သျှမ်းပြည်မြောက်ပိုင်း ကျောက်မဲမြို့နယ် ကောင်းမူးကျေးရွာတွင် နေထိုင်သည့် စစ်ရှောင်များကြားတွင် RCSS/SSA တပ်သားများရှိသည်ဟုဆိုကာ TNLA ဝင်ရောက်စစ်ဆေးမှု ကြမ်းနေကြောင်း စုံစမ်းသိရှိရသည်။
အဆိုပါ စစ်ဆေးမှုသည် လွန်ခဲ့သည့် ဇွန် (၁၃) ရက်နေ့ တအာင်းအမျိုးသား လွတ်မြောက်ရေး တပ်မတော် (TNLA) က ကောင်းမူးကျေးရွာ အုပ်ချုပ်ရေးမှူးကို လာရောက်ခေါ်ဆောင်သွားပြီး ကျေးရွာအတွင်း RCSS တပ်ဖွဲ့ရှိသည်ဟုဆိုကာ လာရောက် ဝန်ခံခိုင်းကြောင်း၊ RCSS တပ်သားများကို လာမည့် ဇွန် ၁၇ ရက် တွင်လာရောက်ပို့ထားခိုင်းကြောင်း ဒေသခံများထံမှ သိရသည်။
“၁၃ ရက်နေ့ ညတုန်းက အုပ်ချုပ်ရေးမှူးကို သူတို့လာခေါ်သွားတယ်။ ကျနော်တို့ စစ်ရှောင်တွေကြားမှာ RCSS တပ်သားတွေရှိနေတယ်ဆိုပြီး သူတို့က သွားဝန်ခံခိုင်းတာ။ ပြီးတော့ အဲ့တပ်သားတွေကိုလည်း ၁၇ ရက်နေ့သွားပို့ ခိုင်းတာ။ မလာပို့ဘူးဆိုရင် သူတို့ရွာထဲမှာ ဝင်လာဖမ်းမယ်တဲ့” ဟု အမည်မဖော်လိုသည့် ဒေသခံ အမျိုးသား တစ်ဦးက ပြောသည်။
RCSS တပ်သားများကို လာမည့် ဇွန် ၁၇ တွင် မပို့ဆောင်နိုင်ပါက ကျေးရွာအတွင်းသို့ TNLA တပ်သားများက ကိုယ်တိုင် လာရောက်ရှာဖွေမည်ဖြစ်ပြီး ကျန်ရှိနေသည့် စစ်ရှောင်များကိုလည်း ဖမ်းဆီးသွားမည်ဟု ခြိမ်းခြောက်ပြောဆိုသွားကြောင်း သိရသည်။
လက်ရှိ ကျေးရွာအတွင်းတွင် RCSS တပ်သားများ မရှိကြောင်း ဒေသခံများပြောပြချက်အရသိရသည်။ သို့သော် သျှမ်းသံတော်ဆင့် သတင်းဌာနမှ RCSS တပ်သားရှိ ၊ မရှိကို အတည်မပြုနိုင်သေးပေ။
“တကယ်လည်း ရွာထဲမှာ RCSS တပ်သားတွေက မရှိပါဘူး။ သူတို့က ရှိတယ်ပြောပြီးတော့ သွားပို့ခိုင်းနေတာ။ မပို့ပေးရင် သူတို့လာဖမ်းမယ်တဲ့။ ရွာထဲဝင်လာပြီးတော့ ကိုယ်တိုင်လာဖမ်းမယ်တဲ့။ အခုဆို ကျမတို့ ထွက်ပြေးနေရပြီ။ အထုတ်တွေပြင်နေပြီးတော့ ထွက်ပြေးရတော့မယ်” ဟု စစ်ရှောင် အမျိုးသမီးတစ်ဦး ကပြောပြသည်။
ကောင်းမူးကျေးရွာအတွင်းတွင် RCSS တပ်သားများရှိ၊ မရှိကြောင်းကို သျှမ်းပြည်ပြန်လည်ထူထောင်ရေးကောင်စီ ၊ သျှမ်းပြည်တပ်မတော် RCSS/SSA ၏ ပြောရေးဆိုခွင့်ရှိသူ ဗိုလ်မှူးခမ်းစံက “ဖြေဆိုရန်အချက်လက်မရှိသေးကြောင်း“ ဟု သျှမ်းသံတော်ဆင့် သတင်းဌာနကို ပြောသည်။
အလားတူ တအာင်းအမျိုးသားလွတ်မြောက်ရေးတပ်မတော် (TNLA) ဗိုလ်မှူးမိုင်းအိုက်ကျော်ကို သျှမ်းသံတော်ဆင့်မှ အကြိမ်ကြိမ် ဆက်သွယ်သော်လည်း ဆက်သွယ်လို့မရရှိပေ။
လက်ရှိတွင် ကောင်းမူးကျေးရွာအတွင်းရှိနေသည့် စစ်ရှောင်များက မိမိအစီအစဉ်ဖြင့် နေရာသစ်ကို ထပ်မံထွက်ပြေးနေရကြောင်း သိရသည်။
“ကိုယ့်အစီစဉ်နဲ့ပဲ သွားနေကြတာပါ။ ကိုယ့်အထုတ်ကို ပြင်ပြီးတော့ပဲ သွားနေတာပါ။ကူညီတဲ့သူတွေလည်း မရှိပါဘူး” ဟု အထက်ပါ အမျိုးသမီးက ပြောသည်။
ထိုစစ်ရှောင်များသည် ၂၀၂၁ ခုနှစ် RCSS နှင့် တပ်ပေါင်းစုတို့ တိုက်ပွဲဖြစ်ပွားခဲ့ပြီးနောက် ထွက်ပြေးလာခဲ့သည့် စစ်ရှောင်များဖြစ်ကြောင်း၊ စစ်ရှောင်များသည် ကောင်းမူးကျေးရွာတွင် ၄ လ ကြာ နေထိုင်ခဲ့ပြီး ဖြစ်ကြောင်း သိရသည်။
