ယခုရက်ပိုင်း သျှမ်းပြည်မြောက်ပိုင်း လောက်ကိုင်မြို့ အတွင်းရှိ လောင်းကစားရုံတွင် တရုတ်စကား နှင့် အင်္ဂလိပ်စာ တတ်ကျွမ်းရမည်ဖြစ်ပြီး နိုင်ငံခြားသားများ လောင်းကစားဂိမ်းတွင် ရင်းနှီးမြှုပ်နှံလာအောင် အလုပ်ခေါ်နေကြောင်း စုံစမ်းသိရသည်။
ထိုအလုပ်ခေါ်စာထဲတွင် လောက်ကိုင်မြို့မှာ အလုပ်လုပ်ရမည် ဖြစ်ပြီး၊ အသက် ၁၈ နှစ်မှ အသက် ၄၀အရွယ် ထိဖြစ်ပြီး အင်္ဂလိပ်စကားတတ်ကျွမ်းပါက လစာ တလလျှင် မြန်မာကျပ်ငွေ (၁၀) သိန်း နှင့် တရုတ်စကားတတ်ကျွမ်းပါက တစ်လလျှင် မြန်မာကျပ်ငွေ (၁၃)သိန်း ပေးဆောင်မည်ဟု အလုပ်ခေါ်သည့် ကုမ္ပဏီ မှ ၀န်ထမ်းအမျိုးသမီး တစ်ဦးက သျှမ်းသံတော်ဆင့်ကို ပြောသည်။
“အွန်လိုင်းဂိမ်းဖြစ်တယ်။ နိုင်ငံခြားသားတွေနဲ့ စကားပြောပြီးတော့ ဂိမ်းလာဆော့အောင်ခေါ်ရမယ်။ ဂိမ်းထဲမှာ ပိုက်ဆံ များများ ရင်းနှီးလာအောင်လုပ်ပေးရမယ်” ဟု အလုပ်ခေါ်သည့် ကုမ္ပဏီထဲက တာဝန်ရှိသူ အမျိုးသမီးက ပြောသည်။
ထိုအွန်လိုင်းဂိမ်းအလုပ်လုပ်ရန် စိတ်၀င်စားပါက ၀န်ထမ်းလုပ်မည့်သူကို သင်တန်းပေးသွားမည်ဖြစ်ကြောင်း သိရသည်။
“ စစချင်းမှာတော့ သင်တန်းပေးပါတယ်။ သင်တန်းပေါ်မှာ မူတည်ပြီးမှ ကျမတို့လည်း အလုပ်ခန့်တာပါ။ တရား၀င်ဖွင့်လှစ်တဲ့ ဂိမ်းတော့မဟုတ်ပေမယ့် လောက်ကိုင်မှာတော့ တရား၀င်ဖွင့်တဲ့ အတိုင်းပါပဲ။ လုံခြုံရေးလည်း ယူထားတယ်။ နောက် နိုင်ငံရေးကလူတွေ၊ လူကြီးတွေနဲ့လည်း ရင်းနှီးတယ်” ဟု ၎င်း အမျိုးသမီးက ဆိုပါသည်။
သျှမ်းပြည်မြောက်ပိုင်းတွင် နေထိုင်သည့် ပြည်သူများသည် ကိုဗစ်-၁၉ ကူးစက်ရောဂါကြောင့် တရုတ်နိုင်ငံသို့ သွားရောက်အလုပ်လုပ်ရန် ခက်ခဲလာကြပြီး ၀င်ငွေမရှိသည့်အတွက် လူငယ်များသည် ထိုအွန်လိုင်းဂိမ်းမှ လစာကောင်းသဖြင့် စိတ်၀င်စားကြသည်။
