သျှမ်းပြည်မြောက်ပိုင်း ကွတ်ခိုင်မြို့နယ် ပန်လော့ကျေးရွာရှိ စစ်ရှောင် (၁၂) ဦးကို ကိုးကန့်တပ်မတော် (MNDAA) က စစ်သားလုပ်ရန်အတွက် ဖမ်းဆီးခေါ်ဆောင်သွားကြောင်း စုံစမ်းသိရှိရသည်။
ယမန်နေ့ (မေလ ၁၅) ရက် ည ၉ နာရီခွဲဝန်းကျင်တွင် MNDAA စစ်သားများသည် ကွတ်ခိုင်မြို့နယ် ပန်လော့ စစ်ရှောင်စခန်းသို့ ရောက်ရှိလာပြီး စစ်ရှောင် အမျိုးသား (၁၂) ဦးကို ဖမ်းဆီးခေါ်ဆောင်သွားပြီး ည ၁၁ နာရီဝန်းကျင်တွင် ( ၇) ဦးကို ပြန်လွှတ်ပေးခဲ့ကြောင်း ပန်လော့စစ်ရှောင်စခန်းတွင် နေထိုင်သည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ မနေ့ည က MNDAA တပ်သား (၁၀) ယောက် ရောက်လာပြီး စစ်ရှောင် (၁၂) ဦးကို ဖမ်းသွားတာ။ ည ၁၁ နာရီရောက်တော့ ၇ ယောက်ကို ပြန်လွှတ်ပေးခဲ့တယ်။ သူတို့ ဖမ်းသွားတာက စစ်သားလုပ်ဖို့ ဖမ်းသွားတာ။ မလုပ်မနေရဘူးတဲ့။ အတင်းဖမ်းခေါ်သွားတာ။ မလုပ်ရင် သတ်ပစ်မယ်ဆိုပြီး ခြိမ်းခြောက်သေးတယ်” ဟု ၎င်း အမျိုးသမီးက ပြောသည်။
အဆိုပါ ပြန်လွှတ်ပေးသည့် (၇) ဦးထဲတွင် အသက်ကြီးသည့် အမျိုးသားတစ်ဦးအား ၎င်း၏ သားကို ၅ ရက်အတွင်း လာပို့ပေးရန်၊ မပို့ပေးနိုင်ပါက သတ်ပစ်မည်ဟု ခြိမ်းခြောက်ပြောဆိုသွားသေးကြောင်းသိရသည်။
“ (၇) ယောက်ပြန်လွှတ်လာတာ။ တစ်ယောက်က သူသားရှိတယ်ပြောမိသွားလို့လေ။ သူ့သားကို ၅ ရက်အတွင်း လာပို့ခိုင်းတာ။ မပို့ပေးနိုင်ရင် သတ်ပစ်မယ်တဲ့။ သူ့ကို အဲ့လို ခြိမ်းခြောက်လာသေးတယ်။ အခု သူ့သားကတော့ တစ်ခြားနေရာမှာ အလုပ်သွားလုပ်နေတာ” ဟု စစ်ရှောင်တွင်နေသည့် အမျိုးသမီးတစ်ဦးက ပြောသည်။
ထိုပြန်လွှတ်လာပေးသည့် သူထဲမှ အမျိုးသားတစ်ဦး က “မနေ့က လာခေါ်တဲ့အချိန်တုန်းက အရမ်းကြောက်တယ်။ တံခါးမဖွင့်ပေးတာတောင် တံခါးကိုခြေထောက်နဲ့ ကန်ပြီးအော်တယ်။ ဒီနေ့လည်း သတိနဲ့နေနေရတယ်။ ဘယ်ချိန်လာခေါ်မှာလည်းမသိဘူး။ ကြောက်နေရတယ်” ဟု သျှမ်းသံတော်ဆင့်ကိုပြောသည်။
အဆိုပါ MNDAA မှ စစ်ရှောင်များကို စစ်သားလုပ်ရန် ဖမ်းဆီးခေါ်ဆောင်သွားသည့်အပေါ်တွင် ကျန်ရှိနေသည့် စစ်ရှောင်များက စိုးရိမ်စိတ်ဖြင့် နေထိုင်ကြရပြီး ဖမ်းသွားသည့် သူများကို ပြန်လွှတ်ပေးရန်အတွက် တောင်းဆိုနေကြသည်။
ထိုအပြင် ဖမ်းဆီးခေါ်ဆောင်သွားသည့် စစ်ရှောင်များကိုလည်း ဖုန်းခဏသာပြောခွင့်ပေးပြီး မိဘများ၏ သဘော တူညီချက် မရသော်လည်း စစ်သားအဓ္ဓမ ပြုလုပ်ခိုင်းကြောင်းသိရသည်။
“ အဆက်သွယ်တော့ရတယ်။ ဖုန်းလည်းခဏပဲပေးပြောတာ။ စစ်သားလုပ်ဖို့ မိဘတွေက သဘောမတူဘူးလို့ပြောရင်တော့ သူတို့က အတင်းလုပ်ခိုင်းတယ်။ ကျမတို့ဖမ်းခံသွားရတဲ့သူကိုလည်း ပြန်လွှတ်လာအောင် ကူညီပေးကြပါ။ ကျမတို့လည်း အခုမှ စိုးရိမ်စိတ်တွေနဲ့ နေထိုင်နေရတာ” ဟုစစ်ရှောင်စခန်းတွင် နေထိုင်သည့် အမျိုးသမီးတစ်ဦးက ပြောသည်။
ပန်လော့စစ်ရှောင်စခန်းသည် လီဆူတိုင်းရင်းသား စစ်ရှောင်များ နေထိုင်သည့် စစ်ရှောင်စခန်း တစ်ခုဖြစ်ကြောင်းသိရသည်။
Leave a Comments