မြန်မာ – တရုတ် နယ်စပ် သျှမ်းပြည်မြောက်ပိုင်း နမ့်ခမ်းမြို့အနီးတွင် ယနေ့ (မေလ ၁၉) ရက် မနက် ၇ နာရီဝန်းကျင်တွင် ဗုံးအဆက်မပြတ် ပေါက်ကွဲမှုကြားရသဖြင့် နမ့်ခမ်းမြို့ ဒေသခံများက စိုးရိမ်ထိတ်လန့်နေကြောင်း စုံစမ်းသိရသည်။
ယနေ့မနက်ပိုင်းအချိန်တွင် ဗုံးသံ အချက် ၂၀ ထက်မနည်း ဆက်တိုက်ကြားနေရကြောင်း နမ့်ခမ်းဒေသခံ အမျိုးသားတစ်ဦး ကသျှမ်းသံတော်ဆင့်ကို ပြောသည်။
“ ဗုံးပေါက်ကွဲသံက ဟိုတရုတ်ဘက်ကနေ ကြားရတာ အချက် ၂၀ လောက်ရှိတယ်။ ကျနော်တို့ နမ့်ခမ်းမြို့အထိ အကျယ်ကြီးကြားရတယ်။ ကျနော်တို့ဘက်က ပြည်သူတွေကို ထိတ်လန့်စေတယ်။ တစ်ချို့ဆိုဈေးတောင် သွားမရောင်း ရဲကြတော့ဘူး” ဟု နမ့်ခမ်း ဒေသခံ အမျိုးသား တစ်ဦးက ပြောသည်။
အဆိုပါ ပေါက်ကွဲသံသည် တရုတ်နိုင်ငံဘက်မှလာသည့်အသံဖြစ်ပြီး တရုတ်စစ်သားများက စစ်ရေးလေ့ကျင့်မှုကြောင့် ဖြစ်သည်ဟု တရုတ်ပြည်အတွင်းနေထိုင်သည့် ဒေသခံသျှမ်းလူမျိုးတစ်ဦး က သျှမ်းသံတော်ဆင့်ကို ပြောသည်။
“ တရုတ်ပြည်ထဲမှာသူတို့ဘက်က စစ်ရေးလေ့ကျင့်နေတာ။ သေနတ်ပစ်လေ့ကျင့်နေတာဖြစ်တယ်။ သူတို့ပစ်လာတာ ၂ ရက်လောက်ရှိနေပြီ” ဟု တရုတ်ပြည်တွင်း နောင်တောင်းကျေးရွာအုပ်စုထဲတွင်နေထိုင်သည့် ဒေသခံတစ်ဦး ကပြောသည်။
ထိုဗုံးမကြာခဏပေါက်ကွဲမှုကြောင့် အသက် (၃၀) အရွယ်ရှိသည့် အမျိုးသမီးတစ်ဦးက “ စိတ်ပူတာပေါ့။ အခုက နိုင်ငံရေးအခြေနေကလည်း မတည်မငြိမ်ဖြစ်နေတာ။ ဒီလို ဗုံးသံတွေမကြာခဏ ကြားနေရတာတော့ သတိထားပြီး နေနေရတယ်။ ကြောက်နေရတယ်” ဟု ပြောသည်။
သျှမ်းပြည်မြောက်ပိုင်း နမ့်ခမ်းမြို့နယ်ထဲတွင် မြောက်ပိုင်းမဟာမိတ်၊ စစ်ကောင်စီ၊ ပြည်သူ့စစ် တို့သွားလာလှုပ်ရှားနေသည့် ဒေသတစ်ခုဖြစ်ပြီး တရုတ်နှင့် နယ်မြေထိစပ်နေသည့် မြို့တမြို့ဖြစ်သည်။
