သျှမ်းပြည်မြောက်ပိုင်း မူဆယ်မြို့နယ် အမှတ် (၂) ဈေးအတွင်း လမ်းကျူးကျော်ရောင်းသူများကို စည်ပင်က အခွန်တိုးကောက်မှုပြုလုပ် ကြောင်း သတင်းပေးပို့ချက်အရ သိရသည်။
ဧပြီလမှ စပြီး စည်ပင်ကော်မတီမှ အသိပေးထားခြင်းမရှိဘဲ ဈေးအတွင်းရှိ လမ်းကျူးကျော်ရောင်းသူများကို အခွန်တိုးကောက်လာကြောင်း သိရသည်။
“ ဆိုင်ခန်းရှေ့မှာ ခုံတင်ပြီးတော့ ရောင်းတာကို တိုးကောက်တာပါ။ အရင်က ၂၀၀၀ ကျပ် ပေးရတာ။ အခုက ၅၀၀၀ ကျပ် အထိတိုးကောက်လာတယ်။ ဆိုင်ခန်းခက သပ်သပ် ပေးရတာ။ ပြီးတော့ ဆိုင်ခန်းရှေ့မှာ ခုံတင်ရောင်းတာ ကိုလည်း သပ်သပ်ပေးရတာ” ဟု မူဆယ်မြို့ ဒေသခံ ဈေးဆိုင်ရှင်တစ်ဦးက ပြောသည်။
အဆိုပါ အခွန်တိုးကောက်မှုကြောင့် ပြည်သူ နှင့် စည်ပင်ကော်မတီတို့ စကားများခဲ့ပြီး ပြည်သူများတစ်ချို့ စားဝတ်နေရေး ခက်ခဲလာကြောင်း သိရသည်။
ယခု နိုင်ငံရေးအခြေနေ နှင့် ကိုဗစ်- ၁၉ ကြောင့် ပြည်သူများ ရှာဖွေစားသောက်ရာ ခက်ခဲနေချိန်တွင် စည်ပင်က အခွန်တိုးကောက်လာသောကြောင့် စားဝတ်နေရေး ခက်ခဲလာကြောင်း သိရသည်။
“ သူတို့အဲ့လိုလာတိုးကောက်တော့ စည်ပင်နဲ့ ပြည်သူတွေ စကားများကြသေးတယ်။ ပြီးတော့ အခုက ရှာစားရတာလည်း ခက်ခဲနေတဲ့အချိန်ဖြစ်တယ်။ ဝင်ငွေနည်းတဲ့အချိန်မှာ သူတို့ကလည်း အခွန်တွေ လာတိုးကောက်တော့ ကျနော်တို့ စားဝတ်နေရေးအတွက်လည်း ခက်ခဲတာလေ” ဟု မူဆယ်မြို့ ဒေသခံ အမျိုးသားတစ်ဦးက ပြောသည်။
စည်ပင်ခွန်သည် ယခင်က ပုံမှန် (၂၀၀၀) ကျပ်မှ ယခု (၅၀၀၀) ကျပ် အထိတိုးကောက်လာခဲ့ကြောင်းသိရသည်။