သျှမ်းပြည်တောင်ပိုင်း ဖယ်ခုံမြို့နယ်အတွင်းရှိ စစ်ကောင်စီ နှင့် ပအိုဝ်း ပြည်သူ့စစ် (PNO) တို့သည် စစ်ရှောင်ပြည်သူ နေအိမ်များထံ ပစ္စည်းဝင်ယူသွားကြောင်း စုံစမ်းသိရသည်။
စစ်ကောင်စီ နှင့် PNO တို့သည် ဖယ်ခုံမြို့နယ် လွယ်ပေါကျေးရွာ၊ ဆောင်နန်းခဲကျေးရွာ၊ လဟယ်ကျေးရွာ နှင့် မခေခမ်းကျေးရွာတွင် တပ်ဆွဲထားပြီး စစ်ရှောင်နေကြသည့် ပြည်သူများ၏ နေအိမ်ထဲ ပစ္စည်းများဝင်ယူသွားကြောင်း ဒေသခံများ ပြောပြချက်အရသိရသည်။
“ အဲ့ရွာတွေမှာက ပြည်သူတွေ စစ်ရှောင်နေတာ။ ရွာထဲမှာ စစ်ကောင်စီ နဲ့ PNO တို့ပဲရှိတယ်။ သူတို့အဲ့ရွာထဲမှာ နေနေတာတော့ကြာနေပြီ။ ရွာထဲမှာရှိတဲ့ ပြည်သူပိုင်ပစ္စည်းတွေကိုလည်း ခိုးယူသွားနေတယ်။ အခုမှ ခိုးယူနေတာမဟုတ်ဘူး” ဟု ဖယ်ခုံမြို့နယ် ဒေသခံ အမျိုးသားတစ်ဦးက ပြောသည်။
ထိုသို့ စစ်ကောင်စီ နှင့် PNO တို့ ကျေးရွာအတွင်းရှိ ပစ္စည်းများကို ခိုးယူသယ်ဆောင်နေလျက်ရှိသောကြောင့် ဇွန်လ ၁၉ ရက်တွင် ဖယ်ခုံမြို့ပြည်သူ့ကာကွယ်ရေးတပ်ဖွဲ့ PDF ကဝင်ရောက် တိုက်ခိုက်ခဲ့ပြီး စစ်ကောင်စီ နှင့် PNO ဘက်မှ ထိခိုက်သေဆုံးမှုများရှိကြောင်း သိရသည်။
“ သူတို့က ရွာထဲမှာရှိတဲ့ပစ္စည်းတွေအကုန်လုံးကို ခိုးယူနေတာ။ ဆိုင်ကယ်အစုတ်ကိုတောင်တင်ပြီးယူသွားသေးတာ။ သူတို့တင်ပြီးတော့ ယူသွားနေချိန်မှာ ကျနော်တို့က ခြုံခိုပြီးတော့ တိုက်ခိုက်ခဲ့တယ်။ သူတို့ဘက်က သေဆုံးမှုနဲ့ ဒဏ်ရာပြင်းထန်ရတဲ့သူရှိတယ်။ PNO ဘက်က သေတာရှိတယ်။ ရွာထဲမှာက စစ်ကောင်စီ နဲ့ PNO တပ်ဖွဲ့တို့ရှိတယ်” ဟု ဖယ်ခုံမြို့နယ် PDF တပ်ဖွဲ့ဝင် တစ်ဦးက ပြောသည်။
ဖယ်ခုံမြို့နယ်အတွင်း စစ်ကောင်စီက မေလ ၁၃ ရက်မှစပြီး စစ်ကြောင်းထိုးစစ်ဆင်လာခဲ့ကာ ကျေးရွာအတွင်းရှိ ပြည်သူများ၏ နေအိမ်များကို မီးရှို့ဖျက်ဆီးခဲ့မှုများလည်း ရှိခဲ့ကြောင်း သိရသည်။
ဖယ်ခုံမြို့နယ်အတွင်း စစ်ကောင်စီက တပ်ဆွဲထားပြီး မီးရှို့ဖျက်ဆီးခဲ့သည့် ကျေးရွာများမှာ ဖယ်ခုံအင်းအရှေ့ဘက်ခြမ်း ဆောင်နန်းခဲ၊ လွယ်ပေါ၊ နန်းပေါ်လုံ၊ နန်းဆွန့်၊ ပိန္နဲကုန်း၊ မခေခမ်း၊ လဟယ်ကျေးရွာ တို့ဖြစ်ကြောင်း သိရသည်။
Leave a Comments