သျှမ်းပြည်မြောက်ပိုင်း သီပေါမြို့နယ်အတွင်းရှိ ရုန်းရင်းဆန်ခတ်မှုများဖြစ်ပွားသဖြင့် မာရှယ်လော ထုတ်ပြန်ခဲ့ရကြောင်း စုံစမ်းသိရှိရသည်။
သီပေါမြို့နယ်အတွင်း ရပ်ရွာ ငြိမ်းချမ်းရေးကို ထိခိုက်လာမှု၊ ရုန်းရင်းဆန်ခတ်မှုများ ဖြစ်ပွားသည့်အတွက် ည (၈) နာရီ မှ မနက် (၄) နာရီအထိ ညမထွက်ရ အမိန့်ကို ဇွန် (၈) ရက်နေ့က ထုတ်ပြန်လိုက်ကြောင်း သတင်းရရှိသည်။
“ ကျနော်လည်း အသေးစိတ်တော့ မသိရဘူး။ မြို့ထဲမှာ ရုန်းရင်းဆန်ခတ် ပြဿနာတွေရှိတာကြောင့် အခုလို ရုတ်တရက် မာရှယ်လော ထုတ်လိုက်တာဖြစ်တယ်။ သူတို့ထုတ်ပြန်ချက်အတိုင်းဆိုရင်တော့ လူတစ်စုနဲ့သွားလာပြီးတော့ ပြည်သူတွေကို ဒုက္ခပေးနေတာလည်း ရှိတယ်လေ။ အဲ့ကြောင့် မာရှယ်လောထုတ်ပြန်လိုက်တာပါ” ဟု အထက်ပါ အမည်မဖော်လိုသည့် ဒေသခံ တစ်ဦးက ပြောသည်။
အလားတူ ပြီးခဲ့သည့် ဇွန်လ ၈ ရက်နေ့တွင်လည်း သီပေါမြို့ ဖြူစင်နှလုံးသား အသင်းသား အဖွဲ့တစ်ဦးမှ ညအချိန် လူနာပို့အပြန်တွင် အမည်မသိ လက်နက်ကိုင်အဖွဲ့က ပါးရိုက်သည်ကို ခံခဲ့ရကြောင်းသိရသည်။
“ အဲ့နေ့က သူတို့လူနာသွားပို့လာပြီးအပြန်မှာ ဖြစ်သွားတာတဲ့။ သူတို့ကားရှေ့မှာ ဆိုင်ကယ်အမြန် မောင်းဖြတ်လာတာ။ ပြီးတော့ ကားပေါ်က ဆင်းခိုင်းပြီး သေနတ်ထောက်ပြီးတော့ ခြိမ်းခြောက်သွားသေးတယ်တဲ့။ ကိုယ်ထိလက်ရောက်စော်ကားတာတွေလည်းရှိတယ်” ဟု ဖြူစင်နှလုံးသားအသင်း အဖွဲ့ဝင်တစ်ဦးက ပြောသည်။
ထိုသို့ မာရှယ်လောထုတ်ပြန်ခဲ့သော်လည်း ညအချိန်တွင်း လူနာများရှိလာပါက ပုံမှန်အတိုင်း လူနာကို ပို့ဆောင်ပေးမည်ဖြစ်ကြောင်း သီပေါမြို့ရှိ ပရဟိတအဖွဲ့ တစ်ချို့က ပြောသည်။
သို့သော် မာရှယ်လောထုတ်ပြန်ခြင်းကြောင့်လည်း မနက်ခင်း ဈေးသွားရောင်းသည့် ပြည်သူများအတွက်က ရှာဖွေစားသောက်ရာတွင် အခက်ခဲ အနည်းငယ်ရှိလာကြောင်းသိရသည်။
“ ဈေးသွားရောင်းတဲ့သူကတော့ အစောကြီးသွားရတယ်။ ဈေးထဲမှာ မနက်အစောကြီး ပစ္စည်းတွေသွားခင်းပြီး ရောင်းရတာလေ။ ပြီးတော့ ညဆိုရင်လည်း အလုပ်မပြီးတဲ့ ပြည်သူတစ်ချို့ကလည်း အလုပ်မပြီးတာတွေရှိတယ်။ ဒီလိုထုတ်လိုက်တော့ ရှာဖွေစားသောက်ဖို့အတွက် ပြည်သူတစ်ချို့တော့ ခက်ခဲတာပေါ့” ဟု သီပေါမြို့ ဒေသခံ အမျိုးသမီးတစ်ဦးက ပြောသည်။
အာဏာသိမ်းပြီးနောက်ပိုင်း စစ်ကောင်စီက ညမထွက်ရအမိန့်ကို ဖြေလျော့ပေးခဲ့ပြီးနောက် လက်ရှိ သျှမ်းပြည်အတွင်း သီပေါမြို့သည် ပထမဆုံး ညမထွက်ရအမိန့် မာရှယ်လောကို ပြန်လည်ထုတ်ခဲ့ကြောင်း သိရသည်။
