သျှမ်းပြည်တောင်ပိုင်း ရွာငံမြို့နယ်တွင် ဂေါ်ဖီထုပ် စိုက်သည့် တောင်သူများ စျေးကွက်မရှိသဖြင့် ခြံထဲ မည်သူမဆို အခမဲ့ လာရောက်ခုတ်ယူနိုင်ကြောင်း တောင်သူများက ပြောကြားသည်။
လက်ရှိ မုန်လာထုပ်(ဂေါ်ဖီ) ၏ စျေးနှုန်း အဆမတန်စျေးကျသည့်အတွက် တခြားမြို့နယ်သို့ တင်ပို့ရောင်းချလျှင် ကားခ ပြန်မရကြောင်း ရွာငံမြို့နယ်က ဂေါ်ဖီထုပ် စိုက်သည့် တောင်သူ အမျိုးသား တစ်ဦး က ပြောသည်။
“စျေးမကောင်းဘူး။ ကုန်စျေးတွေက အရမ်းတက်ပြီး ရောင်းစျေးတွေက အရမ်းကျတယ်။ ကားခတောင်မရဘူး။ ကားခမရမယ့်အတူတူ လာခုတ်ကြပါ။ နောက်ရာသီပေါ်သီးနှံ တစ်ခုစိုက်ရတော့မယ်ဆိုတော့ ခုစိုက်ထားတဲ့ ဟာတွေ ရှင်းလင်းဖို့ လိုအပ်တယ်။ ခုဆို စပါးတို့ တခြားဟာတွေစိုက်ရတော့မယ်”ဟု တောင်သူ တစ်ဦး က သျှမ်းသံတော်ဆင့် ကိုပြောသည်။
စစ်အာဏာသိမ်းပြီးနောက်ပိုင်း ကုန်စျေးနှုန်းများ မြေသြဇာများ အဆမတန်မြင့်တက်ခြင်း၊ စက်သုံးဆီများ မြင့်တက်ခြင်းများ ဖြစ်ပေါ်သည့်အတွက် ဒေသခံ တောင်သူများအခက်အခဲ ကြုံတွေ့နေရကြောင်း ရွာငံမြို့နယ် ဒေသခံ တောင်သူ အမျိုးသမီး တစ်ဦးက သျှမ်းသံတော်ဆင့် ကိုပြောသည်။
“ဒီလိုအရှုံးပေါ်တဲ့ချိန်မှာ တောင်သူတွေက စိုက်တဲ့မြေသြဇာက အရမ်းစျေးကြီးတယ်။ အကြွေးတွေပိုရှိလာတယ်။တစ်ချို့ဆိုရင်လည်း ကားရှိရင် ကားတွေရောင်းပြီး မြေသြဇာယူထားတဲ့ အကြွေးတွေ ဆပ်ရတယ်” ဟု တောင်သူအမျိုးသမီး တစ်ဦး ကပြောသည်။
မြန်မာနိုင်ငံမှာ ကိုဗစ်-၁၉ ကပ်ရောဂါကြောင့် သျှမ်းတောင်ရှိ ဒေသခံ တောင်သူများ ၂ နှစ်ဆက်တိုက်အရှုံးပေါ်ပေမယ့် မြို့နယ်အလိုက် ပရဟိတ လူမှုအသင်းအဖွဲ့အစည်းများက ခြံထဲထိ ဆင်းပြီး လိုက်လံ ခုတ်ယူကာ ရပ်ကွက်တွင်းက ပြည်သူများကို အလှူလုပ်ပေးကြောင်း သိရသည်။
Leave a Comments