သျှမ်းပြည်တောင်ပိုင်း ဆီဆိုင်မြို့နယ်အတွင်းရောက်ရှိနေသည့် စစ်ရှောင် (၅၀၀၀) ခန့် စားနပ်ရိက္ခာ အခက်အခဲ ဖြစ်နေကြောင်း စုံစမ်းသိရှိရသည်။
ထို စစ်ရှောင်များသည် သျှမ်းပြည်တောင်ပိုင်း ဖယ်ခုံမြို့နယ်အတွင်း ပြီးခဲ့သည့် မေလဆန်းပိုင်းတွင် စစ်ကောင်စီ နှင့် ဒေသပြည်သူ့ကာကွယ်ရေးတပ် (PDF) တို့ တိုက်ပွဲပြင်းထန်သဖြင့် ဒေသခံများ ထွက်ပြေးတိမ်းရှောင်လာ ခဲ့ရကြောင်း သိရသည်။
“ဒီပတ်ထဲပဲ ဖယ်ခုံ၊ မိုးဗြဲဘက်က ဒေသခံတွေ ဆီဆိုင်ထဲရောက်လာတာ (၅) ထောင်လောက်ရှိမယ်။ လက်ရှိမှာတော့ သူတို့တွေက စားနပ်ရိက္ခာတွေ အရေးပေါ် လိုအပ်နေတယ်။ ခုတော့ စစ်ရှောင်ဦးရေ အတိအကျစာရင်း ကောက်နေတယ်”ဟု စစ်ရှောင်များကို ကူညီပေးနေသည့် အသက် ၂၈နှစ်အရွယ်ရှိ အမျိုးသားတစ်ဦး က သျှမ်းသံတော်ဆင့် ကိုပြောသည်။
ထို ထွက်ပြေးလာသည် စစ်ရှောင်များသည် ဆီဆိုင်မြို့နယ် တမ်ဖက်ကျေးရွာအုပ်စုအတွင်းက ကျေးရွာများ၊ ဆွေမျိုးမိတ်ဆွေ အိမ်များ၊ ဒေသခံအိမ်များ နှင့် ဘုန်းကြီးကျောင်းများ စသည့် နေရာသို့ လာရောက်ခိုလုံနေကြောင်း သိရှိရသည်။
“ကျနော်တို့ ဆီဆိုင်မြို့နယ်တွင်း ဒီနှစ်ရဲ့ နှစ်စပိုင်းကတည်းက ရောက်လာတဲ့ စစ်ရှောင်တွေ အားလုံးပ ေါင်းလိုက်ရင် (၁) သောင်းကျော်သွားပြီထင်တယ်။ တစ်ချို့ ရောက်လာတဲ့စစ်ရှောင်တွေက နေအိမ်မီးရှို့ ခံရတာတွေရှိသလို၊ လက်နက်ကြီးကျပြီး ပျက်စီးသွားတဲ့ အိမ်တွေလည်း ရှိတယ်” ဟု စစ်ရှောင်များကို ကူညီပေးနေသူ တစ်ဦး ကပြောသည်။
မေ (၁၂) ရက်မှ စတင်ပြီး ဖယ်ခုံမြို့နယ်တွင်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ (PDF) တို့ ကြား တိုက်ပွဲဖြစ်ပွားမှုကြောင့် စစ်ကောင်စီဘက်က လေယာဉ်ဖြင့် စစ်ရေး စစ်ဆင်လျက်ရှိသည်။
အလားတူ မေ (၁၆) ရက်မှာ စစ်ကောင်စီက ဖယ်ခုံမြို့နယ် ဆောင်နန်းခဲကျေးရွာကို တစ်ရွာလုံး မီးရှို့ဖျက်ဆီးခဲ့ကြောင်းသိရသည်။
Leave a Comments