သျှမ်းပြည်ပြန်လည်ထူထောင်ရေးကောင်စီ/သျှမ်းပြည်တပ်မတော် (RCSS/SSA) နှင့် စစ်ကောင်စီတို့သည် တိုင်းရင်းသားပေါင်းစုံ စု၀ေးပြီး စစ်မှန်သည့် ဖက်ဒရယ် ပြည်ထောင်စုကြီး တည်ဆောက်နိုင်ရန် ဆွေးနွေးခဲ့ကြောင်း သတင်းရရှိသည်။
အာဏာသိမ်းခေါင်းဆောင် ဗိုလ်ချုပ်မှူးကြီး မင်းအောင်လှိုင် နှင့် RCSS/ SSA ဥက္ကဋ္ဌ ဗိုလ်ချုပ်ကြီးယွက်စစ် တို့သည့် ယနေ့ ( မေ ၂၀)ရက် နံနက် ၉နာရီခွဲ မှ ၁၁နာရီခွဲထိ နေပြည်တော်တွင် တွေ့ဆုံဆွေးနွေးခဲ့ကြောင်း RCSS /SSA၏ ပြောခွင့်ရ ပုဂ္ဂိုလ် ဒုဗိုလ်မှုးကြီး အုမ်ခေးက သျှမ်းသံတော်ဆင့်ကို ပြောသည်။
ယနေ့ တွေ့ဆုံဆွေးနွေးမှုတွင် ဆွေးနွေးချက်အဖြစ် ငြိမ်းချမ်းရေးကိုမဖြစ်ဖြစ်အောင် အကောင်အထည်ဖော်ရန်၊ ၊ အချင်းချင်းယုံကြည်မှုတည်ဆောက်ကြရန်နှင့် တိုင်းရင်းသားပေါင်းစုံ စုဝေးပြီးစစ်မှန်သည့် ဖယ်ဒရယ် ပြည်ထောင်စုကြီး တည်ဆောက်နိုင်ရန် စသဖြင့် ဆွေးနွေးခဲ့ကြောင်းလည်း ဒုဗိုလ်မှူးကြီး အုမ်ခေးက ပြောသည်။
“ကျနော်တို့ ဆွေးနွေးမှု အခြေအနေကောင်းပါတယ်၊ ငြိမ်းချမ်းရေးကို ဖော်ဆောင်တဲ့လမ်းစဥ်မှာ ယုံကြည်မှုတွေ တည်ဆောက်ကြမယ်၊ ယုံကြည်မှုရလာတဲ့အခါ နိုင်ငံရေးကိစ္စတွေ လက်တွေ့ကျကျ ဆောင်ရွက်ကြမယ်ဆိုတဲ့ အမြင်နဲ့ သူ့ဘက်ကိုယ့်ဘက် တင်ပြမှုတွေက ရည်ရွယ်ချက်ချင်းကွာခြားတာ ကန့်ကွက်တာသိပ်မရှိတော့ ပြောဆို ရတာ အဆင်ပြေပါတယ်” ဟု ဒုဗိုလ်မှူးကြီးအုမ်ခေးက ဆိုသည်။
စစ်ကောင်စီဖိတ်ခေါ်သည့် ငြိမ်းချမ်းရေးဆွေးနွေးပွဲကို တက်ရောက်သည့် တိုင်းရင်းသား လက်နက်ကိုင်တပ်ဖွဲ့ များအနက် ဥက္ကဋ္ဌ ဗိုလ်ချုပ်ကြီးယွက်စစ် ကိုယ်တိုင်ဦးဆောင်သည့် (RCSS/SSA) တပ်ဖွဲ့က ပထမဆုံးအဖွဲ့အနေဖြင့် စစ်ကောင်စီနှင့် တွေ့ဆုံဆွေးနွေးခဲ့ခြင်းဖြစ်သည်။
ယနေ့တွေ့ဆုံဆွေးနွေးမှုတွင် RCSS/SSA ဘက်မှ ဗိုလ်ချုပ်ကြီးယွက်စစ်ကိုယ်တိုင် ဦးဆောင်သည့် အဖွဲ့သားများ အဖြစ် ဗိုလ်မှူးကြီး စိုင်းငင်း နဲ့ ဗိုလ်မှူးကြီး ရှောင်းဟန်တို့ ပါဝင်ကြောင်းသိရသည်။
ယမန်နေ့ စစ်ကောင်စီ သတင်းစာရှင်းလင်းပွဲတွင် ဗိုလ်ချုပ်ဇော်မင်းထွန်း ပြောပြချက်အရ ၃ ရက်ခြား တစ်ခါ တိုင်းရင်းသား လက်နက်ကိုင်အဖွဲ့များဖြင့် ဆက်လက် ဆွေးနွေးသွားမည် ဖြစ်ကြောင်း သိရသည်။
စစ်ကောင်စီ နှင့်တွေ့ဆုံမည့် NCA လက်မှတ်ရေးထိုးထားသည့် တိုင်းရင်းသားလက်နက်ကိုင်များအနက် DKBA၊ MNSP၊ RCSS/SSA၊ ALP၊ PNLA နှင့် LDU စသည့်တိုင်းရင်းသားလက်နက်ကိုင်များ တက်ရောက်မည် ဖြစ်ပြီး၊ NCA လက်မှတ်ရေးထိုးထားခြင်းမရှိသည့် အဖွဲ့ များအနက် “ဝ” တပ်ဖွဲ့ (UWSA)၊ မိုင်းလားတပ်ဖွဲ့ (NDAA) နှင့် သျှမ်းပြည်တိုးတက်ရေးပါတီ၊သျှမ်းပြည်တပ်မတော် (SSPP/SSA) တို့မှ တက်ရောက်မည်ဟုလည်း သတင်းသိရသည်။
