုမရှိဘူး။ ကိုယ်ကိုယ့်လုံခြုံရေးယူနေရတာ” ဟု အသက် ၂၅ နှစ်ဝန်းကျင်အရွယ် အမျိုးသားတစ်ဦးက ပြောသည်။
ထိုဒေသ (၃) မြို့နယ်အတွင်းမှာ ည ၉ နာရီကျော်သွားပါက အပြင်ထွက်သွားလာခွင့်မရကြောင်း အကယ်၍ သွားလာပါက ဖမ်းဆီးခံရမည်ဖြစ်ကြောင်း သိရသည်။
ထို့အပြင် မိမိနေထိုင်သည့် ကျေးရွာများထဲတွင် ဗုံးပေါက်ကွဲမှု၊ ပစ်ခတ်မှုလုံးဝ မရှိစေရကြောင်း ၊ ရှိခဲ့ပါက ဖမ်းပြီးစစ်ဆေးခံရမည် ဟုလည်း လှုပ်ရှားနေသည့် တပ်ဖွဲ့က ပြည်သူများကို ပြောသည်။
“ ကျနော်တို့ ဒေသတွေမှာက အခုဆိုရင် ည ၉ နာရီဆိုရင်အပြင်မထွက်ရတော့ဘူး။ ထွက်လို့တွေ့ရင်လည်း ဖမ်းခံရမယ်တဲ့။ ပြီးတော့ ရပ်ရွာအတွင်းတွေမှာလဲ ဗုံးပေါက်ကွဲသံတွေ၊ သေနတ်သံတွေ၊ ပစ်ဖောက်သံတွေ မရှိစေရဘူးလို့ ပြောထားတယ်။ တကယ်လို့ အဲ့လိုအသံတွေထွက်ခဲ့မယ်ဆိုရင် သူတို့က ဖမ်းဆီးသွားမယ်တဲ့။ ဖမ်းပြီးစစ်ဆေးခံရမယ်တဲ့” ဟု အမည်နှင့် နေရာမဖော်လိုသည့် ဒေသခံအမျိုးသမီးတစ်ဦးက ပြောသည်။
ထိုဒေသတွင်းများတွင် မြောက်ပိုင်းမဟာမိတ်တပ်ဖွဲ့ မှ သွားလာလှုပ်ရှားနေသည့် ဒေသဖြစ်ပြီး၊ “ဝ” တပ်ဖွဲ့များလည်း ထိုနေရာတွေမှာ ရှမ်းပြည်တိုးတက်ရေးပါတီ SSPP ဝတ်စုံပြောင်းပြီး သွားလာလှုပ်ရှား နေကြောင်း လည်း ဒေသခံများ ပြောပြချက်အရ သိရသည်။
ပြီးခဲ့သည့် ဖေဖော်ဝါရီ ၁၆ ရက်နေ့ကလည်း ရှမ်းအမျိုးသမီးရေးရာလှုပ်ရှားဆောင်ရွက်မှုအသင်း (SWAN) ၏ အစီရင်ခံစာအရ မိုင်းကိုင်မြို့နယ်တွေမှာ “ဝ” တပ်ဖွဲ့က အင်အားတိုးချဲ့လာပြီး ဒေသတွင်းရှိ အမျိုးသမီးများကို အတင်းအဓမ္မလက်ထပ်ယူပြီး လိင်ပိုင်းဆိုင်ရာ အကြမ်းဖက်၊ မုဒိမ်းကျင့်မှုတွေ ပြုလုပ်နေကြောင်း ရေးသားထားသည်။
အလားတူ ပြီးခဲ့သည့် ဇွန် ၁၆ ရက်တွင် မိုင်းကိုင်မြို့နယ် ခွန်မတ်မုံကျေးရွာအတွင်းရှိ ဒေသခံ ၂၇ ဦးကို ရှမ်းပြည်တိုးတက်ရေးပါတီ SSPP/SSA မှ ဖမ်းဆီးခေါ်ဆောင်သွားခဲ့ကြောင်း သိရသည်။
ထိုသို့ ဖမ်းဆီးသွားပြီးနောက် ညနေပိုင်းတွင် ၂၀ ဦးကို ပြန်လွတ်လာပေးပြီး လက်ရှိအချိန်ထိ ၇ ဦးကို ဖမ်းဆီးထားဆဲဖြစ်ကြောင်း သိရသည်။
အဆိုပါ ၂၇ ဦးကို ကျေးရွာအနီး ဗုံးပေါက်ကွဲမှုကြောင့် ဖမ်းဆီးသွားကြောင်း သိရသည်။ ထိုပြန်လွတ်လာသည့် ပြည်သူ ၂၀ ဦးထဲတွင် တစ်ချို့သူများက နှိပ်စက်ခံခဲ့ရကြောင်း သိရသည်။
“ သူတို့က ရွာပတ်ဝန်းကျင်မှာ ဗုံးပေါက်လို့ဆိုပြီးတော့ ဖမ်းခေါ်သွားတာ။ ၂၇ ယောက်ဖမ်းသွားတာ။ ၂၀ ယောက်တော့ ပြန်လွတ်လာပေးတယ်။ ပြန်လွတ်လာတဲ့သူတွေကလည်း ရိုက်ခံရပြီး နှိပ်စက်ခံထားရတာ တွေရှိတယ်။ သိရသလောက်တော့ ၃ ယောက်လောက်တော့ နှိပ်စက်ခံထားရပြီးတော့ ပြန်လွတ်လာတာ” ဟု အမည်မဖော်လိုသည့် ဒေသခံအမျိုးသားတစ်ဦးက ပြောသည်။
ထိုကြောင့် ထိုမြို့နယ် အတွင်းရှိ လူငယ်များနှင့် လူကြီးပိုင်းအများစုက အိမ်နီးချင်းနိုင်ငံ ထိုင်းနိုင်ငံသို့ ထွက်ပြေးနေလျက်ရှိကြောင်း မြေပြင် သတင်းပေးပို့ချက်အရသိရသည်။
“ အခုဆို လူတော်တော်များကလည်း ထိုင်းနိုင်ငံကို ထွက်ပြေးသွားကြပြီ။ ပြီးတော့ ဒေသခံတွေက အရမ်းကိုကြောက်နေကြရတယ်လေ။ ဒါကြောင့် အများစုတော့ ထွက်ပြေးကုန်ကြပြီး” ဟု ၎င်းအမျိုးသားက ပြောသည်။
ထိုဒေသတွင်နေထိုင်သည့်သူများကိုလည်း သတင်းဌာနသို့ သတင်းပေးပို့ပါက ဖမ်းဆီး စစ်ဆေးမည် ဟုဆိုပြီး မြေပြင်လှုပ်ရှားနေသည့် တပ်သားများက ပြည်သူများကို ခြိမ်းခြောက်ပြောဆိုထားသည်။ သက်ဆိုင်ရာတပ်ဖွဲ့မှ အထက်လူကြီးများမှ အောက်ခြေ တပ်သားများ၏ အခြေအနေကို သိရှိရန် လိုအပ်ကြောင်းလည်း ပြည်သူများက ပြောဆိုလိုက်သည်။
