သျှမ်းပြည်မြောက်ပိုင်း သီပေါမြို့နယ် အတွင်း တအာင်း(ပလောင်) အမျိုးသား လွတ်မြောက်ရေး တပ်မတော် (TNLA) တပ်ဖွဲ့မှ ရွာသူကြီးကို ဆက်ကြေးကောက်ခိုင်းနေကြောင်း စုံစမ်းသိရှိရသည်။
ဇွန်လ ၂၀ ရက်တွင် TNLA တပ်ဖွဲ့သည် သီပေါမြို့နယ်အတွင်းရှိ ကျေးရွာတခုမှ ရွာသူကြီးဆီရောက်လာပြီး ရွာသူ၊ရွာသားများထံ ဆက်ကြေးကောက်ခိုင်းကြောင်း သိရသည်။
“ သူတို့ရွာသူကြီး နားလာပြီးတော့ ဆက်ကြေးကောက်ခိုင်းတာ။ သူတို့ရွာထဲဝင်လာတာတယ်။ ရွာသူကြီးအိမ် ထဲကိုလာတာ။ TNLA တပ်ဖွဲ့က လာကောက်ခိုင်းတာပါ။ သူတို့ ဆက်ကြေးကောက်ပေးဖို့ ပြောပြီးတော့ ပြန်သွားတာပဲ” ဟု သီပေါမြို့နယ် အမည်မဖော်လိုသူ တစ်ဦးက သျှမ်းသံတော်ဆင့်ကို ပြောသည်။
အဆိုပါ TNLA တပ်ဖွဲ့မှ ဆက်ကြေးကောက်ခိုင်းသောကြောင့် ဒေသခံများ နှင့် စီးပွားရေးလုပ်ကိုင်သူများ အနေလည်း စိုးရိမ်နေကြောင်း သိရသည်။
“ သူတို့တွေကဆိုးတယ်။ ဆက်ကြေးကို အတင်းကောက်ခိုင်းတာ။ မကောက်ပေးရင်လည်း ရွာသူကြီးတွေကို ဖမ်းတတ်တယ်။ မြို့ထဲက ပွဲစားလုပ်ငန်းရှင်တွေကိုလည်း စာလာပေးပြီး ငွေကောက်တယ်။ ဒေသခံတွေကလည်း မပေးရင် မနေရဲကြဘူး။ သီပေါမှာ သူခိုးလုယက်မှုက တစ်မျိုး ဆက်ကြေးကောက်တာက တစ်မျိုးနဲ့ စိတ်မချမ်းသာလိုက်တာ။ စိုးရိမ်ကြောက်လန့်နေရပါတယ်” ဟု အထက်ပါ ဒေသခံ တစ်ဦးက ပြောသည်။
အဆိုပါ ကိစ္စနှင့်ပတ်သက်ပြီးတော့ ကျေးရွာအတွင်းရှိ ရွာသူကြီးကို သျှမ်းသံတော်ဆင့် ကဆက်သွယ်ရန် ကြိုးစားခဲ့ သော်လည်း ဆက်သွယ်ခွင့်မရခဲ့ပေ။
သို့သော် သီပေါမြို့နယ်အတွင်း နေထိုင်သည့် အမျိုးသမီးတစ်ဦးက “ ဒီချိန်မှာပြောလည်း ဘယ်သူမှ လုံခြုံရေးအတွက် တာဝန်ယူနိုင်တာမဟုတ်တဲ့အတွက်ကြောင့် ဘာမှ ပြောလို့မရသေးဘူး” ဟု သျှမ်းသံတော်ဆင့်ကို ပြောသည်။
ထိုအခွန်ဆက်ကြေးကိစ္စနှင့်ပတ်သက်ပြီး TNLA ပြောခွင့်ရ ဗိုလ်မှူးကြီး မိုင်းအိုက်ကျော် ကို သျှမ်းသံတော်ဆင့် သတင်းဌာနမှ ဖုန်း ၂ ရက်ဆက်တိုက် ဆက်ခဲ့ပေမယ့် လက်ကိုင်ဖြေကြားခဲ့ခြင်းမရှိပါ။
TNLA တပ်ဖွဲ့မှ သီပေါမြို့နယ်ထဲ ယခုလို ဆက်ကြေးကောက်ခြင်းသည် ပထမဆုံးဖြစ်ပြီး၊ ညောင်ကိုးပင်ကျေးရွာ ထဲတွင် သျှမ်းတိုင်းရင်းသားအများစု နေထိုင်ကြောင်း သိရသည်။
