သျှမ်းပြည်တောင်ပိုင်း တောင်ကြီးမြို့ အထက် (၄) မိုင် ဘုရား ၉ ဆူ ကျေးရွာ နေအိမ်တစ်ခုကို ပအို၀်း အမျိုးသားအဖွဲ့အစည်း (PNO )က စစ်ကောင်စီ နှင့် ပူးပေါင်းပြီး ဖျက်ဆီးခဲ့ကြောင်း စုံစမ်းသိရှိရသည်။
မေလ ၂၈ ရက်နေ့က PNO တပ်သား ၊ စစ်သား နှင့် ရဲတို့က ဘုရား (၉) ဆူ ကျေးရွာအတွင်း ရှိနေအိမ်တစ်ခုကို အတင်းအဓမ္မ ဝင်ရောက် ဖျက်ဆီးသွားခဲ့ကြောင်းသိရသည်။
လာရောက်ဖျက်ဆီးချိန်တွင် အိမ်တွင်းရှိ ပစ္စည်းများကို ဖြစ်သလို ကားပေါ်တင်ပေးပြီး နေအိမ်ကို တိုင်တစ်တိုင် မချန် ဖျက်ဆီးပစ်လိုက်ကြောင်း အိမ်ရှင်ပြောပြချက်အရသိရသည်။ လာရောက်ဖျက်ဆီးချိန်တွင် စစ်အင်အား (၅၀) ပါဝင်ရှိကြောင်း သိရသည်။
“ သူတို့လာဖျက်ဆီးတုန်းက စစ်အင်အား (၅၀) လောက်ရှိတယ်။ သူတို့ဖျက်ဆီးတာကို ဗီဒီယို ရိုက်မယ်လို့ပြောထားပြောတာကို မရဘူး။ ရိုက်ရင် သူတို့ဖမ်းမယ်။ ပစ်မယ်လို့လည်း ကျမတို့ကို ခြိမ်းခြောက်တယ်။ ပစ္စည်းကိုလည်း ဖြစ်သလိုပဲ ကားပေါ်တင်ပေးလိုက်တယ်။ လူမနေတဲ့ နေရာတစ်နေရာမှာ ကျမတို့ ပစ္စည်းကို သွားချပေးလိုက်တယ်။ အိမ်လည်းနေလို့မရအောင် ဖျက်လိုက်တာ” ဟု အိမ်ဖျက်ဆီးခံလိုက်ရသည့် အမျိုးသမီးက ပြောသည်။
အဆိုပါ နေအိမ်ကိုလည်း အိမ်ရှင်ကိုယ်တိုင် ဖျက်ဆီးပေးရန်အတွက် ပိုက်ဆံ (၄) သိန်းနှင့် လာရောက်ညှိနှိုင်းသွားခဲ့ပြီး၊ အိမ်ရှင်က လက်မခံသည့်အတွက် PNO တပ်သားများက ၎င်းတို့၏ နေအိမ်ကို လာရောက် ဖျက်ဆီးပစ်လိုက်ကြောင်းသိရသည်။
ထိုနေအိမ်သည် (၄) ဧက ကျယ်ဝန်းပြီး နှစ်ပေါင်း (၃၀) ကျော် နေထိုင်လာခဲ့ပြီး PNO တပ်ဖွဲ့သည် ထိုခြံကို လိုချင်ခဲ့သည်မှာ နှစ်ပေါင်း (၂၀) ကျော်ရှိလာပြီဖြစ်ကြောင်း အိမ်ဖျက်ခံရသည့် အိမ်ရှင်က ပြောသည်။
“ ဒါက ကျမတို့ ဘိုးဘွားကတည်းနေလာတဲ့အိမ်ဖြစ်တယ်။ နေလာတာလည်း နှစ်ပေါင်း (၃၀) ကျော်ရှိနေပြီး။ သူတို့က ကျမတို့အိမ်နဲ့ ပြသာနာဖြစ်လာနေတာ နှစ်ပေါင်း (၂၀) ရှိနေပြီး။ ကျမတို့က မထွက်ပေးတော့ အခုသူတို့ ဒီလိုလုပ်တာ။ စစ်တပ်နဲ့ ပေါင်းပြီးတော့ ရုံးတက်ပြီးတော့ ကျမတို့အိမ်ကို သိမ်းလိုက်တာပါ။ အခုဆို ကျမတို့ ဆွေမျိုးအိမ်မှာသွားနေနေရတယ်” ဟု အိမ်ရှင်က ထပ်ပြောသည်။
ဖျက်ဆီးခံလိုက်ရသည့် နေအိမ်သည် ဘိုးဘွားနယ်မြေဖြစ်ပြီး၊ လယ်ယာပိုင်ဆိုင်သည့် လက်မှတ်မရှိကြောင်း၊ တိုင်းရင်းသားနယ်မြေများတွင် လယ်ယာပိုင်ဆိုင်မှု လက်မှတ်များမရှိကြသော်လည်း နားလည်မှုဖြစ်တာ နေလာခဲ့သည်မှာ ယနေ့ထိတိုင်ဖြစ်သည်။
ထိုပိုင်ဆိုင်မှု မရှိသည်ကို အစိုးရ ၊အာဏာရှင်များ၊ လက်နက်ကိုင်တပ်ဖွဲ့များက အခွင့်ကောင်းယူကာ သိမ်းယူလေ့ရှိကြသည်။
PNO တပ်ဖွဲ့သည် ဆီဆိုင်မြို့နယ် ၊ ဟိုပုံးမြို့နယ် အတွင်းရှိ ကျေးရွာများကို တပ်သားများကောက်ယူနေပြီး ငွေကြေးတောင်းယူမှုများလည်းရှိနေကြောင်း သိရသည်။
ထိုအပြင် ယခုရက်ပိုင်း တောင်ကြီးမြို့နယ်အထိ တပ်သားများကို ကောက်ယူလာခဲ့ကြောင်းသိရသည်။
Leave a Comments