စစ်ကောင်စီမှ ဖယ်ခုံမြို့ ဒေသခံအမျိုးသားများကို ဝမ်းလျားမှောက်အိပ်ခိုင်းပြီး စစ်ဆေး

0

သျှမ်းပြည်တောင်ပိုင်း ဖယ်ခုံမြို့နှင့် ကရင်နီ နယ်စပ်တွင် စစ်ကြောင်းထိုးလာသည့် စစ်ကောင်စီ တပ်သားများသည် ဒေသခံအမျိုးသား ၁၅ ဦးခန့် ဝမ်းလျားမှောက်အိပ်ခိုင်းပြီး စစ်ဆေးမှုများ ပြုလုပ်ခဲ့ကြောင်း သတင်းသိရသည်။

ပြီးခဲ့သည့် ဇွန်လ ၁၂ ရက်တွင် ဖယ်ခုံမြို့ ဟိန္ဓမရပ်ကွက်ဘက် စစ်ကြောင်းထိုးလာသည့် စစ်ကောင်စီတပ်ဖွဲ့ သည် အိမ်ထဲရှိနေသည့် ပြည်သူအမျိုးသားများကို အပြင်ထွက်ခိုင်းကာ မြေကြီးဝမ်းလျား မှောက်ခိုင်းခဲ့ကြောင်း မြင်တွေ့ရသည့် အမည်မဖော်လိုသူ ဒေသခံအမျိုးသားတစ်ဦးက ပြောသည်။

“ယောက်ျားတွေ ရှိတဲ့အိမ်တွေကို ဝင်စစ်ပြီး တွေ့တဲ့ ယောက်ျားတွေအကုန်လုံးကို အပြင်ထွက်ခိုင်းတယ်၊ ၁၅ ဦးလောက်တော့ရှိမယ်။ မြေကြီး ဒီလောက်ပူနေတာကို ဝမ်းလျားမှောက်ခိုင်းပြီး သူတို့မျက်နှာကို မကြည့်ရဘူးတဲ့၊ အဲ့ဒါ အသက်ကြီးငယ်မရွေး လုပ်ရတယ်၊ ပြီးတော့ စစ်တာ ခန္ဓာကိုယ်အနှံ့ပဲ” ဟု အထက်ပါ အမျိုးသားက ပြောသည်။

ဖယ်ခုံမြို့နယ်ထဲက စစ်ကောင်စီ

စစ်ကြောင်းထိုးလာသည့် စစ်ကောင်စီတပ်ဖွဲ့များသည် ပြည်သူများကို ဝမ်းလျားမှောက်ခိုင်းပြီး စစ်ဆေးနေစဥ် တွင်ပင် လမ်းမပေါ်သွားလာနေသည့် ပြည်သူများကိုလည်း ရပ်တန့်ခိုင်းကာ စုပြုံခိုင်းကာ သေနတ်များကို ရမ်းသမ်းပစ်ခတ်နေသည့် စစ်ကောင်စီများလည်း ရှိနေကြောင်း သိရသည်။

ယင်းဖြစ်စဥ်များနှင့် ပက်သက်ပြီး ဒေသအတွင်း လှုပ်ရှားနေသည့် KNDF – BO/03 တပ်ဖွဲ့နှင့် ဆက်သွယ်မေးမြန်းရာ အမျိုးသားရှိသည့် နေအိမ်များကို စစ်ကောင်စီတို့မှ ဦးတည် နှိပ်စစ်နေကြောင်း ပြန်ကြားရေး တာဝန်ခံက သျှမ်းသံတော်ဆင့်ကို ပြောသည်။

“သူတို့ဖမ်းသည်ဖြစ်စေ မဖမ်းသည် ဖြစ်စေ ယောက်ျားလေးတွေအကုန်လုံးကို အဲ့လိုဝမ်းလျားမှောက်ခိုင်းပြီး မော့မကြည့်နဲ့ ဘာညာအဲ့လိုမျိုးတွေ ပြောကြတာပေါ့ဗျာ၊ မော့ကြည့်တာဖြစ်ဖြစ် မြေကြီးကပူလို့ လှုပ်တာပဲ ဖြစ်ဖြစ် ခြေထောက်တွေနဲ့ ကန်တာပဲ” ဟု KNDF – BO/03မှ ပြန်ကြားရေးတာဝန်ခံက ပြောသည်။

လက်ရှိတွင် ဖယ်ခုံမြို့နယ်ထဲမှ ရှောင်တိမ်းခြင်းမပြုသေးသည့် ဖယ်ခုံမြို့ အရှေ့ဘက်ကမ်း နှင့် ဆင်ဖြူကျေးရွာ၊ ၄၂၂ တပ်နှင့် နီးသည့်ဆောင်ကန်းရွာတို့သည် အချိန်မရွေး တိုက်ပွဲဖြစ်ပွားနိုင်သည့် အနေအထားရှိနေကြောင်း လည်းသိရသည်။

စစ်ကောင်စီတို့သည် ၎င်းတို့ အထိနာ ကျရှုံးခဲ့ရသည့် ဖယ်ခုံမြို့နယ် ညောင်ဝိုင်းတိုက်ပွဲအပြီး ဖယ်ခုံမြို့အတွင်း စစ်အင်အားဖြည့်တင်းမှုများ ပြုလုပ်နေသည့် အပြင် ပြည်သူများကို ညှင်းပန်းနှိပ်စက်မှုများလည်း ဆက်လက်ပြုလုပ်နေကြောင်း သိရသည်။

Leave a Comments