သျှမ်းပြည်တောင်ပိုင်း ပင်းတယမြို့နယ် NLD ပြည်နယ်လွတ်တော်ကိုယ်စားလှယ် ဦးထွန်းထွန်းနိုင်ကို စစ်ကောင်စီများက မဖမ်းဆီးနိုင်သဖြင့် အင်းပလက်ကျေးရွာတွင်ရှိသည့် ၎င်း၏ ဆွေမျိုးများကို ဖမ်းဆီးသွားကြောင်း စုံစမ်းသိရှိရသည်။
ပြီးခဲ့သည့် ဇွန် ၁၈ ရက် နေ့လည် ၁၂ နာရီဝန်းကျင်က ဦးထွန်းထွန်းနိုင်ကို မဖမ်းဆီးနိုင်တာကြောင့် ၎င်း၏ ဆွေမျိုး ၂၅ ဦးကို ဖမ်းဆီးသွားပြီးနောက် ညနေပိုင်းတွင် ၁၆ ဦးကို ပြန်လွတ်ပေးခဲ့ကြောင်း သိရသည်။
အဆိုပါ ဖမ်းဆီးသွားသူများသည် အသက်ကြီးသူများလည်း ပါဝင်သောကြောင့် စစ်ကောင်စီက ပြန်လွတ်ပေးခဲ့ကြောင်း သိရသည်။
“ သူတို့ဖမ်းဆီးသွားတာ အသက် ၈၀ လောက်ထိအသက်ကြီးတဲ့သူတွေလည်းပါတယ်။ သူတို့က ဦထွန်းထွန်းနိုင်ကို မဖမ်းနိုင်လို့ ဆိုပြီးတော့ သူ့ဆွေမျိုးတွေကို ဖမ်းဆီးသွားတာ။ ဓားစားခံအဖြစ် ဖမ်းထား ချင်တာပေါ့။ ၂၅ ယောက်ကို ဖမ်းသွားတာ။ ညနေပိုင်းလောက်မှာ ၁၆ ယောက်ပြန်လွတ်လာပေးတယ်” ဟု ပင်းတယမြို့ ဒေသခံအမျိုးသား တစ်ဦးက ပြောသည်။
လက်ရှိ စစ်ကောင်စီက ၉ ဦးကို ဖမ်းဆီးထားဆဲဖြစ်ပြီး ထို ၉ ဦးစလုံးသည် အမျိုးသားများ ဖြစ်ကြောင်းသိရသည်။
ထိုသို့ ဦးထွန်းထွန်းနိုင်ကို ဖမ်းဆီးရသည့် အကြောင်းရင်းသည် ဦးထွန်းထွန်းနိုင်က PDF များကို အားပေးသည်ဟုဆိုပြီး ဖမ်းရန် ကြိုးစားနေခြင်းဖြစ်ကြောင်းသိရသည်။
“ သူတို့ အခုချိန်ထိ ဖမ်းထားဆဲက ၉ ယောက်ကျန်တယ်။ အကုန်လုံးက ယောင်္ကျားလေးတွေ ကျန်တာပါ။ လက်ရှိ ပင်းတယရဲစခန်းမှာပဲ။ ဦးထွန်းထွန်းနိုင်က PDF ကို အားပေးတယ်။ ကူညီပံ့ပိုးတယ်ဆိုပြီးတော့ ဖမ်းချင်တာပါ။ အခုက မဖမ်းနိုင်သေးလို့ သူ့ရဲ့ ဆွေမျိုးကို ဖမ်းဆီးထားတာပါ” ဟု အထက်ပါ ဒေသခံ အမျိုးသား က ပြောသည်။
အလားတူ ထို ဇွန် ၁၈ ရက် မနက် ၁၀ နာရီဝန်းကျင် တွင်လည်း စစ်ကောင်စီလက်အောက်ခံ ကြံ့ခိုင်ရေးပါတီ ဦးကျော်ငြိမ်းသည်လည်း ပြစ်သတ်ခံခဲ့ရကြောင်း သိရသည်။
ထိုသို့ ပစ်ခတ်ခံရပြီးနောက်ပိုင်း ၁၂ နာရီဝန်းကျင်မှာ အင်းပလက်ကျေးရွာမှာရှိနေသည့် ဦးထွန်းထွန်းနိုင် ဆွေမျိုးများကို စစ်ကောင်စီက လာရောက်ဖမ်းဆီးသွားကြောင်းသိရသည်။
“ အဲ့နေ့မနက်မှာလည်း ကြံ့ခိုင်ရေးပါတီက ဦးကျော်ငြိမ်းလည်း ပစ်သတ်ခံလိုက်ရတယ်။ ပြီးမှပဲ ဦးထွန်းထွန်းနိုင် ဆွေမျိုးတွေကိုရွာမှာ သွားဖမ်းတာပါ။ ဦးကျော်ငြိမ်းကသူ ဒလန်ဖြစ်တယ်လေ။ သူက စစ်ကောင်စီက ခိုင်းတာ အကုန်လုပ်ပေးတယ်။ ပြီးတော့ သူ့မှာ ပစ္စတိုလက်နက်ကိုင်ခွင့်လည်းရထားတယ်” ဟု ပင်းတယ မြို့ ဒေသခံ အမျိုးသားတစ်းဦးက ထပ်မံပြောပြသည်။
ပင်းတယမြို့တွင် စစ်ကောင်စီ သတင်းပေး ဒလန်ဟု နာမည်ထွက်သူများသည် ဦးကျော်ငြိမ်းအပါအဝင် ၇ ဦးရှိနေပြီးဖြစ်ကြောင်း သိရသည်။
မြန်မာနိုင်ငံတွင် စစ်တပ်က အာဏာသိမ်းပြီးနောက်ပိုင်း ဇွန်လ ၁၇ ရက်ထိ ပြည်သူ (၁,၉၆၃) ဦး သတ်ဖြတ်ခံရပြီး ပြည်သူ (၁၄,၁၅၆) ဦး ဖမ်းဆီးခံထားရကြောင်း နိုင်ငံရေး အကျဉ်းသားများ ကူညီစောင့်ရှောက်ရေးအသင်း AAPP ထံ သိရသည်။
Leave a Comments