၏သျှမ်းပြည်မြောက်ပိုင်း ကွတ်ခိုင်မြို့အတွင်း ခိုးယူလုယက်မှု များပြားနေသည့်အတွက် ဒေသခံပြည်သူ များက စိုးရိမ်မှု မြင့်တက်နေကြောင်း သတင်းသိရသည်။
ယနေ့ (မေလ ၂၃) ရက် နေ့လည်းပိုင်း ၁၂ နာရီဝန်းကျင် တွင် ရပ်ကွက် ၅ ရှမ်းဘုန်းကြီးကျောင်း အနီးရှိ နေအိမ်တစ်လုံးဖောက်ထွင်းခံရပြီး ဆိုင်ကယ်နှင့် ဖုန်းများ ပါသွားကြောင်း ဒေသခံများထံမှ သိရသည်။
“ဒီနေ့ နေ့ခင်းအချိန်ကြီးမှာ ခိုးယူခံရတာပါ၊ ဘုန်းကြီးကျောင်းနားက အိမ်တစ်လုံးကို ဒီနေ့ ၁၂ နာရီလောက်မှာ ဝင်ဖောက်ပြီး အိမ်ထဲက ဆိုင်ကယ်နဲ့ ဖုန်းကိုယူသွားတယ်လို့ သိရတယ်၊ ပိုက်ဆံပါမပါတော့ မသိရဘူး” ဟုကွတ်ခိုင်မြို့မှ ဒေသခံအမျိုးသမီး တစ်ဦးက သျှမ်းသံတော်ဆင့်ကိုပြောသည်။
အလားတူ ယမန်နေ့ ( မေလ ၂၀) ရက်တွင် လည်း အမည်မသိ လက်နက်ကိုင်တစ်စုသည် မူဆယ်မြို့မှ ပြန်လာသည့် တရုတ်အမျိုးသမီးတစ်ဦး၏ နေအိမ်ဓားပြတိုက်ခံရပြီး တရုတ်ငွေ ယွမ် ၈ ထောင် (၂၄ သိန်း) နှင့် ဖုန်းတစ်လုံး ပါသွားခဲ့ကြောင်း သိရသည်။
လက်နက်ကိုင်တပ်ဖွဲ့များ ပေါများသည့် သျှမ်းပြည်မြောက်ပိုင်းရှိ မြို့နယ်များတွင် ကွတ်ခိုင်မြို့နယ်အပြင် မူဆယ်မြို့၊ နမ့်ခမ်းမြို့၊ လားရှိုးမြို့၊ ကျောက်မဲမြို့ နှင့် တခြားသော မြို့နယ်များမှာလည်း ဓားပြတိုက်မှု ခိုးယူလုယက်မှုများ မကြာခဏဖြစ်ပွားလေ့ရှိကြောင်း သိရသည်။
Leave a Comments