သျှမ်းပြည်မြောက်ပိုင်း မူဆယ်မြို့ စျေးရပ်ကွက်ရှိ စိုင်းညီဖုန်းဆိုင်ကို ဓားပြတိုက်သည့် လူငယ် (၄) ဦးနှင့် အတူ လက်နက်များ ဖမ်းဆီးရမိကြောင်း စုံစမ်းသိရှိရသည်။
လွန်ခဲ့သည့် မေလ ၁၀ ရက်တွင် စိုင်းညီဖုန်းဆိုင် ဓားပြတိုက်ခံရပြီး မေလ ၁၅ ရက်တွင် ထိုဓားပြတိုက်သူ ၄ ဦးကို ဖမ်းဆီးရမိပေမယ့် ခေါင်းဆောင် ၂ ဦး လွတ်မြောက်နေလျက်ရှိကြောင်း ဖုန်းဆိုင်ပိုင်ရှင် က သျှမ်းသံတော်ဆင့် ကို ပြောသည်။
“၁၅ ရက်နေ့ကဖမ်းမိတာ။ ၄ ယောက်ဖမ်းမိတာပါ။ သူတို့နေအိမ်မှာ သွားဖမ်းတော့ လက်နက်တွေလည်းတွေ့တယ်။ အဲ့ ၄ ယောက်ရဲ့ ထွက်ဆိုချက်အရ အခုက ၂ ယောက်လွတ်မြောက်နေဆဲဖြစ်တယ်။ သူတို့ကို အခုတော့ ရဲစခန်းမှာ ပို့ထားတယ်” ဟု ၎င်း က ဆိုသည်။
ဖမ်းဆီးရမိသည့် ၄ ဦးထံတွင် ဖုန်း အလုံး ၂၀ ပြန်လည်ရရှိပြီး လက်ရှိမှာ ဖုန်းအလုံး ၄၀ ကျော် ပြန်လည်ရရှိရန် ကျန်နေသေးကြောင်း နှင့် အဆိုပါဖမ်းဆီးရမိသူများကို မူဆယ်မြို့မရဲစခန်းသို့ ပို့ဆောင်ထားကြောင်း သိရသည်။
“ အခုက ဖုန်းအလုံး ၂၀ လောက်တော့ ပြန်ရတယ်။ ပြန်ရဖို့ ဖုန်းအလုံး ၄၀ လောက်တော့ ကျန်သေးတယ်။ အခုပြန်ရတဲ့ အလုံး ၂၀ လည်း ကောင်းပါသေးတယ်။ ကျန်တဲ့ပစ္စည်းကလည်း တန်ဖိုး သိန်း ၅၀၀ ဝန်းကျင်လောက်ရှိသေးတယ်” ဟု ဆိုင်ပိုင်ရှင်က ထပ်လောင်းပြောသည်။
အလားတူ မေလ ၁၅ ရက်က ကောင်းမူးတုံရပ်ကွက်ရှိ နေအိမ်တစ်လုံးတွင် အမည်မသိလက်နက်ကိုင် လူတစ်စုက ဖောက်ထွင်းဝင်ရောက်လာပြီး မီးခံသေတ္တာ နှင့် ဖုန်းနှစ်လုံး အပါအဝင် ပိုက်ဆံ ၅ သိန်းကျပ် ယူဆောင်သွားကြောင်းသိရသည်။
Leave a Comments