စစ်ကိုင်းတိုင်း ဒေသကြီး ဗန်းမောက်မြို့နယ် ဒေသအခြေစိုက် ပြည်သူ့ကာကွယ်ရေး PDF တပ်ဖွဲ့မှ ဖမ်းဆီးသွားသည့် သျှမ်းနီစာပေနှင့်ယဥ်ကျေးမှု ဖွံ့ဖြိုး တိုးတက်မှု တာဝန်ခံ စိုင်းကျန်အောင် (ခ) စိုင်းဆေလိုင်းကို ပြန်လွှတ်ပေးရန် သျှမ်းလူမှုအဖွဲ့အစည်းများ ထုတ်ပြန်တောင်းဆိုထားသည်။

ဗန်းမောက်မြို့နယ်မှ သျှမ်းနီစာ/ယဥ် တာဝန်ခံကို ပြီးခဲ့သည့် ဇွန် ၁၉ ရက် ညအချိန်တွင် PDF တပ်ဖွဲ့မှ သေနတ်များ ပစ်ဖောက်ကာ ဖမ်းဆီးခေါ်ဆောင်သွားကြောင်း သတင်းသိရသည်။

“သိရသလောက်တော့ သူ့ကို ဘုန်းကြီးကျောင်းဝင်းထဲမှာ လာဖမ်းသွားတယ်လို့သိရတယ်၊ သေနတ်ပစ်ပြီးတော့ ဖမ်းတာတဲ့၊ နောက်တစ်ခုက ဘုန်းကြီးကျောင်းဝင်းထဲမှာလေ၊ ဒီလိုမလုပ်ကောင်းဘူးလို့ထင်တာပဲ၊ သူက ရာဇဝတ်သားလည်း မဟုတ်ဘူးလေ” ဟု ဗန်းမောက်မြို့နယ် သျှမ်းနီ စာ/ယဥ် အဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။

ယင်းကဲ့သို့ အကြောင်းမဲ့ မတရားဖမ်းဆီးခံထားရသည့် သျှမ်းနီ စာ/ယာဥ်တာဝန်ခံ ကို ဘေးကင်းလုံခြုံစွာနဲ့ အမြန်ဆုံး ပြန်လွတ်ပေးရန် ထုတ်ပြန်တောင်းဆိုလိုက်ခြင်းဖြစ်ကြောင်း သျှမ်းလူမှုအဖွဲ့အစည်းမှ ပြောရေးဆိုခွင့်ရှိသူက သျှမ်းသံတော်ဆင့်ကို ပြောသည်။

“ဘာကြောင့်ဖမ်းသလဲဆိုတာကို မပြနိုင်ရင် ဒါကလက်နက်ရှိတဲ့သူက လက်နက်မရှိတဲ့သူကို လက်နက်ပြ အနိုင် ကျင့်နေတာနဲ့ အတူတူပဲ၊ သူဟာ (စိုင်းဆေလိုင်း) အရပ်သား ပြည်သူသာဖြစ်တယ်၊ သျှမ်းလူမျိုးလည်း ဖြစ်နေတယ်၊ ဒါကြောင့် ဖမ်းဆီးထားတဲ့ အဖွဲ့အစည်းတွေ ပြန်လွှတ်ပေးဖို့ တောင်းဆိုတာ ဖြစ်ပါတယ်” ဟု သျှမ်းလူမှုအဖွဲ့အစည်းမှ ပြောရေးဆိုခွင့်ရှိသူ စိုင်းလွိုင်က သျှမ်းသံတော်ဆင့်ကိုပြောသည်။

စိုင်းကျန်အောင် (စိုင်းဆေလိုင်း) ကို လာရောက်ဖမ်းဆီးသည့် လက်နက်ကိုင်တပ်ဖွဲ့တို့သည် စစ်ဆေးရန်လိုအပ်သည်ဟု လည်းပြောဆိုသည့်အတွက် ရိုက်နက်မှုများရှိမည်ကိုစိုးရိမ်ကြောင်း ၎င်းက ဆက်ပြောသည်။

သျှမ်းနီလူငယ်များသည် လက်နက်ကိုင်တပ်ဖွဲ့မဟုတ်သည့်အပြင် စစ်ကောင်စီကို အားပေးထောက်ခံလုပ်နေသည့် အဖွဲ့မဟုတ်သည့်အတွက် ပြည်သူ့ကာကွယ်ရေးတပ်ဖွဲ့ PDF အမည်ခံကာ ယခုကဲ့သို့ မတရားလုပ်ဆောင်ချက်များကို မလုပ်ဆောင်သင့်ကြောင်းလည်း စိုင်းလွိုင်က ပြောဆိုထားသည်။

“ကျနော်တို့ ထုတ်ပြန်တောင်းဆိုထားတဲ့ အတိုင်း စိုင်းဆေလိုင်းကို ဖမ်းဆီးထားတဲ့ PDF တပ်ဖွဲ့တွေ သူ့ကို ဘေးကင်းလုံခြုံစွာနဲ့ အမြန်ဆုံးပြန်လွတ်ပေးပါ၊ ကျနော်တို့ကို အကျိုးအကြောင်းပြောပြပါ၊ ဒီလိုမှ မဟုတ်ဘဲနဲ့ ဘာမှ မထူးလာရင်တော့ NUG အထိ ကျနော်တို့သွားဖို့ ရှိတယ်” ဟု၎င်းကပြောသည်။

ပြီးခဲ့သည့် ဇွန်လ ၁၉ ရက်နေ့ကတည်းက ဖမ်းဆီးထိန်းသိမ်းထားခြင်းခံထားသည့် စိုင်းကျန်အောင် (ခ) စိုင်းဆေလိုင်း သည် ယနေ့ ဇွန်လ ၂၃ ရက်နေ့၊ ၄ ရက်ကြာသည်အထိ မည်သည့်နေရာ ဖမ်းဆီးခံ ထားရသည်ကို မသိရသေးကြောင်း သျှမ်းသံတော်ဆင့်ကို ပြောသည်။

စစ်တပ်မှ နိုင်ငံတော် အာဏာသိမ်းပြီးနောက်ပိုင်း နိုင်ငံတစ်ဝှမ်းလုံးတွင် တရားဥပဒေများ စိုးမိုးမှုကင်းမဲ့နေပြီး လက်နက်ပြ အနိုင်ကျင့်မှုများပြားလာသည့်အတွက် ဒေသခံပြည်သူများက လုံခြုံမှုမရှိသလို ခံစားရကြောင်းနှင့် စိုးရိမ်မှုများ မြင့်တက်နေကြောင်း သိရသည်။