သျှမ်းပြည်မြောက်ပိုင်း လားရှိုးမြို့နယ်အတွင်း စစ်ကောင်စီ လက်အောက်ခံ လျှပ်စစ်ဝန်ထမ်းယောင်ဆောင်ပြီး ပြည်သူများထံ ပိုက်ဆံကောက်ယူနေလျက်ရှိကြောင်း စုံစမ်းသိရှိရသည်။
ယခုရက်ပိုင်း လားရှိုးမြို့ တစ်ချို့ရပ်ကွက်မှာ လျှပ်စစ်ဝန်ထမ်း ယူနီဖောင်းဖြင့် နေအိမ်သို့လာကာ ဝါယာကြိုးလိုက်စစ်ပြီး ငွေတောင်းယူမှုများရှိကြောင်း သိရသည်။
ယမန်နေ့ ဇွန် (၅) ရက်နေ့တွင်လည်း ရပ်ကွက် (၁၁) ပညာရေး ကောလိပ်နားတွင် ရှိနေသည့် နေအိမ်တစ်ခုကို လျှပ်စစ်ဝန်ထမ်း ယူနီဖောင်းဝတ်လာပြီး ဓားဖြင့် ငွေလာကောက်ယူသွားကြောင်း ကိုယ်တိုင်ကြုံတွေ့ရသည့် အမျိုးသမီး က သျှမ်းသံတော်ဆင့် ကိုပြောသည်။
“ အစက မီးကြိုးလာစစ်ရင်းနဲ့ပေါ့ တံခါးဖွင့်ခိုင်းတာ။ လူကြီးမရှိဘူး ပြောလည်းမရဘူး။ တံခါးဖွင့်ပေးတော့ အပေါ်ထပ်ကော အောက်ထပ်ကော ဝင်စစ်တာ။ လူကြီးမရှိမှန်းသိတော့ ငွေစတောင်းတာပဲ။ သူတို့လာတာ (၃) ယောက်လာတာ။ ၂ ယောက်က လျှပ်စစ်ဝန်ထမ်းက ယူနီဖောင်းနဲ့၊ ထပ်တစ်ယောက်က ရိုးရိုးအဝတ်နဲ့ ဓားကိုင်ထားတာ။ (၆) သိန်းလောက်ပေးလိုက်ရတယ်” ဟု ကိုယ်တိုင်ကြုံတွေ့ခဲ့သူ တစ်ဦးက ပြောသည်။
ထိုသို့ ငွေလာတောင်းသည့်အချိန်တွင်လည်း ခြိမ်းခြောက်ပြီး အိမ်ထဲဝင်လာကြောင်း၊ အိမ်တံခါးကိုလည်း ကန်ကြောင်း သိရသည်။
“ အိမ်မှာလည်း တံခါးကို သော့သေချာခတ်ထားတယ်။ အပြင်ကနေ ကြည့်ရင် လူရှိမှန်းတောင် မသိနိုင်ဘူး။ သူတို့ဝင်လာတာဆိုရင် တံခါးကို ခြေထောက် နဲ့ ကန်တာတွေလည်း လုပ်တယ်။ အတင်းတံခါးဖွင့်ခိုင်းတာ” ဟု အထက်ပါ သူက ပြောသည်။
ယခုလို ငွေလာတောင်းယူမှုကြောင့် ဒေသခံများက လျှပ်စစ်ဝန်ကြီးရုံးသို့ ပြန်သွားမေးရာတွင် ၎င်းတို့မှ မတောင်းခံရကြောင်း၊ တစ်ချို့ရပ်ကွက်များတွင်လည်း ငွေပေးဆောင်ရမှုများရှိကြောင်း လျှပ်စစ်ရုံးဝန်ထမ်းများက ဒေသခံကို ပြန်ပြောခဲ့ကြောင်း သိရသည်။
စစ်တပ်က အာဏာသိမ်းပြီးနောက်ပိုင်း ခိုးယူလုယက်မှု များပြားလာပြီး၊ ဝန်ထမ်းအယောင်အဆောင်များပြားလာသောကြောင့် ဒေသခံများအနေဖြင့် ပိုသတိထားသင့်ကြောင်း၊ လူကြီးများမရှိပါက တံခါးကို မဖွင့်ပေးသင့်ကြောင်း လားရှိုးမြို့ ပရဟိတ အဖွဲ့ဝင်တစ်ဦးက ပြောသည်။
“ မိမိကိုယ်ကိုယ် မိမိသတိထားဖို့လိုတယ်။ တံခါးတွေ ဘာတွေဖွင့်ခိုင်းတိုင်း မဖွင့်ပေးဖို့ပေါ့။ ဖြစ်နိုင်ရင်တော့ သူတို့ မီတာခ လာဖတ်တယ်ဘာညာဆိုရင် ဆယ်အိမ်မှူးတို့ ရာအိမ်မှူးတို့ပါရင်တော့ ပိုကောင်းတာပေါ့။ အခုက မပါဘူးလေ။ ကျနော်တို့ ပြည်သူလူထုအနေနဲ့တော့ ပါစေချင်တာပေါ့” ဟု လားရှိုးမြို့ ပရဟိတ အဖွဲ့ဝင်တစ်ဦး က ပြောသည်။
စစ်တပ်က အာဏာသိမ်းပြီးနောက်ပိုင်း နိုင်ငံရေး မကောင်းသောကြောင့် ပြည်သူများ ယခင်ထက်စားဝတ်နေရေး ပိုမို ခက်ခဲလာပြီး မြန်မာနိုင်ငံအတွင်း ခိုးယူလုယက်မှုများ၊ ဓားပြတိုက်မှု၊ နေအိမ်ခိုးဖောက်မှု၊ လောင်းကစားများ နှင့် မူးယစ်ဆေးဝါး သုံးစွဲသူ ပိုမိုများပြားလာကြောင်း သိရသည်။
