သျှမ်းပြည်မြောက်ပိုင်း မူဆယ်ခရိုင် အတွင်း ယခုရက်ပိုင်း PGAF အဖွဲ့က ခြိမ်းခြောက်စာပို့ခဲ့ပြီး ငွေတောင်းခံနေတာကြောင့် ပြည်သူများ စိုးရိမ်နေကြောင်း သတင်းရရှိသည်။


အဆိုပါ PGAF အဖွဲ့က ငွေကျပ် သိန်း ၁၀၀ ထိ ဆက်ကြေးဟုဆိုကာ တောင်းခံနေပြီး ပေး‌ဆောင်မှု ပျက်ကွက်ခဲ့လျှင် မိသားစုလုံခြုံရေး ထိခိုက်လာနိုင်သည်ဟု ခြိမ်းခြောက်မှုများလည်းရှိကြောင်း သိရသည်။

“ကျနော်တို့ မူဆယ်ဘက်မှာပဲကောက်နေတာတော့ မဟုတ်တော့ဘူး။ ဆက်ကြေး ဆိုပြီးတော့ ညဆိုရင် အိမ်ရှေ့မှာ စာရွက်လာထားထားပေးတာ။ သိန်း (၁၀၀) အထိ ဆက်ကြေးတောင်းတာ။ မပေးဘူးဆိုရင် မိသားစု လုံခြုံရေးကို ထိခိုက်လာမယ်လို့လည်း ခြိမ်းခြောက်ထားတယ်” ဟု မူဆယ်မြို့ ဒေသခံ အမျိုးသား တစ်ဦးက ပြောသည်။

ထိုအပြင် ကွတ်ခိုင်မြို့နယ်တွင်လည်း PGAF အဖွဲ့မှာ ခြိမ်းခြောက်စာတွေ ပေးပို့နေပြီး ငွေတောင်းခံမှုကြောင့် ဒေသခံတစ်ချို့က စိုးရိမ်နေကြကြောင်းသိရသည်။

“ အခုက ဘာမှန်းကို မသိတာ။ အရင်တုန်းက လူထု လှုပ်ရှားမှုတုန်းကလည်း လူထုလှုပ်ရှားမှုမှာ ပိုက်ဆံတောင်တယ်ဆိုပြီး သတင်းတွေထွက်လာတော့ အဲ့တုန်းက တစ်ခါရပ်လိုက်ရတယ်။ အခုကလည်း ဒါမျိုးပြန်ထွက်လာတော့ တစ်မျိုးဖြစ်တယ်။ အဖွဲ့စည်းကလည်းများတယ်။ ဒီမျိုးထပ်ထွက်လာတော့ ကြောက်တာပေါ့” ဟု ကွတ်ခိုင်မြို့နယ် အမျိုးသမီးတစ်ဦးက ပြောသည်။

အလားတူ နမ့်ခမ်းမြို့တွင်လည်း PGAF အဖွဲ့မှာ ငွေလိုက်လံတောင်းနေကြောင်း သိရသည်။

ထို PGAF အဖွဲ့သည် ယခု မေလ အတွင်းမှာ ပေါ်ပေါက်လာပြီး လူငယ်များသာရှိထားကြောင်း မူဆယ်မြို့ ငွေလာတောင်းချိန်တွင် CCTV ထဲတွေ့ရသည်။

“ PGAF က ဘယ်အဖွဲ့အစည်းလဲဆိုတာ ကျနော်တို့လည်း သေချာမသိဘူး” ဟု နမ့်ခမ်းမြို့ဒေသခံ တစ်ဦးက ပြောသည်။

ပြည်သူများကလည်း ထိုဒေသတွင်းလှုပ်ရှားနေသည့် တိုင်းရင်းသားလက်နက်ကိုင်အဖွဲ့စည်းများကို PGAF အဖွဲ့အကြောင်းကို စိစစ်ပေးရန် တောင်းဆိုနေကြသည်။

“ ကျနော်တို့လည်း ဒီနယ်မြေ မှာ လှုပ်ရှားနေတဲ့ SSPP, TNLA, KIA, RCSS တို့ကို အကူညီတောင်းထားတယ်။ သူတို့ကိုလည်း ဒီ PGAF အဖွဲ့ကို စိစစ်ပေးဖို့တောင်းဆိုထားတယ်။ ဒါမဲ့သူတို့ဘက်က ဘာမှ တုန့်ပြန်မှုမရှိသေးဘူး။ ပြီးတော့အဲ့အဖွဲ့က ဘယ်သူတွေလည်း မသိရဘူး။ ပိုက်ဆံတွေလိုက်တောင်းနေပြီး ခြိမ်းခြောက်နေတာ”ဟု မူဆယ်မြို့ ဒေသခံ အမျိုးသားတစ်ဦး ကပြောသည်။

ထို PGAF အဖွဲ့ မှ တောင်းခံသည့် ငွေများကို ပြည်သူတချို့က ငွေလွှဲပေးသူများလည်းရှိကြောင်း သိရသည်။