စဝ်ခွန်ထွန်းဦး သေဆုံးသွားသည့် ၁ လပြည့် အထိမ်းမှတ်အနေဖြင့် ထိုင်းနိုင်ငံ ချင်းမိုင်မြို့ ဝတ်ကူတောက်ဘုန်းကြီးကျောင်းတွင် လာမည့် မေလ ၂၉ ရက်တွင် ဆွမ်းကပ်ပြီး ဂုဏ်ပြုအခမ်းနား ပြုလုပ်သွားမည် ဖြစ်ကြောင်း သိရှိရသည်။
လာမည့် မေ ၂၉ ရက်တွင် စဝ်ခွန်ထွန်းဦး သေဆုံးသည့် ၁ လပြည့်အနေဖြင့် ထိုင်းနိုင်ငံ ချင်းမိုင်မြို့ ၀တ်ကူတောက်ဘုန်းကြီးကျောင်းတွင် ထိုင်းနိုင်ငံရောက် သျှမ်းလူမှု အသိုင်းအ၀ိုင်းမှ စ၀်ခွန်ထွန်းဦး အားရည်စူးပြီး နေ့ဆွမ်းကပ်ပြီး မွန်းလွဲပိုင်း ၃ နာရီခွဲမှ ၅ နာရီခွဲအထိ ကျင်းပသွားမည်။
ထို့ပြင် စဝ်ခွန်ထွန်းဦး ရေးသားခဲ့သည့် နိုင်ငံရေးစာစုများကို ဖတ်ကြားခြင်း၊ Short videos များကို ကြည့်ရှုခြင်း၊ စဝ်ခွန်ထွန်းဦးနှင့် သိကျွမ်းခွင့်ရခဲ့သူ လုပ်ဖော်ကိုင်ဖက်များ၏ အမှတ်ရ အောင့်မေ့ဘွယ်စကားများကို နားဆင်ပြီး မှတ်တမ်းဓာတ်ပုံများကိုပြသသွားမည်ဟု သိရသည်။
“ ကျမတို့ ပြုလုပ်ရတဲ့ ရွယ်ရည်ချက်က ၃ ခုရှိတယ်။ ပထမတော့ သူသေဆုံးတာ ၁ လပြည့်အနေနဲ့ ဝမ်းနည်းအောင့်မေ့ခြင်း အနေနဲ့ ဆွမ်းကပ်မယ်။ ပြီးတော့ သူရဲ့ နိုင်ငံရေးအပေါ်လုပ်ဆောင်ချက်၊ သူရဲ့ နိုင်ငံရေး လုပ်ဆောင်ချက်တွေကို ဂုဏ်ယူတဲ့အနေနဲ့ ဂုဏ်ပြုပွဲ အခမ်းနားလုပ်သွားမယ်။ နောက်ဆုံးတစ်ခုကတော့ ထိုင်းနိုင်ငံမှာ မွေးတဲ့ ကျမတို့ တိုင်းရင်းသားတွေလူငယ်တွေ စဝ်ခွန်ထွန်းဦး အကြောင်း သိအောင်ဆိုတဲ့ ရည်ရွယ်ချက်နဲ့ လုပ်သွားမှာပါ” ဟု အခမ်းနားဖြစ်မြောက်ရေးအဖွဲ့ထဲ ပါဝင်သူ နန်းခမ်းအိမ်က ပြောသည်။
စဝ်ခွန်ထွန်းဦးသည် ဧပြီ ၂၉ ရက် တွင် ရန်ကုန်နေအိမ်မှာ သေဆုံးသွားခဲ့သည်။ ၎င်း၏ ရုပ်အလောင်းကို ရန်ကုန်မြို့ ရေဝေးသုဿန်တွင် မေလ ၂ ရက်က မီးသဂြိုလ်ခဲ့ပြီး၊ ကျန်ရှိသည့် အရိုးပြာကို သီပေါမြို့ရှိ စော်ဘွားသင်္ချိုင်းတွင် ဂူသွင်းခဲ့ကြောင်းသိရသည်။
စဝ်ခွန်ထွန်းဦးသည် မြန်မာနိုင်ငံ၏ ရှေ့ဆောင်နိုင်ငံရေးခေါင်းဆောင်တစ်ဦးဖြစ်ပြီး တိုင်းရင်းသားများအတွက် ရပိုင်ခွင့် အခွင့်အရေး၊ တန်းတူရေး နှင့် ဖယ်ဒရယ်ပြည်ထောင်စုအတွက် တိုက်ပွဲဝင်ခဲ့သူ တစ်ဦးဖြစ်သည်။
