သျှမ်းပြည်မြောက်ပိုင်း မူဆယ်မြို့ တောင်ရပ်ကွက်တွင် နေထိုင်သည့် နေအိမ်တစ်လုံးကို ယနေ့ (မေ ၂၄)ရက် နံနက် အစောပိုင်း တွင် PGAF ဟု အမည်ရအဖွဲ့က အသံမိုင်းဖောက်ခဲ့ကာ ဆက်ကြေးကောက်သည့် စာရွက်ပစ်ပေးခဲ့ကြောင်း စုံစမ်းသိရသည်။

ယနေ့ (မေ ၂၄) နံနက် ၁နာရီတွင် မူဆယ်မြို့ တောင်ရပ်ကွက်တွင် အသံမိုင်း အသေးစားပေါက်ကွဲမှု ဖြစ်ပွားခဲ့ပြီး ၊ ထိုအသံမိုင်းနှင့် အတူ မနက် ၉နာရီမှ ၁၂နာရီ အတွင်း အခွန်ဆက်ကြေး ကျပ်သိန်းငွေ (၁၀၀) တိတိ လာပေးရန် ရေးထားသားသည့်စာ ကို ခြံထဲတွင် ပစ်ခဲ့ကြောင်း စာထဲတွင် PDAF ဟုရေးသားထားကြောင်း မူဆယ်မြို့ တွင် နေထိုင်သည့် အသက် ၃၅နှစ်အရွယ်ရှိ အမျိုးသား တစ်ဦးက သျှမ်းသံတော်ဆင့်ကိုပြောသည်။

“ မနက် ၁နာရီလောက် မိုင်းကို ခြံထဲပစ်ထည့်လိုက်တယ်။ အသံမိုင်းပဲ၊ နောက် ဆက်ကြေးကောက်တဲ့ စာရွက်လည်း ခြံထဲတွေ့တာ။ PGAF လို့ရေးထားတယ်။ ဘယ်အဖွဲ့လည်းတော့မသိဘူး” ဟု ၎င်းက ပြောသည်။

အဆိုပါ ဆက်ကြေးကောက်ခံသည့် နေအိမ်သည် တောင်ရပ်ကွက်တွင် ငှားရမ်းနေထိုင်သည့်သူဖြစ်ပြီး၊ သာမာန်အရပ်သား ဖြစ်ကာ ကျပ်သိန်း (၁၀၀) ပေးဆောင်ရန်ခက်ခဲကြောင်း သိရသည်။

ဆက်လက်ပြီး မူဆယ်မြို့ တွင်နေထိုင်သည့် အသက် ၃၀ကျော် အမျိုးသားတစ်ဦးက “ PGAF က မူဆယ်မြို့က PDF အဖွဲ့တွေလည်းမဟုတ်ဘူးလို့ပြောတယ်။ အဲ့အဖွဲ့က လုပ်စားတဲ့အဖွဲ့လို့ ပြောတယ်” ဟု သျှမ်းသံတော်ဆင့်ကို ပြောသည်။

ထိုဆက်ကြေးကောက်သည့်စာထဲတွင် “လူကြီးမင်းတို့ အသက်အိုးအိမ်ကို စိုးရိမ်တန်ဖိုးထားပါက ဖုန်းနံပတ် 09251032068 ကို Wave Money ဖြင့် လုပ်ငန်းစဥ်နံပတ် Passoword ၆ လုံးနှင့် အတူ ငွေကျပ် သိန်း (၁၀၀) တိတိ မနက် ၉နာရီ မှ ၁၂နာရီအတွင်း ကျုပ်တို့ထံ အလေးထားပေးပို့ရမည်။ လျစ်လျူရှုပျက်ကွက်ပါက မိတ်ဆွေ တို့ မိသားစုနှင့် အသက်အိုးအိမ် ထိခိုက်နစ်နာဆုံးရှုံးရမည်ကို ကျုပ်တို့ အနေနဲ့ အာမ မခံနိုင် “ဟု ရေးသားထားသည်။

မူဆယ်မြို့တွင် တရုတ်နိုင်ငံ နယ်စပ်မြို့ဖြစ်ပြီး ပြည်သူ့စစ်၊ လက်နက်ကိုင်တပ်ဖွဲ့များစွာ လှုပ်ရှားသည့်ဒေသဖြစ်ကာ လက်နက်များလည်း အလွယ်တကူ ၀ယ်ယူနိုင်သည့် ဒေသဖြစ်သည်။

ကိုဗစ်-၁၉ ဖြစ်ပွားပြီးနောက် နယ်စပ်ကုန်သွယ်ရေးလည်း ပိတ်ဆိုင်းခဲ့သည်မှာ ယနေ့ထိတိုင်ဖြစ်ပြီး စစ်အာဏာသိမ်း ပြီးနောက်လည်း မူဆယ်မြို့နေ ပြည်သူများသည် တနေ့ထက် တနေ့ ပိုကြပ်တည်းလာကာ လုယက်မှု၊ ဓားပြတိုက်မှုကလည်း လစဥ် ၃မှုအထက်ရှိနေကြောင်းသိရသည်။

“ ကျမ အနေနဲ့ တနေ့တနေ့ စိုးရိမ်ပူပန်မှုနဲ့ နေနေရတယ်။ ညနေ ၅နာရီလောက်ဆို အိမ်ပြန်ရတယ်။ ကိုယ်က တရုတ်ငွေလှဲတဲ့အလုပ်လုပ်တော့သတိထားနေရတယ်။ ဓားပြတိုက်တဲ့သူ လုယက်သူတွေ ကလည်း ကျမတို့ လိုလူကို အထင်ကြီးပြီးတော့ အမြဲတမ်းလိုလို ဓားပြတိုက်နေတယ်”ဟု တရုတ်ငွေလှဲလုပ်ကိုင်နေသည့် မူဆယ်မှ မအားရှန် က သျှမ်းသံတော်ဆင့်ကိုပြောသည်။

မူဆယ်မြို့တွင် စစ်အာဏာသိမ်းပြီးနောက် မူးယစ်ဆေး၀ါးသုံးစွဲသူများလည်း ပိုများလာသဖြင့် ဓားပြတိုက်မှုမှာလည်း (၁၀)မှု အထက်ရှိပြီး၊ ရဲတပ်ဖွဲ့မှ ဖော်ထုတ်နိုင်သည့်အဖွဲ့မှ တခုတည်းသာရှိကြောင်းသိရသည်။