သျှမ်းပြည်တောင်ပိုင်း အင်းလေးဒေသရှိ ဟဲယာရွာမကျေးရွာမြောက်ပိုင်းရှိ ကွာရန်တင်းစင်တာတစ်ခုမှ မီးစက်နှင့် ဆက်စပ်ပစ္စည်းများ ခိုးယူခြင်းခံရကြောင်း သတင်းသိရသည်။
ဟဲယာရွာမကျေးရွာရှိ အောင်ပင်လယ် အိမ်ဝန်းအတွင်းမှ ကွာရန်တင်းစင်တာ 10kv မီးစက် ဘထ္ထရီ များ အပါအဝင် စုစုပေါင်း သိန်း ၅၀ ကျော် တန်ဖိုးရှိသည့် ပစ္စည်းများ ခိုးယူခြင်းခံလိုက်ရ ကြောင်း သိရသည်။
“ခိုးယူခံလိုက်ရတယ်ဆိုတာ မနေ့ကမှ သိလိုက်ရတာပါ၊ ခိုးသွားတာတော့ တစ်ပတ်လောက်ရှိနေပြီ၊ 10 KV မီးစက်ထဲက ဘက်ထရီနှစ်လုံး၊ KL 20 ဒိုင်နမိုထဲက ကွိုင် နဲ့ မီးအားမြင့် စက်က ကွိုင်ပစ္စည်းတွေ၊ မီးကြိုးတွေ ခိုးယူသွားပါတယ်၊ စုစုပေါင်း သိန်း ၅၀ ကျော်တန်ဖိုးရှိတယ်” ဟု အောင်ပင်လယ် အိမ်ဝန်းနှင့် နီးစပ်သည့် ဒေသခံတစ်ဦးက သျှမ်းသံတော်ဆင့်ကို ပြောသည်။
ဟဲယာရွာမကျေးရွာအတွင်း ကိုဗစ်ဖြစ်ပွားမှုနှုန်း လျှော့ကျလာသည့်အတွက် ကွာရန်တင်းစင်တာမှာလည်း လူမရှိသည့်အချိန်တွင် ခိုးယူခြင်းခံလိုက်ရကြောင်း သိရသည်။
ဟဲယာရွာမ ကျေးရွာသည် ရပ်ကွက်ပေါင်း ၁၂ ရပ်ကွက်ရှိနေပြီး အစိုးရ ကွာရန်တင်းစင်တာ ဆေးရုံဆေးခန်းနှင့် ကိုဗစ်ဖြစ်ပွားမှု မြင့်တက်လာသည့် ကာလအတွင်း ဖွင့်လှစ်ထားသည့် ပုဂ္ဂလိက နှင့် NGO များ၏ ကွာရန်တင်းစင်တာ များလည်းရှိနေကြောင်း သိရသည်။
လက်ရှိ ဟဲယာရွာမကျေးရွာအတွင်းတွင် စစ်ကောင်စီလက်အောက်ခံ ရဲ နှင့် စစ်သားများ သွားလာလှုပ်ရှားမှု ရှိနေပြီး ခိုးယူပျောက်ဆုံးမှုများလည်း မကြာခဏဖြစ်ပွားလေ့ရှိကြောင်း သတင်းသိရသည်။
