သျှမ်းပြည်တောင်ပိုင်း မိုးဗြဲမြို့နယ်အတွင်းတွင် အာဏာသိမ်း စစ်ကောင်စီ တပ်ဖွဲ့တို့မှ လက်နက်ကြီး လက်နက်ငယ်များဖြင့် ရမ်းသမ်းပစ်ခတ်နေမှုများကြောင့် အရပ်သားတစ်ဦးထိခိုက်သေဆုံးပြီး၊ နှစ်ဦးဒဏ်ရာ ရရှိကြောင်း သတင်းသိရသည်။
ယနေ့ (ဇွန် ၇ ) ရက် နံနက် ၇ နာရီခွဲဝန်းကျင်မှ စတင်ခဲ့သည့် စစ်ကောင်စီတို့၏ ရမ်းသမ်းပစ်ခတ်မှု ကြောင့် မိုးဗြဲဈေးကုန်းရပ်ကွက်မှ အမျိုးသား တစ်ဦးသေဆုံးခဲ့ပြီး၊ နှစ်ဦးဒဏ်ရာရရှိကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“တစ်ဦးသေ၊ နှစ်ဦးဒဏ်ရာရပါတယ်၊ သေဆုံးတဲ့သူတစ်ဦးက အမျိုးသားပါ။ ဈေးကုန်းရပ်ကွက်ကပါ၊ လက်နက်ကြီးတွေကို ရမ်းပစ်နေကြလို့ လက်ရှိအချိန်ထိ လုံခြုံတဲ့နေရာမရှိပါဘူး၊ ပစ်ခတ်မှုတွေလည်း ဆက်ဖြစ်နေသေးတယ်” ဟု ၎င်းက ပြောသည်။
စစ်ကောင်စီတပ်ဖွဲ့တို့သည် ညောင်ဝိုင်းရပ်ကွက်မှ စတင်ကာ ပြည်သူ့နေအိမ်များဘက်သို့ ဦးတည် ချက်မရှိ လက်နက်ကြီးများဖြင့် ရမ်းသမ်းပစ်ခတ်နေသည့်အတွက် ပြည်သူများ ထွက်ပြေးတိမ်းရှာင်ရန် ပစ္စည်းထုပ်ပိုးမှုများ ပြင်ဆင်နေကြောင်းသိရသည်။
“တချို့ကတော့ ထွက်ပြေးတိမ်းရှောင်ဖို့ ပြင်နေကြပြီ၊ အခုထိတော့ ဘယ်သူမှ မထွက်သေးဘူး၊ ပစ်ခတ်မှုက နေရာတိုင်းကနေ လာတယ်၊ PDF ဘက်ကလည်း ပြည်သူတွေ အတတ်နိုင်ဆုံး လုံခြုံအောင် နေကြဖို့ သတိပေး ထုတ်ပြန် ထားပါတယ်” ဟု အထက်ပါ ပုဂ္ဂိုလ်က ဆက်လက်ပြောသည်။
ထိုဖြစ်စဥ်များနှင့် ပက်သက်ပြီး ဒေသအတွင်းလှုပ်ရှားနေသည့် ဒေသခံပြည်သူ့ကာကွယ်ရေး တပ်ဖွဲ့များ နှင့် ဆက်သွယ်မေးမြန်းရာ ထိတွေ့တိုက်ပွဲဖြစ်ပွားနေကြောင်း နှင့် လက်ရှိအချိန်တွင် အသေးစိတ်အခြေအနေများ ပြောပြရန် အဆင်မပြေကြောင်း သျှမ်းသံတော်ဆင့် ကိုပြောသည်။
“ထိတွေ့တိုက်ပွဲ ဖြစ်နေတာပါ၊ မြေပြင်မှာတိုက်ပွဲက ဆက်လက်ဖြစ်နေသေးတာမို့ အခြေအနေတွေကိုတော့ ထုတ်ပြန်ဖို့ အဆင်သင့်မဖြစ်သေးပါဘူး၊ ကျနော်တို့ အနေနဲ့ပြောချင်တာက ပြည်သူတွေ အတတ်နိုင်ဆုံး လုံခြုံ အောင်နေပေးကြပါ” ဟု ဒေသအတွင်းမှ PDF တပ်ဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
Mobye Rescue Team ကလည်း ပြည်သူများ နေအိမ်အပြင် မထွက်ရန် နှင့် လက်နက်ကြီး ထိမှန်ဒဏ်ရာရရှိပါက ဆက်သွယ်ကြရန်လည်း တိုက်တွန်းပြောဆိုထားသည်။
အာဏာသိမ်း စစ်ကောင်စီတပ်ဖွဲ့တို့သည် ဖယ်ခုံမြို့၊ လွိုင်ကော်မြို့ နှင့် ဒီးမော့ဆိုမြို့တိုတွင်လည်း စစ်ကြောင်းထိုး ချီတက်မှုများ ရှိနေကြောင်း ကရင်နီအမျိုးသားများကာကွယ်ရေးတပ် (KNDF) က ထုတ်ပြန်ထားသည်။
Leave a Comments