“ အလုပ်က လစာ ကောင်းတယ်။ ၁၀ သိန်းအထက်ပေးပြီးတော့ အလုပ်ခေါ်နေတာ။ လောက်ကိုင်မှာသွားလုပ်ရမယ်။ ဘာသာစကားကျွမ်းကျင်သူဖြစ်ရမယ်။ အလုပ်က အွန်လိုင်းဂိမ်းတွေ၊ ဘာသာပြန်အလုပ်ရှိတယ်ဆိုပြီးခေါ်တာ။ ဒီကလူတွေကတော့ အလုပ်မရှိတော့ စိတ်၀င်စားကြတယ်” ဟု သီပေါမြို့ အသက် ၂၃ နှစ်ဝန်းကျင်ရှိ လူငယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
လောင်းကစားဂိမ်းမှ နိုင်ငံခြားသားများ စိတ်၀င်စားအောင် စကားပြောဆိုခြင်း၊ ဆွဲဆောင်မှု ပြုလုပ်ရကြောင်းလည်း သိရသည်။
“အရပ်စကားပြောရရင် လောင်းကစားဂိမ်းတွေ ဆော့လာအောင် လိမ်ညာပြောဆိုရတာပဲ။ ချက်ဘောက်ကနေ လိမ်ရတယ်။ နောက်ပြီး မိန်းကလေးရုပ်ကို ပြပြီး လာဆော့အောင်လိမ်ရတာပေါ့” ဟု လက်ရှိ လောင်းကစားဂိမ်း လုပ်ကိုင်သည့် တာချီလိတ်မှ အသက် ၂၅ နှစ် အရွယ်ရှိ လူငယ်တစ်ဦး က သျှမ်းသံတော်ဆင့် ကို ပြောသည်။
ယခု နိုင်ငံရေးအခြေအနေ နှင့် ကိုဗစ်- ၁၉ ကပ်ရောဂါကြောင့် ပြည်သူများက အလုပ်လက်မဲ့ ဖြစ်နေချိန်တွင် လစာကောင်းသော အလုပ်ကို လာပေးသည့်အတွက်ကြောင့် ပြည်သူတစ်ချို့က သွားလုပ်လျက်ရှိကြောင်း သိရသည်။
“ အခုက နိုင်ငံရေးအခြေနေလည်း မကောင်းဘူး။ အလုပ်အကိုင်လည်း မကောင်းတော့ အဲ့လိုမျိုးလစာကောင်းတဲ့ အလုပ်တွေ့တော့ သွားလုပ်ချင်ကြတယ်။ ကျနော်လည်း အစက မသိလို့ သွားတော့မလို့ပဲ။ ကံကောင်းလို့ မသွားလိုက်ရတာ။ ကျနော်တို့ သီပေါက သွားနေတာတော့ ရှိတယ်” ဟု သီပေါလူငယ် အမျိုးသားက ထပ်လောင်းပြောသည်။
လူမှုကွန်ရက်စာမျက်နှာ (Facebook) တွင် လစာကောင်းပေးပြီး အလုပ်ခေါ်သည်ကို သေချာစုံစမ်းမေးမြန်းပြီးမှ သွားရောက် အလုပ်လုပ်ရန် လိုအပ်ကြောင်း ထိုသည်မှ မဟုတ်ပါက နောက်ပိုင်းပြဿနာဖြစ်လာနိုင်ကြောင်းလည်း သီပေါလူငယ်က ထောက်ပြပြောဆိုသည်။
အဆိုပါ အလုပ်မျိုးသည် တရားဝင်အလုပ်မဟုတ်ကြောင်း ၊ မြန်မာ – ထိုင်း နယ်စပ်ဖြစ်သည့် တာချီလိတ်မြို့တွင်လည်း ထိုအလုပ်အများအပြားရှိကြောင်းသိရသည်။ အလားတူ မြဝတီဘက်တွင်လည်း ထိုအလုပ်မျိုးလုပ်ကိုင်ရန်အတွက် လူခေါ်နေလျက်ရှိကြောင်းသိရသည်။
