သျှမ်းပြည်တောင်ပိုင်း နမ့်စန်မြို့တွင်ဖွင့်လှစ်ထားသည့် ညလောင်းကစားဝိုင်းများမှ Song Box (အသံချဲ့စက်) သည် အသံကျယ်လောင်စွာ ဖွင့်လှစ်သဖြင့် သက်ကြီးရွယ်အို နှင့် ပြည်သူများ အိပ်စက်ရန်ခက်ခဲနေကြောင်း စုံစမ်းသိရှိရသည်။
ပြီးခဲ့သည့် ဇွန်လ ၁၂ ရက်နေ့ မနက် ၂ နာရီဝန်းကျင်အထိ အသံချဲ့စက်နဲ့ သီချင်းများကို ကျယ်လောင်စွာအော်ဆိုသောကြောင့် ဘေးပတ်ဝန်းကျင်က ပြည်သူများ အိပ်ရန်ခက်ခဲကြောင်း နမ့်စန်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ညသန်းခေါင်ကြီး သီချင်းနားမခံနိုင်အောင်ဖွင့်နေတာ။ Song Box ( အသံချဲ့) စက်နဲ့ အကြီးကျယ်ဖွင့်နေတာ။ တီးဝိုင်းကော ဖွင့်နေတာ။ မြို့ခံက သက်ကြီးရွယ်အိုတွေ ၊ မကျန်းမာသူတွေက တော်တော်လေးခံနေရတာလေ။ ည ၂ နာရီလောက်ဖွင့်နေကြတာ” ဟု နမ့်စန်မြို့ ဒေသခံအမျိုးသား တစ်ဦးက ပြောသည်။
ထို့အပြင် လောင်းကစားဝိုင်းများကို လက်နက်ကိုင် ပြည်သူ့စစ်များက ဦးဆောင်လုပ်ကိုင်နေကြပြီး တစ်နေရာပြီး တစ်နေရာပြောင်းရွှေ့ ဖွင့်လှစ်နေကြောင်း သိရသည်။
“လုပ်နေတာကတော့ ပြည်သူ့စစ်တွေက ဦးဆောင်ပြီး လုပ်ဆောင်ပေးနေတာလို့တော့ကြားတယ်။ နမ့်စန်က ပြည်သူ့စစ်တပ်ဖွဲ့တွေများတယ်လေ။ မတ်ကျန်းပြည်သူ့စစ်တို့ ၊ SSS ပြည်သူ့စစ်၊ နားရိုင်းပြည်သူ့စစ်တို့က လုပ်ပေးနေတာ။ ပြီးတော့ သူတို့ နေရာပြောင်းပြီးလုပ်သွားနေကြတာ။ တစ်နေရာပြီး တစ်နေရာပြောင်းနေတာပေါ့” ဟု ၎င်းအမျိုးသားက ပြောသည်။
နမ့်စန်မြို့ လောင်းကစားဝိုင်းများကို ပြည်သူ့စစ်များ ဦးဆောင်လုပ်ဆောင်ပြုလုပ်ခြင်းဖြစ်ပြီး နာမည်ကြီး အဆိုတော်များကိုလည်း ဖိတ်ခေါ်ပြီး လောင်းကစားများကိုလည်း ကျင်းပပေးနေလျက်ရှိကြောင်း သိရသည်။
Leave a Comments