ဖယ်ခုံမြို့နယ် စစ်ကောင်စီမှ တလအတွင်း ပြည်သူနေအိမ် (၅၀) ကျော် မီးရှို့ဖျက်ဆီး

0

သျှမ်းပြည်တောင်ပိုင်း ဖယ်ခုံမြို့နယ် လွယ်ပေါင်းကျေးရွာအတွင်း စစ်ကောင်စီက တစ်လအတွင်း ဒေသခံ နေအိမ် (၅၀) ကျော် မီးရှို့ဖျက်ဆီးခဲ့ကြောင်း စုံစမ်းသိရှိရသည်။

ယမန်နေ့ ည (၆) နာရီဝန်းကျင်က လွယ်ပေါင်းကျေးရွာအတွင်း ဒေသခံ ပြည်သူများ စစ်ရှောင်နေချိန် စစ်ကောင်စီမှ ပြည်သူနေအိမ် (၂) အိမ် မီးရှို့ဖျက်ဆီးခဲ့ပြီး ပစ္စည်းများလည်း ယူဆောင်သွားကြောင်း ဒေသခံတစ်ဦးက သျှမ်းသံတော်ဆင့် ကိုပြောသည်။

လွယ်ပေါင်းကျေးရွာဒေသခံ ပြည်သူနေအိမ် မီးရှို့ဖျက်ဆီးခံရ

“သူတို့ မီးရှို့ဖျက်ဆီးတဲ့နေရာက ရွာသားတွေမရှိဘူး။ အားလုံးက စစ်ဘေးရှောင်ထားကုန်ကြပြီ။ လက်ရှိ စစ်ကောင်စီတွေက ကျနော်တို့ ရွာထဲမှာ နေထားတယ်။ ပြည်သူတွေရဲ့ အိမ်ထဲက ပစ္စည်းတွေလည်း နေ့တိုင်း ဝင်မွှေတာ”ဟု လွယ်ပေါင်းကျေးရွာဒေသခံ တစ်ဦး ကပြောသည်။

လွယ်ပေါင်းကျေးရွာအုပ်စုက ဒေသခံများသည် ပြီးခဲ့သည့် မေ (၁၄) ရက်ကတည်းက စစ်ဘေး တိမ်းရှောင်ခဲ့ရပြီး လက်ရှိချိန်ထိ နေရပ်သို့ မပြန်နိုင်သေးပေ။

လွယ်ပေါင်းကျေးရွာဒေသခံ ပြည်သူနေအိမ် မီးရှို့ဖျက်ဆီးခံရ

“ပြီးခဲ့ မေလ (၁၃) ရက်နေ့ကစပြီး စစ်ကောင်စီတပ်တွေ ရွာထဲ စစ်ကြောင်းထိုးလာပြီး ဒေသခံ ရွာသားတွေရဲ့ နေအိမ် (၅၀) ကျော် မီးရှို့ဖျက်ဆီးခဲ့တယ်” ဟု လွယ်ပေါင်းကျေးရွာ ဒေသခံ တစ်ဦး ကပြောသည်။

ဖယ်ခုံမြို့နယ်အတွင်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ တို့ မေလ ကစတင်ပြီး တိုက်ပွဲပြင်းထန်သဖြင့် စစ်ရှောင်များ လက်ရှိချိန်ထိ နေရပ်သို့ မပြန်နိုင်သေးကြောင်းသိရသည်။

မေလ (၁၆) ရက်ကလည်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ (PDF) တို့တိုက်ပွဲပြင်းထန်ခဲ့ပြီး စစ်ကောင်စီမှ ဆောင်နန်းခဲကျေးရွာ တစ်ရွာလုံး မီးရှို့ဖျက်ဆီးခဲ့ကြောင်းသိရသည်။

Leave a Comments